🦌 #வெங்கடேசன்_வெனிஸன் 🦌

வெனிஸன் என்றால் மான் இறைச்சி! ஆட்டிறைச்சியை  மட்டன், மாட்டிறைச்சியை  பீஃப் என்பது போல! எங்கள் அமெரிக்கப் பயணத்தில் டெக்ஸாஸில் நிறைய இடங்களில் நம்ம ஊரில் டிபன் ரெடின்னு போர்டுகள் உள்ளது போல் மான் இறைச்சி கிடைக்கும் என்ற போர்டுகளை பார்க்க நேர்ந்தது! என் பார்வை போன திசை பார்த்து என் ஆசையை அறிந்துகொண்டார் நண்பர் சுந்தர்! 

என்னா வெங்கி இன்று மான் கறி வாங்கி சமைச்சுடலாமா என்றார்! மிகச் சரியாக அப்போது காரில் இருந்த ஆடியோ சிஸ்டத்தில் இருந்து ஓ மானே மானே என்று SPBயும் கூப்பிட நண்பரிடம் ஓகே க’மான் என்றேன்! நம்ம ஊரில் மீன் மார்க்கெட் போல அங்கே மான் மார்க்கெட்டே இருந்தது! ஆம் மான்கறியில் ஏராளமான வகைகள்! மானின் படம் வரைந்து அதன் பாகங்களை குறித்து அவற்றை..

பார்ட் பார்ட்டாக கழட்டி வைத்திருந்தனர்! மார்க்கெட் உள்ளே நுழைந்தால் எங்கும் மானின் படம் வரைந்து பாகங்களை குறிக்கும் போஸ்டர்களே தென்பட்டன! பன்றியோடு சேர்ந்த கன்றையும் அங்கு கண்டேன்! ஆம் அங்கே ஆடு, மாடு, பன்றி என எல்லா இறைச்சிகளும் இருந்தன! மான்கறி விற்கும் இடத்தில் ஒரு பெண் மான் ஒருத்தி நின்று தன் மீன் விழியால் என்ன வேண்டும் என்றாள்!

அப்பெண்மான் அப்படி விழியால் கேட்ட அழகிற்கே அம்மானைப் பற்றி ஒரு அம்மானை பாடவேண்டும் போலத் தோன்றியது! (என்ன வாலி ரேஞ்சுக்கு எதுகையா) மான் பாகங்கள் குறித்த படத்தைப் பார்த்து இதில் எந்தப் பகுதி சுவையாக இருக்கும் என்றதற்கு கழுத்து, மற்றும் முதுகு என்றாள் அப்பொன்மான்! அற்புதமான பேக்கிங்கில் அந்த இறைச்சிகளை வாங்கிக் கொண்டு பில்..

செலுத்த வரும் இடத்தில் எங்கு சென்றாலும் அந்த இடத்தைப் பற்றிய வரலாறுகளைச் சொல்லும் அமெரிக்க சாஸ்திரலுபடி மான் இறைச்சி பற்றிய குறிப்புகளை பிரவுஷர்களாக வைத்திருந்தனர்! அதை எடுத்துக்கொண்டு மான் பெண்ணிடம் விழிகளால் விடை பெற்றுக் கொண்டு புள்ளி மான் போலத் துள்ளி குதித்து காரில் ஏறினோம்! வீடு திரும்ப 1 மணி நேர கார்ப் பயணம் இருந்தது!

மான் இறைச்சியைப் பற்றிய பிரவுஷரில் என்ன எழுதியிருக்குன்னு படித்தால் பல சுவாரஸ்யத் தகவல்கள் கிடைத்தன! இங்கு பிரதான மான் வகைகள் இரண்டு, வெள்ளை வால் மான், கறுப்பு வால் மான்! எல்க், மூஸ், கரிபூ, கழுதை மான் இந்த ஆறு வகைகள் தான் இங்கு வாழும் மானினங்கள்! இதிலிருந்தே பல்வேறு வகை இனங்கள் தோன்றியுள்ளன! இதில் இருந்த இன்னொரு சுவாரஸ்யத் தகவல்! 

மான்களுக்கு கொம்பில் தான் அதன் வாழ்க்கையே! ஆண் மான்கள் ஜனவரியில் தங்கள் கொம்பை இழந்து ஜுன் மாதத்திற்குள் முழுக் கொம்பையும் பெறுகின்றன! பிறகு இந்த கொம்பின் மேல் தோல் வளர்கிறது! அதை வெல்வெட் என்கிறார்கள்! இந்த வெல்வெட் கொம்பின் வளர்ச்சியை தடுத்து மான்களுக்கு அசவுகரியத்தை தரும்! இது தானாகவே உதிரும் என்றாலும் மான்கள் அடிக்கடி..

மரங்கள் பாறைகளில் கொம்பை தேய்த்து இந்த வெல்வெட்டை உதிர்க்கும்! சில நேரம் “எங்கிட்ட சண்டைக்கு வர்றியா” நீ எல்லாம் எனக்கு சிப்சுன்னு இன்னொரு ஆண் மானிடம் போயி மோதும் இந்த பக்ஸு! ஆம் அமெரிக்கர்கள் இதை செல்லமாக பக்ஸ் என்று அழைக்கின்றனர்! கொம்பில் இருந்து வெல்வெட் முழுதும் உதிர்ந்த பின்பே மான் இனவிருத்திக்கு தயாராகும்! 

இந்த மான்களை வேட்டையாட மாநிலத்துக்கு மாநிலம் பல சட்டங்கள் உண்டு! துப்பாக்கியால் சுடுவது! கண்ணி வைப்பது, தூண்டில் வைப்பது, பின் தொடர்ந்து/மறைந்திருந்து சுடுவது என பல்வேறு வகைகள் உள்ளன! வில் அம்பு உபயோகிக்க பல ஊர்களில் அனுமதியில்லை! சோளம், முள்ளங்கி, டர்னிப் போன்ற மான்களின் விருப்ப உணவுகளை மான் வரும் வழித்தடங்களில்..

போட்டு அதை குறிப்பிட்ட இடத்துக்கு திசை மாற்றி வரச்செய்து பிடிப்பதும் உண்டு! வயது முதிர்ந்த வெள்ளை வால் மான்களை கொல்வது மிகவும் சிரமம்! அமெரிக்க நண்பர்களைக் கேளுங்கள் சாலையில் உங்கள் காரின் முன் மான் பாய்ந்துவிட்டால் அவ்வளவு தான் காரின் விண்ட்ஷீல்ட் முதல் பேனட் வரை யானை மோதியது போல சேதமாகும்! இந்த மான்கள் அத்தனை வலுவானவை!

மான் வேட்டைக்கான காலம் மாநிலத்துக்கு மாநிலம் வேறுபடும்! இங்கிலாந்து/அயர்லாந்தில் மோப்ப நாய்களுடன் சென்று வேட்டையாடுவார்கள்! இங்கு அவ்வழக்கம் இல்லை! வீடு வந்தாச்சு அடுத்த 30 நிமிடத்தில் நெய்சோறு, அவித்த முட்டை, மான் கழுத்து கறிக் குழம்பு, க்ரில்களில் சுழன்று வெந்த மான் முதுகு, சப்பாத்தி என்று டைனிங் டேபிளை நிரப்பியிருந்தார் நண்பர் சுந்தர்! 

தட்டில் பிராந்திக் கலரில் நெய் மிதக்கும் கழுத்துக்கறி குழம்பு உற்ற சுடச்சுட பஞ்சு போன்ற சப்பாத்தியை ஒரு விள்ளல் எடுத்து குழம்பில் தோய்த்து ஒரு பெரிய கறி துண்டோடு சாப்பிட ஆஹா! என்ன ஒரு அற்புதம்! க்ரில் மான் முதுகு மசாலா மற்றொரு சேம் அற்புதம்! நெய் சோறும் க்ளாஸிக்! அன்றைய தினம் இந்த மானை ருசிக்கவே இந்த மானிடப் பிறவி எடுத்தது போல உணர்ந்தேன்! 

🦌 ஏவ்வ்வ்வ்வ் 🦌

#காலை_உணவு

அது எங்கள் குடும்பத்தில் வறுமை மைக்கேல் ஜாக்ஸனைப் போல துள்ளாட்டம் போட்டுக்கொண்டிருந்த சமயம்! எனக்கு 15 வயது பெரிய தம்பிக்கு 12, தங்கைக்கு 10, கடைசிதம்பிக்கு 6 வயது நாங்கள் அனைவருமே நன்கு வசதியாக வாழ்ந்து விதவிதமானஉணவுகளை உண்டவர்கள். பசி என்று எழுத்தில் கூட எழுதிப்..

படித்ததில்லை! அய்யோ பாவம் இது வாழ்ந்து கெட்ட குடும்பங்க என்பது எங்களைஅறிந்த அனைவரின் வாயிலும் இருந்து வரும் பரிதாப வார்த்தைகளாகும். எங்கள் வசதிகாலத்தில் வீட்டில் சமைக்கும் பாத்திரங்களாக இருந்த பித்தளைப் பாத்திரங்கள் எங்கள்வறுமையில் விலைக்கு போய் பசியாற்றும் பாத்திரத்தை..

கனகச்சிதமாக செய்தன! எல்லாம் விற்று வீடே அலுமினியமாய் ஜொலித்த போது அதன்ஜொலிப்பு தெரியாத வண்ணம் அங்கு வறுமை ஒளி வீசிப் பிரகாசித்தது! வீட்டில்இருப்பதை சாப்பிட்டு பழைய சோற்றை அதிசயமாகப் பார்த்து முதலில் அதை சாப்பிடாதுவிலக்கி பிறகு அதை மனதார ஏற்றுக் கொண்டதை.. 

ஃபாஸ்ட் ஃபார்வேர்டாக ஓட்டிவிடுங்கள்! போஷாக்காக வளர்ந்த வறுமை 3 வேளைசாப்பாட்டையும் 1 வேளை ஆக்கியது! எந்த பழைய சோற்றை வேண்டாம் என விலக்கிவைத்தோமோ அதாவது காலையில் கிடைக்காதா என்று ஏங்க வைத்தது. இதில் ஒரேஆறுதலான விஷயம் நாங்கள் பசி தாங்கப் பழகிக் கொண்டோம்!

நன்றாக வாழ்ந்த குடும்பம் என்னும் ஒரு தகுதியே என் தந்தைக்கு எந்த ஒரு வேலையும்கிடைக்காமலிருக்க அற்புதமாக உதவியது. மூத்தவன் எனக்கே 15 வயது என்பதாலும்அப்போது எந்த வேலையும் தெரியாததாலும் எதற்கும் முயற்சிக்கவில்லை. அம்மா மட்டும்ஒரு வழி கண்டுபிடித்தார்! அது என்ன வேலை தெரியுமா?

முள் வெட்டுவது! சீமைக் கருவேல மரத்தை வெட்ட வேண்டும். ஒரு கட்டு முள் அப்போது 2 ரூபாய்! அம்மா ஒரு நாளைக்கு 8 முதல் 10 கட்டு வெட்டுவார்கள்! அதில் 2 கட்டு எங்கள்வீட்டு சமையலுக்கு எரிக்க.. மீதிக்கு 16 ரூபாய்கிடைக்கும்! அன்றைக்கு 16 ரூபாய்என்பது மிகப் பெரிய தொகையாக இல்லாவிட்டாலும் 2 வேளை..

சாப்பாடு நிச்சயம்! காலையில் அம்மா 6 மணிக்கு கிளம்பினால் தான் மாலை 6 மணிக்குள்இது சாத்தியம். காலையில் 4 பன்னும் வெல்லம் போட்ட வர டீயும் செய்து வைத்துவிட்டுஎன் அம்மா தங்கையை துணைக்கு அழைத்துக் கொண்டு காட்டுக்கு முள் வெட்டகிளம்பிவிடுவார். டீயை சூடுபடுத்தி பிறருக்கு தருவது..

பெரிய தம்பி தான்! அம்மா முதலில் முள் வெட்டும் போது 4 கட்டுக்கு மேல் வெட்டமுடியவில்லை! அவங்களும் வசதியா இருந்தவங்க தானே! ஆகவே முதல் 6 மாதங்கள்காலை உணவுக்கு மிகவும் ஏங்கினோம். பாதாம், பிஸ்தாவாக அள்ளியள்ளி சாப்பிட்டஎங்களை பழைய சோற்றுக்கு ஏங்கவிட்டது வறுமை.

இந்த சமயத்தில் ஒரு நாள் சூடான உப்புமா சாப்பிடும் வாய்ப்பு கிடைத்தது! யார் வீடுஎன்பதை சொல்ல விரும்பவில்லை சட்டியில் அடி பிடித்து சற்றே கருகிப் போன உப்புமாஅது! கீழே கொட்ட வேண்டிய அந்த உப்புமாவை எங்களுக்கு தந்தனர். ஆனால் அந்தஉப்புமா அன்றைக்கு எங்களுக்கு தேவாமிர்தமாக ருசித்தது! 

13 வயது வரை நன்கு விதவிதமாக சாப்பிட்டு.. வெறும் 2 வருடங்கள் வறுமையில் வாடியஎங்கள் வாய்க்கே அந்த ருசி அற்புதமாக இருந்தது என்றால் காலம் காலமாக கஷ்டப்படும்ஏழைகளின் நிலையை இப்போது எண்ணினாலும் அழுகை வரும். உயிர் வாழ ருசிதேவையில்லை ஒரு உணவு வேண்டும் என்பதே வாழ்வியல்!

🩷 காலத்திற்கும் மறக்க இயலாது அந்த வறுமை காலத்து காலை உணவை..🩷

🫕 உணவு ஜோடிகள்

#ஆஹா_என்னப்_பொருத்தம்

வெளிநாட்டு ஆண் அல்லது பெண் நமது இந்தியர்களை திருமணம் செய்து கொண்டால் அந்த ஜோடிகளை நாம் வியந்து பார்ப்போம் அல்லவா! அப்படி உணவுகளிலும் வித்யாச ஜோடிகளைப் பற்றித் தான் இந்தப் பதிவே! தமிழர்களின் உணவு ரசனை எத்தகைய சிறப்பானது என்பதற்கு ஒரு சோறு பதம் தான் இந்தப் பதிவு..!

☕️ டீ - மிக்ஸர் - முறுக்கு 🥨

தமிழ்நாட்டு டீக்கடைகளை வித்யாசமான உணவு ரசனைகளின் ஊற்று எனலாம்! இங்கு தான் பலப்பல புது காம்போக்கள் உருவாகின்றன! உணவுகள் பற்றிய விஞ்ஞானத்தில் தமிழ்நாட்டில் கோடிக்கணக்கான எடிசன்கள் பிறந்து இருக்கின்றனர் என்றால் அது மிகையில்லாதது! நம்ம ஊரு டீக்கடை பலகார வகைகளே அதற்குச் சான்றாகும்!

டீக்கடை பலகாரங்கள் பற்றி வேறு பதிவில் பார்ப்போம்! இப்போ வித்யாச காம்போ! க்ளாஸில் சூடான டீ வாங்கி அதில் கைப்பிடி மிக்ஸரை அள்ளிப் போட்டு குடிக்கும் அந்த யோசனை முதலில் யாருக்கு வந்ததுனு சரித்திர சான்றுகள் ஏதுமில்லை! டீ&மிக்ஸரா கேட்க ஒரு மாதிரியா இருந்தாலும் நல்ல ருசியான காம்போ இது!

பொடி மிக்ஸரா இல்லாம கொஞ்சம் மோட்டாவான மிக்ஸர் அதில் உள்ள நிலக்கடலை பருப்பு, கடலை பருப்பு சகிதம் தேயிலையின் மணமும், இனிப்பும் மிக்ஸரின் காரமும் நமது நாவில் இணையும் போது அட! சொல்ல வைக்கும்! பின்னே மனைவி அமெரிக்காவா இருந்தாலும் அவளும் பெண் தானே! டீயில் மிக்ஸருக்கு பதில்..

காராபூந்தி, காராசேவு போட்டு ருசிப்பவர்களும் இருக்கிறார்கள்! மதுரையில் தேன் குழல் போல இருக்கும் அரிசி முறுக்கை ஒரு நொறுக் நொறுக்கி டீயில் போட்டு குடிப்பார்கள்.சுருள் சேவு, பட்டை சேவு போட்டுக் குடிக்கும் பழக்கமும் பாண்டிய நாட்டின் வழக்கமாகும்! அசட்டு இனிப்பான அச்சு முறுக்கு, இனிப்பு சேவு போட்டு..

டீ குடிப்பவர்களும் ஏராளம்! டீ மட்டுமின்றி பாலில் இதை போட்டுக் குடிப்பவர்களும் உண்டு! டீ க்ளாஸில் மேலாகப் போட்ட மிக்ஸரை முதலில் டீயோடு மொறு மொறுன்னே ருசிப்பார்கள்! டீ குடித்து முடிக்கும் போது மிக்ஸர் டீயில் நன்கு ஊறியிருக்கும். அதை லாவகமாக ஒரு ஆஃப்பாயிலை வாயில் கவிழ்ப்பது போல..

க்ளாசோடு வாயில் கவிழ்த்துவிட்டு பெருமிதத்துடன் தங்கள் உதடுகளை துடைக்கும் ஸ்டைல் தென் தமிழகத்திற்கே உரித்தான ஸ்டைலாகும்! இந்த டீ - மிக்ஸர் - முறுக்கு காம்போவை தென் தமிழ்நாட்டின் டீக்கடை மரபுன்னு கூட சொல்லலாம்!

🌮 பூரி - சாம்பார் - சட்னி 🥘

சேர்த்த ஜோடி சேட்டு வீட்டுப் பொண்ணா இருந்தாலும் எப்படி இரு மனங்கள் கலந்ததோ அப்படி வட இந்திய தென் இந்திய சமையல் கலையும் சங்கமித்த இடம் தான் இந்த பூரி - சாம்பார் - சட்னி! வட இந்தியாவிலேயே பூரி சப்பாத்திக்கு தால் செய்யும் பழக்கம் உண்டு இதனால் பூரி சாம்பார் காம்போவில் பெரிய வித்யாசம் இல்லை!

ஆனா பூரிக்கு சட்னி ஒரு வித்யாசமான இணை! பூரி, சப்பாத்தி, ஏன் புரோட்டாவுக்கு கூட சட்னி தொட்டுகிட்டது நாங்க தான்னு கோவை மக்கள் காலரை தூக்கிவிட்டுக்குறாங்க! ஆனா அந்தப் பெருமை நெல்லைக்கு தானாம்! அங்கு சைவப்பிள்ளை உணவு மெஸ்கள் அதிகம்! பொடி தோசை வகைகளின் தாய்வீடும் இதுவே!

இந்திய சுதந்திரத்திற்கு முன்பே பூரிக்கு கிழங்கு கிடையாது என கடை வாசலில் போர்டு தொங்குமாம். மேலும் நெல்லையில் வித விதமான அற்புத ருசியில் சொதிகள் கிடைக்கும்! அதுவே பூரி சப்பாத்திக்கு அல்டிமேட்டாக இருக்கும்! தேங்காய் பால் சொதி இல்லாத போது வந்த சப்ஸ்டிட்யூட் தான் தேங்காய் சட்னி!

மதுரை ஓட்டல்களில் பூரி மசாலா தீர்ந்துவிட்டால் பூரிக்கு மசால் இல்லிங்க சாம்பார் சட்னிதான்னு சொல்லியே பரிமாறுவார்கள்! பெரியார் பஸ் ஸ்டண்ட் அசோக், KBS & துளசிராம், ஜங்ஷன் கற்பகம், அரசரடி கெளரி கிருஷ்ணா, மனோரமா போன்றவை எல்லாம் பூரி சட்னி சாம்பாருக்காகவே புகழ் பெற்ற கடைகளாகும்!

🫕 ரவா உப்புமா - ரசம் 🍲

என்னங்க சொல்றிங்கன்னு சிலர் அதிர்ச்சியாகலாம்! சுடச்சுட குழைவா செய்த ரவா உப்புமாவை தட்டில் போட்டு நடுவே குழி பன்ணி 3 கரண்டி தக்காளி ரசத்தை ஊத்தி சாப்பிட்டா.. அடடா! தேவலோகத்தில் அதுதான் அமிர்தம்னு சொன்னா உடனே நம்பி விடுவிங்க! அதைச் சூடா சாப்பிடணும் என்பதுதான் முக்கிய விதி!

ரசம் அல்லது ரசமண்டி வைத்து சாப்பிடும் ரசிகர்களும் உண்டு! இதில் தக்காளி ரசம், பருப்பு ரசம் போன்றவை தான் உப்புமாவிற்கு நல்ல காம்போ! பூண்டு, மிளகு ரசம் அவ்வளவா செட்டாகாது இல்ல அதுக்கு தகுந்தாற் போல சேர்மானங்களை உப்புமாவில் குறைக்கணும்! மாயவரத்தில் காளியாகுடி ஓட்டல் அந்தக் காலத்தில் ஃபேமஸ்!

அங்கே மதிய உணவு தீர்ந்து போய் மாலை 4 மணிக்கு டிபன் ஆரம்பிக்கும் போது சூடான கிச்சடி செய்வார்கள்! கிச்சடி வேகமாக செய்துவிடலாம்! அன்று கிரைண்டர் இல்லாததால் சட்னி அரைக்கத் தான் சிறிது தாமதமாகும்! எனவே அவர்கள் கிச்சடிக்கு மதிய உணவில் மீதமான ரசத்தை ரவா கிச்சடியோடு பரிமாறுவார்கள்!

இந்த காம்போ படு ஹிட்டடிக்க கிச்சடி & ரசத்திற்கு ரசிகர்கள் பெருக கிச்சடிக்காகவே அண்டா அண்டாவாக ரசத்தை தயாரித்து பரிமாறினார்கள்! இதுவே ரவா உப்புமா & ரசம் காம்போ உருவான கதை! அளவான புளிப்புடன் இனிப்பான தக்காளியில் செய்த சூடான ரசமும் கொதிக்கும் உப்புமாவும் ஒரு ரசனையான காம்போ!

🍛 பிற வித்யாச காம்போக்கள்🧆

அடை தோசைக்கு அவியல், சொதி எல்லாம் பக்கா காம்போன்னா கூட மோர்க்குழம்பு இன்னும் பிரமாதமா இருக்கும்! அதே போல இடியாப்பம் & ஆப்பத்திற்கு பால் பாயாசம் செமையா இருக்கும்! இட்லி, தோசைக்கு குருமா, தோசை & தேங்காய் பால், பிரட் & வெஜிடபிள் குருமா இதெல்லாம் கூட சிறந்த காம்போக்கள் தான்!

குலாப் ஜாமூன் ஜீராவில் சப்பாத்தியை பிய்த்து போட்டு ஊற வைத்து சாப்பிட்டால் பிறகு அதற்கு மயங்கி விடுவீர்கள்! தயிர்சாதம் & வத்தக் குழம்பு போல, பருப்பு சாதம் & பூண்டுக் குழம்பும் ஒரு பிரமாதமான இணையாகும்! அட நாமெல்லாம் பாயாசத்தில் அப்பளத்தை போட்டு நொறுக்கி குழைத்து சாப்பிட்ட மறத்தமிழர் வம்சமல்லவா!

உங்களது வித்யாசமான உணவுக் காம்போவை கமெண்ட்டவும்💖

🐒 சஞ்சீவன ஆஞ்சநேயர் 🐵

#அரங்கனும்_ஆஞ்சநேயனும் 



இந்த 2025 ஜனவரி 1 புத்தாண்டு அன்று திருச்சியில் இருந்தேன்! அன்று ஶ்ரீரங்கம்தரிசனத்துக்கு அதிகாலை 4 மணிக்கே எழுந்து குளித்து மிகச் சரியாக 4:50க்குகோவிலுக்கு சென்றால் அம்மா மண்டம் தாண்டி சில 100 அடிகளில்.. God அரங்கனைதரிசிக்க வரும் பக்த கோடிகளை பேரி Guard அமைத்து தடுத்திருந்தனர்! 

விக்ஸ் என்பதை சுற்றி சுற்றி எழுதியதைப் போல நமக்கு நேரே 500 மீட்டர் தூரத்தில்இருந்த சந்நிதிக்கு 5 கிலோ மீட்டர் சுற்றி நடக்கவிட்டனர்! அதிகாலை 5 மணிக்கேஅவ்வளவு கூட்டம்! நான் என் வேகத்தில் நடந்து போய் க்யூவில் நிற்க தாமதமாகி 6:30 மணி தரிசனம் முடிந்தது அடுத்து 8:30க்கு தான் தரிசனம் என்றனர்! 

முட்டாள் தனமாக க்யூவிலிருந்து வெளியே வந்துவிட்டேன்! அப்படியே இருந்திருந்தால்8:30 தரிசனம் போயிருக்கலாம்! திரும்ப வெளியே வந்ததால் பரமபத பெரிய பாம்புகொத்தியது போல மீண்டும் துவங்கிய இடத்துக்கே போய் நிற்க.. என்ன சார் 12:30 மணிதரிசனமா என்றார் நாமம் போட்ட மாமா ஒருவர்! 

மணி பார்த்தேன் 7:30 என குறியீடாகக் காட்டியது! 2 கால்களிலும் ரத்தம் கட்டிக்கொண்டது போல வலி (இரண்டரை மணிநேரம் நின்றிருக்கிறேன்) புத்தாண்டில்என்னைப் பார்க்கும் வாய்ப்பை இழந்த அரங்கனை எண்ணி  இரங்கினேன். வெளியேறும்போது தொண்டரடிப் பெரியாழ்வர் சந்நிதி முன் நின்று சேவித்தேன்! 

அரங்கனார் ரங்கசாமியின் தரிசனம் தான் கிட்டவில்லை ஆனால் கோவிலுக்கு வெளியேவந்தால் பெரியார் ராமசாமியின் தரிசனம் கிட்டியது! அவரையும் வணங்கிவிட்டுகிளம்பினேன். நமது டிரைவர் அண்ணன் ராகவேந்திரா நகர் என்னும் இடத்தில் காரைநிறுத்தி இருந்தார்! கோவில் பக்கமெல்லாம் கார் நிற்க இடமேயில்லை!

லோக்கல் ஆட்டோ ஒன்றை கூப்பிட்டு ராகவேந்திரா நகர் என்றேன். கோவில் வாசலில்இருந்து 2 கி.மீ தூரம் இருந்த ராகவேந்திரா நகருக்கு ₹250 கேட்டார்! புது வருடம் வேறுஅவருடன் பேரம் பேச விரும்பவில்லை! சரி நீங்க என்ன கூடவா கேட்கப் போறிங்கபார்த்து செய்ங்க என ஆட்டோ ஏறினேன்! 

சட்டுன்னு சார் 200 கொடுங்க போதும் என்றார்! உங்க ப்ரியம்ணே நான் வேற இன்னிக்குசாமி பார்க்கலை என்றதும் சார் 100 கொடுங்க போதும் என அதிரடியாய் கட்டணத்தைக்குறைத்து, ஆக்ஸிலேட்டரை கூட்டினார். ஆட்டோவில் பயணித்த 2 நிமிடங்களில் கார்நின்ற இடத்தில் இறங்கி 150 கொடுத்தேன்!

முகமெல்லாம் பிரகாசமாகி தேங்யூ சார் ஹேப்பி நியூ இயர் என்று வாழ்த்து சொல்லிக்கிளம்பினார். காரில் அமர்ந்தேன் கார் கிளம்பும் போது என் கதவருகே ஒரு ஆட்டோவந்து நின்றது! அதே ஆட்டோ தான்! கண்ணாடியை இறக்கினேன் சார்! இங்க பக்கத்துலசஞ்சீவன ஆஞ்சனேயர் கோவில்னு ஒண்ணு இருக்கு!

இப்போ தான் கட்டிகிட்டு இருக்காங்க! அங்க இவ்வளவு கூட்டம் இருக்காது என்றார்! ஆஞ்சநேயர் என்று காதில் விழுந்த போதே நான் சிலிர்த்து போனேன்! எப்படிப்பாபோறது என்றேன்! சார் இங்கேருந்து பட்டர்ஃப்ளை பார்க் போங்க பார்க் வாசலில்இருந்து 3கிமீ தூரத்தில் மேலூர் என்னும் ஊரில் இருக்கு என்றார்!

அடுத்த 15 நிமிடத்தில் அந்தக் கோவிலில் இருந்தோம்! இன்று  உலகிலேயே மிகப் பெரியஆஞ்சநேயர் இவர் தானாம்! நாமக்கல் நங்கநல்லூர் ஆஞ்சநேயரை விடப் பெரியவர் 51 அடி உயரத்தில் விஸ்வரூபம் மட்டுமல்ல விக்ரம் வரை இருந்தார்! உள்ளே, ராமர், சக்கரத்தாழ்வார், யோக நரசிம்மர், வெங்கடாஜலபதி ஆகியோரது, 

சந்நிதிகள் இருந்தன! அங்கே கோவிலில் நடக்கும் திருப் பணிகளை ஆஞ்சநேயர் மாமாஎன்கிற வாசுதேவன் முன்னின்று செய்து வருகிறார்! எங்களுக்கு பிரசாதமும் கையில்கட்டும் ஆஞ்சநேயர் கயிறும் தந்தார்! பின்புறம் பெரிய கோசாலை ஒன்றும் இருந்ததுகோவில்கட்டுமானப் பணிகள் நடந்து கொண்டிருந்தன! 

37அடீ உயர சிலை பீடம் மற்றும் அடிப்புறம் அனைத்து சேர்த்து 51 அடி உயரஆஞ்சநேயர்! இத்தனை பிரம்மாண்ட ஆஞ்சநேயரை நான் காண்பது இதுவேமுதன்முறை! புத்தாண்டு அன்று திவ்யமான தரிசனம்! ஆம் அவனே என்னை அழைத்துஅவனே என்னை அருள் செய்தான்! புத்தாண்டு அன்று புத்துணர்வோடு திரும்பி வந்தேன்! 

🐵 அரங்கன் தராததை அனுமன் தந்தான் 🐒

23

23

இந்த 23 எனும் எண்ணுக்கும் எங்கள் RISE ADVERTISING நிறுவனத்துக்கும் ஒரு அபூர்வ பந்தமுள்ளது! ஆம் 2 வது மாதமான பிப்ரவரியின் 3 ஆம் தேதி துவங்கப்பட்டது! எந்த ஆண்டு தெரியுமா 2003!! இதெல்லாம் தானாக அமைந்தது! எந்த ஒரு திட்டமும் நாங்கள் வகுக்கவில்லை! அப்படியே ஒரு ப்ளாஷ்பேக் போலாமா! கோவை சசி அட்வர்டைசிங் தான் எங்களை விளம்பரத் துறையில் வளர்த்த நிறுவனம்!

அதன் மதுரைக் கிளையில் கிறிஸ்டோபர், ஶ்ரீசைலம் இருவரும் என்னுடன் பணியாற்றியவர்கள்! அங்கு அவர்களுக்கு சீனியர் நான் என்றாலும் நாங்கள் அப்படி எந்த பாகுபாடும் பார்க்காது ஒன்றாக இணைந்து பணியாற்றினோம்! தனியாக விளம்பர நிறுவனம் துவங்கும் ஆசையெல்லாம் அப்போது இல்லை! ஆனால் வாழ்க்கை நாம் எதிர்பாராத ஒரு சூழலை உருவாக்கி அந்தச் சுழலுக்குள் நம்மை இழுக்கும்!

அப்படி ஒரு சூழல் அமைந்தது! 7 வருடங்கள் பணியாற்றிய நிறுவனம் உடனே ராஜினாமா தந்தால் ஏற்க மாட்டார்கள் என நம்ப்ப்பி ஜனவரி 27 ஆம் தேதி ராஜினாமா கடிதம் அளித்தோம்! நாங்கள் ஹேண்டில் செய்த க்ளையண்டுகளுக்கு எங்களுக்கு பதில் வரும் புதிய ஆட்களுக்கு டிரெயினிங் தரணும், நிறுவனத்திற்கு வர வேண்டிய பேமெண்ட் எல்லாம் வசூலிக்கணும். ராஜினாமாவை ஏற்க எப்படியும் 3 மாதங்களாவது ஆகும் என்றே நினைத்தோம்!

மூன்றே நாளில் (ஜனவரி30) உங்க 3 பேருடைய ராஜினாமாவும் ஏற்கப்பட்டதென முகத்தில் சப்பென்று ஓங்கி அறைந்தது போல சொல்லிவிட்டனர்! சற்று முன் வரை சொந்தவீடு போல நாங்கள் வளைய வந்த அலுவலகம் கழுத்தைப் பிடித்து தள்ளாத குறையாக வெளியே போகச் சொல்லிவிட்டது! திகைத்து போய் நின்றோம்! சொந்த வீட்டை விட்டு வெளியேறும் கெளரவம் பட சிவாஜி போல, முத்து பட ரஜினி போல எங்கள் நிலை!

நாங்கள் சொந்த நிறுவனம் துவங்கும் யோசனை கூட கால் திருக் குறள் அளவு தான் இருந்தது! இப்படி திடீர்னு அனுப்புவாங்க என்றெல்லாம் நினைக்கவில்லை! அது அலுவலகமாக இருந்ததால் நாங்கள் கதறி அழவில்லை! இயல்பு நிலைக்கு வரமுடியாமல் போனாலும் சமாளித்து முகத்தை சிரிச்சா போல வைத்துக் கொண்டு ரிலீவிங் ஆர்டரை கையால் பெற்ற விநாடி செல்போன் ஒலித்தது! என் தங்கையின் கணவர் தான்!

தங்கைக்கு ஆண் குழந்தை பிறந்துள்ளதாக சொன்னார்! இதுவரை மனதில் கவ்வியிருந்த இருள் விலகி வெளிச்சம் வந்தது! மருமகன் பிறந்திருக்கிறான்! அப்ப புது நிறுவனமும் பிறக்கட்டும் எனது சொல்லாமல் சொல்லியது போல மகிழ்ச்சியைத் தந்தது அந்த சேதி! அடுத்த நாள் இரவே சென்னைக்கு பஸ்ஸில் டிக்கெட் போட்டோம்! எங்கள் வளர்ச்சி மீது மிகுந்த அக்கறை சில நல்ல உள்ளங்கள் சென்னையில் இருக்கிறார்கள்!

அவர்களை சந்தித்து அடுத்த கட்ட நடவடிக்கையை முடிவு செய்யத் தான் கிளம்பினோம்! அப்போதும் உடனே நிறுவனம் துவங்கும் யோசனை இல்லை! சென்னை வந்து நண்பர் இயக்குநர் ராம் குமார் அவர்களை முதலில் சந்தித்தோம்! அவர் சுப்ரமணியன் எனும் நண்பரிடம் அழைத்து போனார்! அங்கு 30 நிமிடத்தில் எங்கள் கம்பெனி துவங்கியது!ஆம்! கம்பெனிக்கு என்ன பேருன்னு சுப்பிரமணியன் கேட்டார்!

அலோ சார்! ஒரு கம்பெனி துவக்க இடத்தின் அட்வான்ஸ், பேசிக் பர்னிச்சர்ஸ், மினிமம் ஒரு கம்ப்யூட்டர், பெயர்ப் பலகை, விசிட்டிங் கார்டு, லெட்டர் பேடுன்னு ஒரு சிறிய பட்ஜெட் போட்டிருந்தோம்! அதுவே கையில் இல்லை! அதுக்குள்ள கம்பெனிக்கு பேரா?இங்க பாருங்க பணமெல்லாம் பின்னாடி ஏற்பாடு பண்ணிக்கலாம்! என்னென்ன பேரு நினைச்சு வச்சிருக்கிங்க சொல்லுங்க! பிப்ரவரி 3 ஆம் தேதி மிக நல்ல நாள்!

அன்று ஒரு பெயர் சூட்டுங்கள் பிறகு பணம் வந்தும் ஆரம்பிக்கலாம் என்றார்! நாங்க SUCCESS, SPARK, ORANGE & LEMON, RISE, ANTZ. என பெயர்களைச் சொல்ல சுப்பிரமணியன் RISE இந்தப் பேர் நல்லாருக்குப்பா! உங்க 3 பேருக்கும் செட்டாகும்! கம்பெனி நல்லா வளரும் என்றார்! 10 நொடிகளுக்கு முன்பு கம்பெனி, கம்பெனின்னு சொன்னது இப்போ RISE ADVERTISING என்று நாமகரணம் சூட்டப்பட்டு ரைஸ் ஆனது!

பிப்ரவரி 3 அன்று திருவொற்றியூர் வடிவுடையம்மன் கோவிலுக்கு அதிகாலை 5 மணிக்கே போயிடுங்க! ஒரு அக்கவுண்ட் லெட்ஜர் வாங்கி அதுல கம்பெனி பேரை கோவிலில் உட்கார்ந்து எழுதுங்க பிறகு சாமிகிட்ட வச்சி ஒரு அர்ச்சனை செய்துட்டு வந்துடுங்க! அவர் சொன்னதை இம்மி பிசகாமல் அப்படியே செய்தோம்! அன்று எங்கள் கையில் பணம் சில ஆயிரங்கள் தான் இருந்தன! ஆனால் கோடிக் கணக்கில் நம்பிக்கை இருந்தது!

பணம் ஒன்றைத் தவிர எங்களிடம் கோடிக் கணக்கில் உழைப்பும், கோடிக் கணக்கில் வணிக சிந்தனையும், கோடிக் கணக்கில் க்ரியேட்டிவிட்டியும் கொட்டிக் இருந்தது! அன்று நம்பிக்கையுடன் எங்கள் நிறுவனத்திற்கு பெயர் சூட்டினோம்! இயக்குநர் ஜி.பி. விஜய் (கமல் நடித்த கலைஞன் படத்தின் இயக்குநர்) எங்கள் வெல்விஷர்களில் ஒருவர்! எங்கள் அலுவலகம் ஆரம்பிக்க போட்டு வைத்த பட்ஜெட்டை நீட்டினோம்!

ஓ இவ்வளவு ஆகுமா என்னால் முடிஞ்சது இதுதான்னு ஒரு சின்ன தொகையை அவர் தந்திருந்தா கூட மகிழ்ந்திருப்போம்! ஆனால்.. மொத்தத் தொகையையும் தந்து எங்களை வாழ்நாள் நன்றிக் கடனுக்கு ஆட்படுத்தினார்! நண்பர் ராம்குமார் ஒரு படி மேலே போய் முதல் சில மாதங்கள் வியாபாரம் இல்லைன்னா என்ன பண்ணுவிங்க? இதை வச்சுக்கோங்கன்னு ஒரு தொகையை தந்து எங்கள் நன்றிக் கடன் லிஸ்டில் இணைந்தார்!

மதுரை வந்து ஆடிட்டர் ஒருவரை சந்தித்து முறைப்படி இன்கம் டாக்ஸ், சர்வீஸ் டாக்ஸ் எண்கள் வாங்கி, பார்ட்னர்ஷிப் டீட் போட்டு அலுவலகம் இல்லாததால் வீட்டு விலாசத்திலேயே கம்பெனியின் பெயர் பதிந்து நிமிர்ந்தபோது கை கொடுத்த தெய்வம் எங்கள் ந.க. லிஸ்டில் வந்தார் மேலமாசி வீதி VVB ஜோதிப்பிரகாசம் அண்ணாச்சி!அவர் தான் எங்கள் அலுவலகத்திற்கு இடம் தந்த பெருமகனார்! அட்வான்ஸ் & வாடகைக்கு இடமும்..

(இன்றுவரை 23 வருஷமா அதான் ஆபிஸ்) அவ்வப்போது நல்ல ஆலோசனையும் தந்தவர்! முதல் இருமாதங்கள் ஒரு வியாபாரமும் இல்லை! சென்ற இடம் எல்லாம் சுவரில் அடித்த பந்து போல திருப்பிவிடப்பட்டோம்! எங்கள் விசிட்டிங் கார்டை மட்டும் வைத்து முதலில் வணிகம் தந்தவர் மதுரை விநாயகா ஃபர்னிச்சர் சுரேந்திரன் அண்ணாச்சி தான்! அதன் பிறகு எங்களுக்கு மிகப் பெரிய வாய்ப்பை தந்தது போத்தீஸ் தான்!

போத்தீஸ் முருகேஷ் அவர்கள் இல்லாமல் எங்கள் நிறுவனத்தின் வளர்ச்சியை எண்ணிக்கூட பார்க்க முடியாது! தங்கமயில், ராஜ்மஹால் இந்த இரு நிறுவனங்கள் தான் எங்களது முன்னாள் சசியின் க்ளையண்டுகள்! தனித்து நாங்கள் வந்தது அவர்களுக்கு தெரியும் என்றாலும் சசியுடன் இருந்த ஒப்பந்தம் காரணமாக எங்களுக்கு வாய்ப்பு வழங்கவில்லை! வெளியே வந்து நாங்கள் நன்கு இயங்கி வருவது தெரிந்து எங்களை அழைத்தனர்!

அதன் பிறகு துவங்கியது எங்கள் காலம்! கடின உழைப்பு, வித்யாச சிந்தனைகள் எல்லா இடங்களிலும் எங்களை மேலே தூக்கி நிறுத்தியது! அனைவரையும் மதித்தோம், எவரையும் பாராட்டத் தவறாமல் இருந்தோம், திறமைக்கு வாய்ப்பளித்தோம், கால்களில் நடக்கப் பழகினோம் சாதனைகள் எல்லாம் அதுவாக நிகழ்ந்தது! விளம்பர உலகம் எங்களைப் புகழ்ந்தது! அதனை தலையில் ஏற்றிக் கொள்ளவில்லை!

அடுத்த வேலைக்கு ஆயத்தமானோம்! எங்கள் உழைப்பின் மூலமே நாங்கள் பதில் தந்து கொண்டிருந்தோம்! மதுரையை தொடர்ந்து சென்னையில் கிளை துவக்கினோம்! 23 வருடங்களுக்கு முன்பு சென்னையில் அலுவலகமே இன்றி எந்தச் சாலையில் நின்று செய்வதறியாமல் திகைத்தோமோ பின்னாளில் அதே சாலையில் சென்னைக் கிளையை திறந்தோம். பிறகு கோவை! எங்கள் வணிகம் வளர்ந்தது நாங்களும் அதோடு வளர்ந்தோம்!

இதோ இன்று போத்தீஸ், தங்கமயில் இரு நிறுவனங்கள் மட்டும் கிட்டத்தட்ட 100 கிளைகள் வந்துவிட்டது! அவர்களோடு சேர்ந்து நாங்களும் வளர்ந்திருக்கிறோம்! இதெல்லாம் போக ஈவண்ட்/ வெட்டிங் மேனேஜ்மெண்ட் துவக்கி அதிலும் சாதித்தோம்! சாதிக்க இருக்கிறோம்! 22 வருடங்களுக்கு முன் அதிகாலை இருளில் வடிவுடையம்மன் கோவிலுக்கு போனது இன்றும் நினைவிலுள்ளது! ஆம் நாங்கள் ஏறி வந்த ஏணியை மறக்கவில்லை!

23 கடந்து இன்னும் சாதிப்போம் 💖💖

⛹️‍♂️ஆடுகளம்

#தெரு_விளையாடல்கள்

இன்று தெருக்களில் பிள்ளைகள் விளையாடுவது என்பது ரொம்ப அபூர்வம்! தொலைக்காட்சிகள் நம் வாழ்க்கையை ஆக்ரமிக்காத முற்பகுதி 80ஆம் ஆண்டுகளில் மாலை 4 மணிக்கே தெருவில் பிள்ளைகளின் ஆரவாரமும், மகிழ்ச்சி கூக்குரலும் இரைச்சலாக எதிரொலிக்கும்! விளையாடுவதற்கு அத்தனை விளையாட்டுகள்!

கில்லி, கோலி, பம்பரம், நுங்கு வண்டி போன்ற ஆட்டங்கள் களை கட்டும். டயர் உருட்டுவது போல பட்டறைகளில் உபயோகமின்றி தூக்கியெறியும் அரையடி உயர இரும்பு வளையத்தையும் அதை உருட்டிச் செல்ல முனையில் U வடிவத்தில் வளைந்த நீண்ட செல்ஃபி ஸ்டிக் போன்ற கம்பியும் வைத்து விளையாடுவோம்!

அதுவும் நூங்கு வண்டி போலத் தான்! ஆனா கொஞ்சம் காஸ்ட்லி 5 ரூபாய் தேவைப்படும்! ஆக்கர், அபிட் எடுத்து ஆடும் விதவிதமான பம்பர ஆட்டமும் அன்று பரபரப்பானது! பம்பர ஆட்டம் பற்றி நான் தனிப்பதிவே எழுதி இருக்கிறேன்! அடுத்ததாக கோலி! எலந்தைப் பழம் முதல் பெரிய நெல்லிக்காய் சைஸில் வண்ண கோலிகள்!

சோடா பாட்டிலுக்குள் இருக்கும் நீல கோலி போன்ற சிங்கிள் கலர் கோலிகள் முதல் கலைடாஸ் கோப்பின் டிசைன்கள் போல அல்லது ஓவியனின் பேலட் போர்டு போல கோலியின் கண்ணாடி மேனிக்குள் தெரியும் பலவண்ணங்களே அத்தனை அழகு! கோலி மீது இன்னொரு கோலியைக் கொண்டு அடிக்க வேண்டும்!

கட்டை விரலை தரையில் ஊன்றி நடு விரலின் முன்புறம் கோலியை வைத்து விரலை முடிந்த வரை பின்புறம் வளைத்து குறிபார்த்து எதிரே உள்ள கோலியை அடித்து தள்ளிக்கொண்டே போக வேண்டும்! நமது பவரை காட்ட இழுத்து சுண்டும் போது எதிரே இருக்கும் கோலி அடி பொறுக்காமல் நொறுங்கிவிடும்!

தன்வினை தன்னைச் சுடும் என்பது போல சில நேரம் நமது கோலியே உடைந்து போகும்! விரலால் சுண்ட சிறிய கோலிகள். பெரிய குழிக்குள் இருக்கும் கோலிகளை அடித்து வெளியே கொண்டு வர நெல்லிக்காய் சைஸ் கோலி வேண்டும்! அதை குறி பார்த்து மலிங்கா அல்லது பதிரனா போல குழியில் எறியவேண்டும்!

கில்லி கொஞ்சம் டேஞ்சர்! சொந்தமா கில்லியும் தாண்டலும் வைத்திருந்தால் அவன் கில்லியில் பெரிய ப்ளேயர். நாங்கள் அடித்த கில்லிகள் 50 குண்டு பல்புகள், 10 தெரு விளக்குகள், 20 ஜன்னல்கள், 10 சுவர் கடிகாரங்களை உடைத்திருந்தது! இந்தச் சாதனை விஜியின் பாட்டி மண்டை உடைந்த அன்று முடிந்தது!

விஜி என்கிற விஜயகுமாரின் பாட்டி மீதான மரியாதைனு உலகம் நினைத்தாலும் விஜியின் சகோதரி மீனா.. வேண்டாம் தெரு விளையாட்டுக்கு வருவோம்! அடுத்து பட்டம்! ஒரு ரூபாய்க்கு அப்போது அழகழகான வண்ணப் பட்டங்கள் கிடைக்கும்! 50 காசுக்கு இன்றைய A4 பேப்பர் சைசில் வாலுடன் கிடைக்கும்!

பெரிய பட்டம் 1 ரூபாய் பாதி நாளிதழ் சைசில் இருக்கும்! ஒரு ரூபாய் அன்று பெரிய பாக்கெட் மணி! வசதியுள்ள யாராவது பட்டம் வாங்கினால் அதைப் பார்த்து நியூஸ் பேப்பரில் பட்டம் செய்வோம்! சீன தயாரிப்புகள் எல்லாத்துக்கும் நாங்கதான் முன்னோடி!அதன் சூத்திரம் தெரியாது செய்யும் பட்டம் பறக்கும் முன்பே கிழிந்திடும்!

பறக்கும் விமானம் கண்டுபிடிக்க ரைட் சகோதரர்களே 117 முறை முயன்றபோது நாம் துவளலாமா 58வது முயற்சியில் நாங்க செய்த பட்டம் தரையிலிருந்து 6 அடி உயரத்தில் 16 விநாடிகள் பறந்து வீழ்ந்தது! அதன் பின்பு சரியான சூத்திரத்தில் பட்டம் செய்து பறக்கவிட்ட போது ரைட் பிரதர்ஸ் அளவுக்கு கொண்டாடினோம்!

பட்டம் கூட ஈஸி! அதுக்கு நூல் வாங்க பட்ஜெட் இருக்காது! எங்கடா இங்க இருந்த பச்சை நூல்கண்டை காணோம்னு டைலர் மிஷின் வைத்திருக்கும் வீட்டிலிருந்து ஒரு அக்கா கத்தும் ஒலி தெருவில் கேட்கும்! அடுத்தடுத்த ஆண்டுகளில் நாங்களே பெரிய பட்டம் செய்யும் டெக்னாலஜியை கற்று போரடித்து கைவிட்டோம்!

பொருட்கள் இல்லாத விளையாட்டுன்னா ஓடி பிடித்து ஆடுவது, கண்ணா மூச்சி, திருடன் போலீஸ், பச்சக்குதிர, சிகரெட் அட்டைகளை கல்லால் அடித்து நகர்த்துவதுன்னு ஏராளமான ஆட்டங்கள்! கொல கொலயா முந்திரிக்கா, ஒரு குடம் தண்ணி ஊத்தி ஒரு பூ.. எல்லாம் பெண் பிள்ளைகளின் ஆட்டங்கள்!

ஃப்யூஸ் போன பல்பில் நீர் நிரப்பி அதை சூரிய ஒளியில் காட்டி அதன் எதிரே வெள்ளைத்துணி கட்டி சினிமா பிக்சர்களை போட்டு அன்றைக்கே ஃபிலிம் காட்டியிருக்கிறோம்! லேத்தில் பம்பர ஆணி அடித்தது, வளையம் தள்ள கம்பி வாங்கி வளைப்பது, பட்டம் செய்வது என எங்கள் டெக்னிக்கல் ஸ்கில்லும் நன்கு வளர்ந்தது!

ஹாக்கி, கிரிக்கெட், ஃபுட்பால், ஷட்டில், டென்னிஸ், செஸ், என ஏராளமான ஆட்டங்கள் இன்றைக்கு உள்ளன! சம்மர் கோச், ஸ்பெஷல் கோச் தாண்டி பிரத்யேக அகாடமிகள் வந்துவிட்டன! ஆனால் அன்று தெருவில் ஆடிய விளையாட்டுகளுக்கு இணையாக இன்று எந்த ஒரு விளையாட்டும் இல்லையென்பதே உண்மை!

🧚‍♂️ இதில் இல்லாத விளையாட்டுகளை நீங்களும் சொல்லலாம்🏌️‍♀️

🐴 குதிரை வண்டி 🦄

#குதிரை_வண்டி 



அறிவியலும், விஞ்ஞானமும் வளர வளர நம்முடன் இருந்த பல விஷயங்கள் அடியோடு மாறியிருக்கும்! அல்லது வழக்கொழிந்து போயிருக்கும்! கையால் கடைப் பெயர்ப் பலகைகள் வரையும் ஓவியங்கள் எனும் தொழில் ஃபிளக்ஸ் ஃபேனர் வந்த பின்பு முற்றிலும் மாறியது ஒரு உதாரணம்! தூத்துக்குடி சாந்தா ஆர்ட்ஸ் கையால் வரைந்த போர்டுகளெல்லாம் அப்படியே தத்ரூபமாக புகைப்படம் போலவே இருக்கும்! 

இப்போது அப்படி வரையும் ஆட்களில்லை என்பதை விட அதற்கு நேரமில்லை! காலை 9 மணிக்கு டிஸைன் செய்ய ஆரம்பித்து 10 மணிக்கு பிரிண்டிங் போய் 11 மணிக்கு கடையில் போர்டு மாட்டப்பட்டுவிடும்! ஆனால் கையால் வரைவது அப்படியல்ல குறைந்தது 1 வாரம் 10 நாட்கள் தேவைப்படும்! இப்படி காலத்தில் கரைந்தது தான் குதிரை வண்டியும்! கிட்டத்தட்ட 150 ஆண்டுகளுக்கும் மேலான பாரம்பரியம் மிக்கது! 

இந்தியாவில் பொது மக்கள் பயணத்திற்கு 1880களில் துவங்கிய குதிரை வண்டியின் பாரம்பரியம் 1990 வரை நல்ல உயிர்ப்புடன் இருந்தது! மோட்டார் வாகனங்களின் புழக்கத்துக்கு பின்பு சிறிது குறைந்து, வாடகை டாக்ஸி வந்தபின் மேலும் குறைந்து ஆட்டோ வந்த பின்பு அடியோடு குறைந்து போனவை தான் இந்தக் குதிரை வண்டிகள். 70களில் பஸ் / ரயில் நிலையங்களின் வாயிலில் குதிரை வண்டி ஸ்டாண்ட்டுகளை பார்க்கலாம்.

வைக்கோல், பசும்புல் வாசனை, குதிரைச் சாணம் எல்லாம் கலந்து அந்த மணத்திலேயே ஸ்டாண்ட் இருக்கும் இடத்தை தெரிவிக்கும்! குதிரையின் கண் பட்டை, அதன் முதுகில் கட்டும் தோலால் ஆன சேணம், கடிவாள பெல்டுகள் எல்லாம் அங்கு மாட்டியிருக்கும்! சில இடங்களில் கழுகின் குரலை மிமிக்ரி செய்து குதிரைகள் கனைக்கும் ஒலியும் கேட்கும்! சிமெண்ட் தொட்டிகளில் நீர் இருக்கும், புட்டபர்த்தி சாய்பாபா தலை முடி போல..

பரந்த கோரைப் புற்கள், கட்டுக் கட்டாக வைக்கோல்கள், கொள்ளு, தவிடு மூட்டைகள், லாந்தர் விளக்குகள், சாட்டைக் கம்புகள், பழுதடைந்த குதிரை வண்டிச் சக்கரங்கள், சக்கரத்தை சுற்றியடித்து பழுதடைந்த கழண்டு போன இரும்பு ரிம்கள் எனக் குவிந்திருக்கும்! வண்டிக்காரர்கள் அதை லாயம் என்பார்கள்! குதிரைகளை கட்ட கல்லால் ஆன கம்பங்கள் இருக்கும்! இரவில் வண்டியை கழட்டி சாய்த்து வைத்துவிடுவார்கள்.

குதிரை வண்டி முன் பக்கம் ஒற்றை மாட்டுவண்டி போலவே இருக்கும்! நுகத்தடியில் குதிரையைப் பூட்டியிருப்பார்கள்! பின் பக்கம் வில் போல வளைந்த கூண்டு போன்ற வண்டி அப்படியே எஸ்கிமோக்களின் இக்ளூ வடிவில் இருக்கும்! உள்ளே 3 நபர்கள் தாராளமாகவும் 5 நபர்கள் நெருக்கியும் அமரலாம். நாம் வண்டி ஏறும் போது வண்டிக்காரர் முன்புறம் அமர்ந்தும், இறங்கும் போது குதிரைக்கு அருகேயும் நின்று பேலன்ஸ் செய்வார்!

வண்டியில் அமரும் பகுதியில் புற்கள் அல்லது வைக்கோல் போட்டு மேலே கோணி விரித்திருப்பார்கள்! மெத்துனு உட்காரலாம் என்றாலும் சிறிது நேரத்தில் பின்னால் புல் குத்தும்! வண்டியில் ஒவ்வொருவராக ஏற வேண்டும் குதிரை வண்டிக்காரர் முன்புறம் அமர்ந்து முன்னால வாங்க முன்னால வாங்கன்னு நாம் முன்னேற வரவேற்பார்! வண்டியின் பின்புறம் கால் வைத்து ஏற கீழே படி போல (Foot ரெஸ்ட்) சதுர பலகை இருக்கும்! 

அதில் கால் வைத்து ஏறவேண்டும்! வண்டிக்கு முன்னே பக்க வாட்டில் கால் வைத்து ஏற இதே போல ஒரு சிறு பலகையும் உண்டு! இளைஞர்கள் சற்று பெரிய சிறுவர்கள் ஏறலாம். குதிரை வண்டிப் பயணம் ஸ்லோ சைக்கில் ரேஸ் போல ஆனால் குதுகலமாக இருக்கும்! முன்பக்கம் வண்டிக்காரருடன் அமரும் போது கால்களை கீழே தொங்கவிட முடியாது! குதிரையின் பின் பகுதி நம் கால்களிலும் உரசும். வண்டிக்காரர் சாட்டைக்கம்பு வைத்திருப்பார்.

குதிரையை விரட்ட அதனை சுழட்டுவார்! அவ்வப்போது அந்த சாட்டை நம்மையும் தீண்டும்! சில நேரம் குதிரை நகராது முன்னும் பின்னும் இழுக்கும் அப்போது சுளீர் சுளீர்னு நம்ம ‘அண்ணா’ போல குதிரை மீது சாட்டையை சுழற்றுவார்! சில நேரங்களில் குதிரைகளுக்கு அது வலிக்காமல் இன்னும் நல்லா அடி என்பது போல நிற்கும்! சில நேரம் வேகமெடுத்து ஓடும்! பயணங்களில் குதிரை வண்டி நன்கு குலுங்கும் என்பதால்..

நீண்ட தூர குதிரை வண்டிப் பயணம்  உடல் வலியைத்தரும்! நகரத்தை விட்டு சற்று வெளியே வந்துவிட்டால் வண்டிக்காரர் சாட்டைக் கம்பை வண்டி சக்கரத்தின் ஊடே வைக்க டக டக டகவென எழும்பும் ஒலி கேட்டு அதிர்ந்து குதிரை வேகமாக ஓடும்! அவ்வப்போது ஹை, ஹை, டுர், டுர்ரா, என வண்டிக்காரர் எழுப்பும் ஒலி தான் ஆக்ஸிலேட்டர்! வண்டிக்காரர் ஓரமா போ, வழிவிடு சார் என கத்துவதும் டகடக ஒலியும் தான் குதிரை வண்டியின் ஹாரன்! 

குதிரை வண்டிகளுக்கு ரிப்பேர் பார்க்கும் கொல்லன் பட்டறைகள், குதிரைகளுக்கு லாடம் அடிக்கும் இடம், புல், வைக்கோல் விற்கும் இடம் போன்றவை இருக்கும்! இன்று நாம் பயணம் செய்யும் ஆட்டோ பெட்ரோல் பங்க் போவது போல அன்றைக்கு புல் வாங்குமிடம், லாடம் அடிக்குமிடம் என்று வண்டியை நிறுத்துவதும் உண்டு! நிற்கும் குதிரைக்கு லாடம் அடிப்பதை எல்லாம் இன்றைய கிட்ஸ் பார்த்திருக்க மாட்டார்கள்! 

குதிரை வண்டியில் எல்லாரும் அமர்ந்ததும் பின்புறம் செக்போஸ்ட்டில் குறுக்கே உயர்த்தும் கம்பு போல ஒரு முனையில் கொக்கி போல வளைந்த கம்பி இருக்கும். அந்த கொக்கியை எதிர் முனையில் உள்ள வளையத்தினுள் லாக் செய்துவிட்டால். யாரும் விழ மாட்டார்கள்! அதைப்பிடித்துக் கொண்டே பாதுகாப்பாக பயணம் செய்யலாம்! சில வண்டிகளின் முன்னும் பின்னும் படுதாக்கள் இருக்கும்! மழையிலிருந்து நம்மை   காக்க! 

குதிரை வண்டிக்கு வாடகை 50 பைசா 75 பைசான்னு கேட்பாங்க  டவுனில் இருந்து வீடு வர 5 பேருக்கு அதிக பட்சம் 1.25 ரூபாய் தான் ஆகும். வண்டி அடியில் வயிற்றுப் பகுதியில் சாக்குப் பை கட்டி அதில் வைக்கோல் புல்லை லோடு செய்திருப்பார்கள். அங்கு ஒரு இரும்பு வாளியும் தொங்கும்! வீட்டில் நம்மை இறக்கிவிட்ட பின்பு கொஞ்சம் குதிரைக்கு தண்ணீர் கிடைக்குமான்னு பணிவா கேட்பாங்க அதுக்குதான் அந்த இரும்பு வாளி!

மனுசன் குடிக்கிற தண்ணியே காசுக்கு விற்குற காலம் இது! ஆனா அன்னிக்கு குதிரைக்கெல்லாம் தண்ணி தரும் அளவு நம்மிடம் நிறைய தண்ணீர் வசதியும் இருந்தது நல்ல மனசும் இருந்துச்சு! குதிரைகளை சாட்டையால் அடிச்சா கூட பாவம் அடிக்காதிங்கனு அன்பு காட்டின நம்ம மக்கள் இன்னிக்கு நடுரோட்டில் மனுசனை அடிச்சாகூட நின்னு மொபைலில் படம் எடுத்துகிட்டு இருக்காங்க! எங்க போச்சு அந்த மனித நேயம்?! ஆச்சரியமா இருக்கு! 

மக்கள் விலங்குகளை தம்முடனே வளர்த்த போது இருந்த அன்பும், அக்கறையும் இந்த அறிவியல் காலத்துல குறைஞ்சிருக்கு! குதிரை வண்டி, மாட்டு வண்டி எல்லாம் காலத்தால் அழியாதவை? இன்னும் தமிழ்நாட்டில் குதிரை வண்டிகள் பயன்பாட்டில் இருக்குற ஊரு பழனி! இன்றும் அங்க குதிரை வண்டி ஸ்டாண்ட் கூட பார்க்கலாம்! என்ன தான் வழக்கொழிஞ்ச விஷயம்னு இருந்தாலும் சில சாகாவரம் பெற்ற விஷயங்களும் இருக்குன்னு சொல்லுவாங்க..

ஆமா! அதில் இந்தக் குதிரை வண்டியும் ஒண்ணு 🐴