🍋 லெமன் ட்ரீ 🍋

#லெமன்_ட்ரீ 

கடந்த வாரம் ஈரோட்டில் 4  நாட்கள் தங்கியிருந்தேன். Lemon tree ஓட்டலில் அறைகள் முன்பதிவு செய்திருந்தனர். ஈரோடு பஸ் ஸ்டாண்ட் அருகிலுள்ள பழைய லீ ஜார்டியன் தான் இப்போது Lemon tree ஆக மாறியிருக்கிறது. ஏற்கனவே லீ ஜார்டியனில் பல முறை தங்கியுள்ளேன். ஆஹா.. ஓஹோனு..

சொல்லமுடியாவிட்டாலும் பெரும் குறைகள் ஏதும் இல்லை.

இப்போ அது தான் Lemon tree ஆக மாறியிருக்கிறது. காரில் வந்து இறங்கும் போது ஓட்டலின் அதே பழைய வெளித் தோற்றம் தென்பட்டது சரி, பேரில் மட்டும் தான் மாற்றம் என்றெண்ணி உள்ளே நுழைந்து அசந்து போனேன். வெளியே தான் மாற்றங்கள் ஏதுமில்லை ஆனால் ஓட்டலின் உள்ளே 100% கச்சிதமாக அழகாக மாற்றியிருந்தனர். 

சமீபத்தில் ஜெய்ப்பூர், மும்பை, ஹைதராபாத் போன்ற பெரு நகரங்களில் 5 நட்சத்திர ஓட்டல்களில் தங்க வாய்ப்பு கிடைத்தது. கிட்டத்தட்ட அதே போன்ற அறை அமைப்பு, குளியலறை, படுக்கைகள், இதர வசதிகள் என்னை ஆச்சரியப்படுத்தின. அறைகள் வெகு சுத்தமாக இருந்தன, டவல்கள், தலையணை, படுக்கை விரிப்புகளும் முதல் தரம்! 

துல்லியமான ஏசி, டிவி, வைஃபை கனெக்‌ஷன் எல்லாமே கனக் கச்சிதம். நான் ஜெய்ப்பூரில் தங்கியிருந்த அதே சொகுசு அறையின் மினியேச்சராக இந்த அறையிருந்தது. ஜெய்ப்பூர் ஹோட்டலில் அறையின் ஒரு நாள் வாடகை 30000 ரூபாய் ஜெய்ப்பூருக்கு க்ரூப்பாக நாங்கள் போனதால் இந்த வாடகை தனியாக என்றால் அதன் வாடகை இன்னும் ஒரு மடங்கு.

ஈரோட்டில் வாடகை ₹3000/- +tax மட்டுமே. இங்கு 24 மணி நேர செக்கவுட். ஆனால் ஜெய்ப்பூரில் செக்கவுட் 12 மணி நேரம் மட்டுமே. இந்த 3000 ரூபாய்க்கு காம்ப்ளிமெண்ட் ப்ரேக் ஃபாஸ்டும் உண்டு என்றனர். ஏதோ இட்லி, பொங்கல், உப்புமா, வடை, காபி என நான்கைந்து உணவுகள் தான் தருவார்கள் என நினைத்து உணவகத்தில் நுழைந்தேன்.

வாவ்! தினமும் 3 வகையான ஜூஸ், 3 வகையான மில்க் ஷேக், பல வகையான பழங்கள், பிரெட், பட்டர், ஜாம், கேக், டோநட்ஸ், ஆம்லெட், சிக்கன்/ மீன் சாஸ், பொங்கல், இரு வகை இட்லி, பொடி & நெய், வடை, பொங்கல், பூரி மசால், கிச்சடி, பேன் கேக் & சோயா சாஸ், அவித்த முட்டை, டீ, காபி என அமர்க்களமான மெனு! சூடாக தோசையும் தருகிறார்கள்.

தோசையில் மசாலா, பொடி, ஆனியன் & முட்டை தோசை வகைகள் நாம் கேட்க கேட்க சூடாக வார்த்து பரிமாறுகின்றனர் அன்றைய ஸ்பெஷலில் கிச்சடி, உப்புமா, கோதுமை உப்புமா என மெனுக்கள் மாறுகின்றன. பூரி/சோலா பூரியும் அப்படித் தான் நாம் கேட்டதும் சூடாக வருகிறது. ஆம்லெட், முட்டை பொரியல்னு எது கேட்டாலும் சூடாக செய்து தருகின்றனர். 

சட்னி வகைகளில் தேங்காய் சட்னியுடன், காரச்சட்னி, புதினா சட்னி, கடலை சட்னி என்று ஏதாவது ஒரு சட்னி தினம் தினம் மாறுகிறது. சாம்பார் தான் இங்கே அல்டிமேட்! என் அப்பா சொன்ன அதே சாம்பார் வைக்கும் முறை! யாருங்க இங்கே செஃப்னு கேட்டதும், இருங்க வரச் சொல்றேன் என்றனர். வந்த செஃப்பை பார்த்து வியந்து போனேன். செஃப் முரளி! 

எனக்கு முன்பே பரிச்சயமானவர். அய்யா அப்துல்கலாமிடம் பணி புரிந்தவர். சிங்கப்பூர், துபாய்,ஜெர்மன் உட்பட பல நாடுகளில் பணியாற்றியவர். அட நீங்களா என என்னை அடையாளம் கண்டு கொண்டார். அங்கு பரிமாறிய உணவுகளைப் பற்றி பாராட்டினேன். தன்னடக்கமாக ஏற்றார். இங்கே வேறென்ன ஸ்பெஷலா இருக்குன்னு கேட்டேன்.

உங்களுக்கு என்ன வேணும்னு கேட்டார். உங்க ஸ்பெஷல் என்னன்னு பந்தை அவரிடமே திருப்பினேன், சின்ன வெங்காயம், வர மிளகாய் போட்ட மட்டன் குழம்பும், கறிவேப்பிலை மசாலா போட்ட மாஷா ஃபிஷ் வருவல் இரண்டும் தான் என்றார். என்னிடம் இன்னும் இரண்டு கட்டை விரல் இருந்தால் அதிலும் டன் என்றிருப்பேன். டன் என்றேன்.

மதியம் 1 மணி சாப்பாட்டு மேசையில் ஆவி பறக்க வெள்ளை சோறும், மட்டன் குழம்பும் முதலில் வந்தது. ஈரோட்டில் வைத்த அந்தக் குழம்பின் மணத்தை அதே நேரத்தில் கரூரிலுள்ள மக்களும் நுகர்ந்திருப்பார்கள் என்று சத்தியமே செய்வேன். கறிக் குழம்பின் மணம் அத்தனை ரம்யமாக மட்டுமின்றி ஜின்னியம், விஸ்கியம், பிராந்தியமாக மண மணத்தது.

முழுதாக போட்ட சின்ன வெங்காயம் கரும் திராட்சைகளாக ஜொலிக்க வர மிளகாயின் சாறு இறங்கி காரமாக கறிச் சோறுன்னா குழம்பு இப்படித்தாண்டா இருக்கணும் என்று சூளுரைத்தது. கறி வெந்த பக்குவம் தான் இங்கே அடுத்த ஹைலைட்! இளநீரில் வழவழப்பான தேங்காய் சாப்பிட்டு இருக்கிறீர்களல்லவா அதே போல மென்மையாக இருந்தது.

குழம்பினுள் கரண்டியால் கலக்கினால் கறி கரைந்து விடும் என்றால் உடனே நம்பலாம். அத்தனை அற்புதப் பக்குவம். கறி வேப்பிலை மீன் ரோஸ்ட் இன்னுமொரு அட்டகாசம்! அதை தட்டுவடை தடிமனில் பொரித்துத் தந்திருந்தார். மொறு மொறுனு நல்ல ருசியில் வித்யாசமாக இருந்தது. அடுத்த 2 நாட்களும் சிக்கன், சில்லி மீன், வறுத்த கறின்னு மெனுக்கள்.

இதே தரத்தில் அறைகளின் பராமரிப்பும், சமையல் பக்குவமும்  இதே சுவையும் நீடித்தால் ஈரோட்டின் சிறந்த தங்கும் & சாப்பிடும் ஓட்டல்களில் தனியிடம் பிடிக்கும் ஓட்டல் Lemon tree செஃப் முரளியின் எண் தந்திருக்கேன் அவரிடம் உங்கள் தேவையை முன்கூட்டியே கேட்டு ஆர்டர் செய்து நேரில் போய் அந்த ஆம்பியன்ஸில் அனுபவித்து சாப்பிட்டு மகிழுங்கள்.

ஈரோட்டில் வணிகம் / தொழில் நிமித்தமாக அடிக்கடி பயணிப்பவர்களுக்கு நிச்சயம் நல்ல அனுபவத்தை தரும். மொத்தமாக விழாக்கள், விசேஷங்கள் என்றால் அறை வாடகையில் சலுகைகளோடு கிடைக்கும். பழைய லீ ஜார்டியன் வாடிக்கையாளர்களுக்கும் இது புது அனுபவமாக இருக்கும். நன்றி முரளி ஸார் & நன்றி Lemon Tree Team..

‘பந்த்’தம் {சச்சின் = ரிஷப்} 🏏

3வது டெஸ்டின் நான்காவது இன்னிங்ஸில் 192 ரன்களை சேஸ் செய்ய முடியாமல் ஆல் அவுட்டான இந்திய அணி அடுத்த வாரமே 4வது டெஸ்டின் நான்காவது இன்னிங்ஸில் 313 ரன்களை சேஸ் செய்து 400+ ஸ்கோரை அடித்தது அதுவும் வெறும் 4 விக்கெட் இழப்பில் இதற்கு யார் காரணம்?

ராகுல், கில் துவங்கி ஜடேஜா & சுந்தர் இந்த நால்வரின் அபார ஆட்டம் தான் காரணம் என உலகமே பாராட்டி எழுதினாலும் மூன்றாவது மேட்சில் நடக்காத அந்த அதிசயம் நான்காவது மேட்சில் நடந்தது எப்படி? எப்படி இது சாத்தியமானது? இந்த உத்வேகத்திற்கு காரணம் ஒருவரே! அவர் தான் ரிஷப் பந்த்!

ஆம்! ரிஷப் ஒரு காட்டாறு, யாருக்காகவும் தன்னியல்பை மாற்றிக் கொள்ளாத குணம் கொண்டவர். கடந்த ஆஸ்திரேலிய சுற்றுப் பயணத்தில் கவாஸ்கர் ரிஷப் அடித்து ஆடிய ஷாட்டை முட்டாள்தனமான ஷாட், இவன் ஒரு முட்டாள் என்று கமெண்ட்டரி பாக்ஸிலிருந்து ஆவேசமாகத் திட்டினர்.

அதே கவாஸ்கர் இந்த இங்கிலாந்து தொடரின் முதல் டெஸ்டில் ரிஷப் செஞ்சுரி அடித்ததும் அவரை பல்டியடித்து கொண்டாடக் கேட்டுக் கொண்டார். அதுதான் ரிஷப் பந்த்! யார் என்ன சொன்னாலும் அவர் அவரது பாணியில் தான் ஆடுவார். இந்த இங்கிலாந்து தொடரின் ஆரம்பம் முதல் அதிரடி தான்.

முதல் டெஸ்டின் 2 இன்னிங்ஸிலும் சதம், இரண்டாவது மூன்றாவது நான்காவது டெஸ்டுகளில் 3 அரை சதங்கள் என இவர் ஆடிய ஆட்டம் மொத்த அணிக்கும் டன் கணக்கான பூஸ்ட் போல. 4வது டெஸ்டில் கால் விரலில் ரத்தம் வடிய வெளியேறியவர், திரும்பி வந்து அரைசதம் அடிப்பார்.

பாகிஸ்தானில் சச்சின் அறிமுகமான தொடரின் 4வது டெஸ்ட் எதிர் முனையில் இருந்த நவ்ஜோத் சித்து அன்று நடந்ததை சொல்வார். நாங்கள் சோர்ந்து போயிருந்தோம் பாக் வீரர்கள் பேய்த்தனமாக பந்துவீசிக் கொண்டிருந்தனர். நான் மட்டுமே அன்று தாக்குப்பிடித்து ஆடிக்கொண்டிருந்தேன்.

சீக்கிரம் மற்ற வீரர்கள் அவுட்டானால் எனக்கு கெட்டப் பெயர் வராமல் பெவிலியன் திரும்பலாம் என்று எண்ணியிருந்த போது சச்சின் என்னும் பாலகன் இறங்கினான். எனக்கு ஒரு கணம் பதைபதைத்தது இந்த பேய் வேகத்தை இவன் தாக்குப் பிடிப்பானா என்று, வக்கார்யூனுஸ் பந்து வீச வருகிறார்.

அவரது 2வது புயல் பந்து சச்சினின் பேட்டில் பட்டு அவர் மூக்கை உடைக்கிறது. அப்படியே தக்காளி மூட்டை போல சரிகிறான். சட்டை எல்லாம் ரத்தக்களரி, அவன் மூக்கே இடம் மாறிப் போயிருந்தது. நானும் அணியின் பிஸியோ அலி இரானியும் நடுக்கத்துடன் ஓடிப் போய் சச்சினை பார்க்கிறோம்.

ஐயோ ஏதும் பிரச்சனை ஆகிவிடப் போகிறது இந்தச் சிறுவனை உள்ளே தூக்கிச் சென்றுவிடலாம் என்கிறார் இரானி, அப்போது கீழேயிருந்து பின்னாளில் உலகப் புகழ் பெற்ற அந்த மெல்லிய குரல் “ மெய்ன் கேலேகா” (நான் ஆடுகிறேன்) நானும் இரானியும் பிரமித்துப் போனோம்.

ஒரு 16வயது பாலகன் தன்னுடைய அணிக்காக இப்படி அடிபட்ட நிலையிலும் அணிக்காக ஆட நினைக்கிறான். ஆனால் நான் சீக்கிரம் ஆட்டத்தை முடிக்கலாமென சுயநலமாக இருந்தேனே என்று வெட்கி தலை குனிந்தேன். பின்பு அடுத்த பந்தையே பவுண்டரிக்கு விரட்டினார் சச்சின்.

எனக்குள்ளும் ஒரு உற்சாகம் பிறக்க அவரோடு இணைந்து போராட முடிவு செய்தேன். அன்று நமது சச்சின் எடுத்தது 57 ரன்கள். அவரைப் பார்த்து நான் எடுத்தது 97 ரன்கள். இதே தான் 4வது டெஸ்டிலும் நடந்தது. கால் விரலில் அடிப்பட்டு திரும்ப வந்து ஆடிய ரிஷப்பின் ஆட்டம் நமது அணிக்கு..

சிறப்பானதொரு உத்வேகத்தை தந்தது. இவன் இப்படி ஆடும் போது நாமும் ஏதாவது செய்தாக வேண்டுமே என அணியின் ஒவ்வொருவரையும் நினைக்கத்துண்டியது. இதுவே 3வது டெஸ்டிற்கும் 4வது டெஸ்டிற்கும் இருந்த வித்யாசம். அணி ஒருங்கிணைந்து ஆட காரணம் ரிஷப்பின் ஆட்டமே எனலாம்.

ரிஷப்பின் பாணி படு க்ளாஸிக்கான டெஸ்ட் ஆட்டம் அல்ல. அது சுழன்றடிக்கும் சூறாவளி போன்றது. அவர் கவர் டிரைவ், ஸ்கொயர் கட், ஆன் டிரைவ் போன்ற பாரம்பரிய கிரிக்கெட் ஷாட்டுகளை அதிகம் ஆட மாட்டார் ஒற்றைக் கை லாஃப்டுகள், படுத்து உருண்ட ஃபிளிக், ஃப்ளையிங் பேட் என அவரது..

கிரிக்கெட் புதிய புதிய பல ஷாட்டுகளை கொண்டது. இப்படி எல்லாம் கிரிக்கெட் ஆட முடியுமா என வியக்க வைப்பவர். ரிஷப் நிதானமாக ஆடத் துவங்கிவிட்டால் அவராக தவறு செய்தால் மட்டுமே அவுட்டாவார். இல்லாவிட்டால் மனுஷன் எதிரணிகளை கதிகலங்க வைத்துவிடுவார்.

இந்த ‘பந்த்’தம் நம் அணியில் இருக்கும் வரை பெருமையே..

🛩️களிமண் விமானம்

#டெரகோட்டா_ஜம்போ_ஜெட்

நமது ஐ.நா. புகழ் இளம் விஞ்ஞானி செல்லத்துரையின் கண்டுபிடிப்புகள் உலகெங்கும் பரவலாகி வருவது மட்டுமின்றி தற்போது உலகளாவிய கவனம் பெற்று வருகின்றன!

அகமதாபாத் விமான விபத்தில் மனம் நொறுங்கிப் போன செல்லத்துரை இந்த உலகில் கடைசியாக நொறுங்கியது தன்மனமாகவே இருக்கட்டும் என்று தன்மானத்துடன் உறுதி பூண்டு.. இஞ்சி, சீரகம், மல்லி, கடுகு, உளுந்து மிளகு என மேலும் பல பூண்டு கண்டுபிடித்ததே இந்த “டெரகோட்டா ஜம்போ ஜெட் விமான மாடலாகும்”! இந்த விமானம் முழுக்க சுட்ட களிமண்ணால் செய்வதால் அதிக எடை இருக்காது.

மலை உடும்பு, பச்சோந்தி ஆகியவற்றின் எச்சில், அமேசான் காடுகளில் வாழும் பசைத் தவளைகளின் தோலில் சுரக்கும் பசை போன்ற திரவம் அனைத்தையும் ஃபெவிகாலோடு கலந்து அதில் மரப்பிசின் & மைதா மாவு எல்லாம் சேர்த்து ஒரு அற்புத பெயிண்ட்டை கண்டுபிடித்துள்ளார்! அதைத் தான் இந்த விமானத்தின் மீது பூசவுள்ளார். ஆகவே இந்த விமானம் மிக உறுதியாக இருக்கும், தரையில் விழுந்தாலும் நொறுங்காது.

ஒரு வேளை விமானம் வீடுகள் மீது விழும் அபாயம் ஏற்பட்டால் இந்த விமானம் அந்தக் கட்டிடத்தின் மீது விழாது! மாறாக அந்த கட்டிடச் சுவரில் உடும்பு போல கப்பென்று இறுகப் பிடித்துக் கொள்ளும். மேலும் சுட்ட மண்ணால் செய்யப்பட்டதால் இந்த விமானம் தீப்பிடிக்கவே பிடிக்காது. விமானத்தின் உட்புறம் பானைத் தண்ணீர் போல எப்போது ஜில்லென்று இருக்கும்! இப்படி ஒரே கல்லில் சாரி மண்ணில் பல மாங்காய்கள்!

செல்லத்துரையை இப்போது தங்கள் நாட்டில் குடியேறச் சொல்ல அமெரிக்காவும், ரஷ்யாவும் ரூம் போட்டு பல ஐடியாக்களை யோசித்து வரும் வேளையில், ஜெர்மன் உள்ளிட்ட ஐரோப்பிய நாடுகள் இதற்காக 50 செவன் ஸ்டார் ஓட்டல்களையே கட்டி யோசிக்கவுள்ளது. ஈரானிடம் முகத்தில் பூரான் வாங்கியதால் இஸ்ரேல் இந்தப் போட்டியிலிருந்து விலகிவிட்டதாம். சீனாவும், ஶ்ரீஸ்தானும் பயத்திலுள்ளன!

இந்த நிலையில் இந்த விமானத்திற்கு “புஷ்பக விமானம்” அல்லது ஶ்ரீராம்தூத் என்னும் பெயரை சூட்ட வேண்டும் என்று உத்திரகாசியிலுள்ள பல மடச் சாமியார்கள் வேண்டுகோள் விடுத்துள்ளனர். சிறு வயதில் மண்ணை அள்ளித் தின்றவர் குழந்தை கிருஷ்ணரே ஆகவே மண்ணால் செய்த இந்த விமானத்திற்கு மதுபாலகிருஷ்ணா என்று பெயர் சூட்ட மதுராவை சேர்ந்த மடச்சாமியார் மல்ஹோத்ரா கூவியுள்ளார்.

விஞ்சாணி செல்லத்துரையின் செல் சுவிட்ச் ஆஃப் செய்யப்பட்டு இருப்பதால் அவரது கருத்தை இன்னும் அறிய முடியவில்லை. உடனுக்குடன் செய்திகளை அறிந்து கொள்ள இந்த பக்கத்திலேயே குத்த வைத்து காத்திருங்கள்…

‘சைடு அயர்ன்’ சானலுக்காக சேலத்தில் இருந்து “சரடு சரவணன்”

🎶 மலேசியா வாசுதேவன்

#வா_வா_வாசுந்தமே

இளையராஜாவின் இன்னொரு யுனிக் அறிமுகம் ‘மலேசியா வாசுதேவன்’ ஆரம்ப காலத்தில் கமலுக்கு எஸ்பிபி.. ரஜினிக்கு மலேசியா என்பது ராஜா ஃபார்முலா. அப்படியும் கமலுக்கும் அவர் நிறைய ஹிட் பாடல்களை பாடியிருப்பார். மலேசியாவின் முதல் சூப்பர் டூப்பர் ஹிட் 16 வயதினிலே படத்தில் வரும்..

‘ஆட்டுக்குட்டி முட்டையிட்டு” பாடல் அந்தப் படம் வெளிவந்து 25 ஆண்டுகள் கழித்தும் கூட பல நிகழ்ச்சிகளில் அவரது ரசிகர்கள் விரும்பிக் கேட்ட பாடல் அது! மலேசியாவின் மானசீக குரு சிதம்பரம் சி.எஸ்.ஜெயராமன் அவரது குரலில் மலேசியாவும் நன்கு பாடுவார். முதன் முதலில் மணிப்பூர் மாமியார் படத்தில் ‘ஆனந்தத் தேன் காற்று தாலாட்டுதே’ என்னும் பாடலும்..

அதன் பின் ‘இன்று போய் நாளை வா’ படத்தில் ‘மதனமோக ரூபசுந்தரி’ பாடலும், திறமை படத்தில் ‘இந்த அழகு தீபம் ஒளி வீசும் பொழுதினில்’ கன்னிராசியில் ஜனகராஜிற்காக ‘சுகராகாமே’ புதுப்புது அர்த்தங்களில் ‘கல்யாண மாலை கொண்டாடும் பெண்ணே’ (கல்யாண மாலை முழுப் பாடலைப் பாடியவர் எஸ்.பி.பி ஆனால் மலேசியா சி.எஸ்.ஜெ குரலில் பாடிய ஒரு சின்ன பிட் இப்போதும் யூடியூபில் இருக்கிறது)

இவையெல்லாம் அவர் சி.எஸ்.ஜெ குரலில் பாடிய ஹிட் பாடல்கள்! ஹிட்லர் உமாநாத் படத்தில் சுருளிராஜனின் டிட்டோ குரலில் பாடியிருப்பார். ரோசாப்பூ ரவிக்கைக்காரி படத்தில் அவர் வித்யாசமான குரலில் வெத்தலை வெத்தலை வெத்தலையோ பாடலை பாடியிருப்பார் ஆரம்ப காலங்களில் அவருக்கு மெலடி வராது என்பவர்கள்

‘அள்ளித்தந்த பூமி அன்னை அல்லவா’ (நண்டு) கோடை கால காற்றே(பன்னீர் புஷ்பங்கள்) பாடலைக் கேட்டால் சொன்னதை வாபஸ் வாங்கிக் கொள்வார்கள். புத்தாண்டுக்கு கமலுக்கு எஸ்பிபி பாடிய ‘இளமை இதோ இதோ’ போல ரஜினிக்கு இவர் பாடிய ஜல்லிக்கட்டுக்கும், அரசியல் தலைவர்களுக்குமான ‘பொதுவாக என் மனசுத் தங்கம்’ ஒரு சூப்பர் டூப்பர் ஹிட்!

இன்றும் எல்லா ஊர் ஜல்லிக்கட்டிலும் ஒலிக்கும் பாடல்! பார்ட்டி சாங் லிஸ்டில் இன்றளவும் இடம் பெற்றுள்ள ‘ஆசை நூறு வகை’ மலேசியாவின் எவர்க்ரீன் ஹிட்டாகும். ‘என்னோட ராசி நல்ல ராசி’, மனிதன் மனிதன், நாட்டுக்குள்ள நம்மைப் பத்தி கேட்டுப் பாருங்க, ஒத்தடி ஒத்தடி ஓரமா, வாங்கடா வாங்க என் வண்டிக்கு பின்னாலே, போன்றவை குறிப்பிடத் தகுந்தவை.

கமலுக்கு ‘இந்த மின்மினிக்கு கண்ணில் ஒரு மின்னல் வந்தது’ கட்டவண்டி கட்டவண்டி’ நிலா காயுது’ பேர் வச்சாலும் வைக்காம போனாலும் மல்லிவாசம்’ எல்லாம் க்ளாஸ்! பொத்து கிட்டு ஊத்துதடி வானம் பாயும்புலி படத்தில் இடம் பெற்ற அட்டகாசமான மழைப் பாடல் பி.சுசீலாவுடன் சேர்ந்து பாடினார். இவர்கள் இருவரும் இணைந்து அதிகப் பாடல்கள் பாடவில்லை

தர்மயுத்தத்தில் ‘ஆகாய கங்கை & ஒரு தங்கரதத்தில் பாடலும் புதுக்கவிதையில் வா வா வசந்தமே பாடலும் எங்கேயோ கேட்ட குரலில் ‘பட்டு வண்ண சேலைக்காரி’ போன்றவை என்றும் ரஜினியின் இனியவை! பாக்கியராஜிற்கு ‘வான் மேகங்களே, பட்டு வண்ண ரோசாவாம், காதல் வைபோகமே, டாடி டாடி எண்ணியிருந்தது ஈடேற, தங்கச் சங்கிலி மின்னும் பைங்கிளி..

வெள்ளமனம் உள்ள மச்சான், வா..வா வாத்தியாரே வா’ என ஏராளமான ஹிட்ஸ் பாடியிருக்கிறார். கேப்டனுக்கு தான் எத்தனை எத்தனை ஹிட் பாடல்கள்! சிட்டுக்குருவி தொட்டுத் தழுவி, தில்லாடாங்கு டாங்கு, ‘ஏத்தமய்யா ஏத்தம், ஒரு மூணு முடிச்சால, சுட்டி சுட்டி உன் வாலை, மஞ்சள் பூசும் மஞ்சள் பூசும், பாவம் ஒரு பக்கம் பழி ஒருபக்கம், தக்காளி பழம் போல..

‘சந்தைக்கடை செல்லாயி, இவன் வீரன் சூரன் சமீபத்து லப்பர் பந்தில் ஹிட்டடித்த நீ பொட்டு வச்ச தங்கக்குடம் (மனோவுடன்) வரை இந்த லிஸ்ட் பெரியது! சத்யராஜுக்கு பாடிய உன்னைப் பார்த்த நேரத்திலே, வேலை வந்து ஒருவனிங்கே, சும்மா தொடவும் மாட்டேன், குத்தாலக் குயிலே, தய்யர தய்யாரேன்னு லிஸ்ட்!பிரபுவுக்கு ‘பூவே இளையபூவே, மலையோரம் மயிலே..

சீவி சிணுக்கெடுத்து, அடி படகோட்டும் பட்டம்மா, நன்றி உனக்குச் சொல்ல வார்த்தை இல்லை மாரியே, மாலையிட்ட பொண்ணு ஒண்ணு, (பாண்டித்துரை) இதயமே நாளும் நாளும் காதல் (அடுத்தாத்து ஆல்பர்ட்) என அனைத்துமே கிளாஸிக் ரகங்கள்! கார்த்திக்கிற்கு ‘கன்னிப் பொண்ணு கைமேல, ‘இளம் வயசு பொண்ணை வசியம் பண்ணும்’..

கட்டி வச்சுக்கோ எந்தன் அன்பு மனசை’ பல்லாக்கு குதிரையில பவனி வரும் மீனாட்சி, ‘எடுத்துவிட்டேன் தொடுத்துவிட்டேன் எங்க ஊரு தெம்மாங்கு. குயிலுக்கொரு நிறமிருக்கா’ போன்ற பல ஹிட் பாடல்களை பாடியிருப்பது ஓர் ஆச்சரியம்! மைக் மோகனுக்கு கூட ‘ஏம்மா அந்தி மயக்கமா, சிங்கின்னா சிங்கியடி, தேவதாசும் நானும் என ஒரு பட்டியல் உள்ளது!

பாண்டியனுக்கு ஆண்பாவத்தில் குயிலே குயிலே பூங்குயிலே, மண்வாசனையில் அரிசி குத்தும் அக்கா மகளே, ஆனந்த தேன் சிந்தும் பூஞ்சோலையில்! அடடா.! ராமராஜனுக்கு இவர் நிறைய பாடி இருந்தாலும் கரகாட்டக்காரனில் வரும் “மாரியம்மா மாரியம்மா”பாடலே தமிழக திருவிழாக்களின் தேசிய கீதம்!

திரை உலகில் பிற்காலத்து சிவாஜிக்கு மலேசியா குரல் அப்படியே பக்காவாக செட்டானது ஒரு விந்தை தான்! முதல் மரியாதை பாடல்கள் எல்லாம் க்ளாசிக், நல்லா பாடியிருக்கேடா வாசு என்ற சிவாஜியின் பாராட்டு தனக்கு கிடைத்த தேசிய விருது என்பார். ஆனால் ராஜரிஷி படத்தில் வரும் சங்கரா சிவ சங்கரா” அப்படியே சங்கீத ஜாதி முல்லை போல இருக்கும்.

பாடுவதற்கு மிகக் கடினமான பாடல். அதை மிக அநாசயமாக பாடியிருப்பார் வாசு! இந்தப் பாடல் பாடியதற்கு இவருக்கு தேசிய விருதே வழங்கியிருக்கலாம் என்று எஸ்.பி.பி. ஒரு டிவி நிகழ்ச்சியில் சொல்லியிருக்கிறார். (அந்தப் பாடலின் லிங்க் கீழே கமெண்ட்டில்👇🏿)ரஜினிக்கு ஓபனிங் சாங் என்னும் சூப்பர் ஸ்டார் இமேஜிற்கு கதைகள் வந்ததும் பாடல்கள் எல்லாம்..

எஸ்.பி.பிக்கே சென்றது. நீண்ட நாளைக்கு பிறகு ரஜினியை சந்தித்த வாசுதேவன் என்ன சார் சிவாஜிக்கு பாடுறேன் சிவாஜி ராவுக்கு பாடி வெகுநாட்களாகி விட்டது என வேடிக்கையாக சொல்ல, உடனே அவருக்கு தந்த வாய்ப்பு தான் அதிசயப்பிறவி படம் படத்தின் அனைத்து பாடல்களும் மலேசியா தான்.

முன்பே தன் சொந்தப்படமான மாவீரனிலும் மலேசியாவிற்கு தான் வாய்ப்பளித்தார் ரஜினி! சிவாஜிக்கு தனியாக பாடுவதற்கு முன்பே பாரதவிலாஸ் படத்தில் வரும் இந்திய நாடு என்வீடு பாடலின் அந்த பஞ்சாபி பாடும் பாடல் வரிகளை பாடியவர் மலேசியா. சில படங்களுக்கு இசையும் அமைத்திருக்கிறார்.!

ரஹ்மான் இசையில் அதிகம் பாடவில்லை என்றாலும் இவர் பாடிய மோனலிசா (Mr.Romeo) ஒரு க்ளாஸ். பகல் நிலவு படத்தில் வரும் ‘எப்போது பார்த்த புள்ள இப்ப அடையாளம் தெரியவில்ல’ பாடலிலும் கருத்தம்மாவில் காடு பொட்டக்காடு’ இந்த இரண்டு பாடலிலும் மலேசியா உச்சஸ்தாயியில் தன் குரலை எடுக்கும் அழகே அவ்வளவு இனிமையாக இருக்கும்.

மிக அற்புதமான கலைஞர் எனக்குப் பிடித்த பாடகர்! அவரது 50 பாடல்களின் தொகுப்பு கீழே லிங்க்கில்👇🏿

🏆 தெம்பா பவுமா

🏆கருப்பசாமிக்காக காத்திருந்த கப்” 🏆

தென் ஆப்பிரிக்காவின் கேப்டவுன் நகரத்திலிருந்து லங்கா எனும் புறநகர்ப் பகுதி ஏழை கறுப்பின மக்கள் வாழும் பகுதி. கேப்டவுனிலேயே பணிபுரிந்தாலும் கறுப்பின மக்களுக்கு அங்கே தங்க அனுமதியில்லை! காரணம் நிறவெறி! அங்கு ஒரு சராசரி குடும்பத்தில் பிறக்கிறது ஓர் ஆண் குழந்தை.

சராசரி உயரம் கூட இல்லாத குள்ளமான உருவம். நிறம் கருப்பென்றாலே எள்ளி நகையாடும் வெள்ளையின ஆப்பிரிக்க மக்கள் அந்தக் கறுப்பின சிறுவனுக்கு அள்ளி அள்ளி வழங்கியது கேலி, கிண்டல்களைத் தான். ஆனால் அச்சிறுவனின் கவனம் முழுவதும் கிரிக்கெட்டில் இருந்தது.

அவன் தன்மீது வந்த கிண்டல்களுக்கு தன் காதுகளைக் கொடுக்கவில்லை. தன் கண் பார்வையை பந்துகளின் மீது கொடுத்தான்! அவன் அடித்த பந்துகள் கண்ணாடிக் கூரைகள் பலவற்றை உடைத்திருக்கிறது! அக்கூரைகளை மட்டுமின்றி மட்டுமல்ல நிறவெறி, அடக்குமுறை, இடஒதுக்கீடு என..

சமத்துவத்திற்கு தடையாக உள்ள எல்லாத் தடைகளையும் பின்னாளில் நொறுக்கும் என்பதற்கான முன்னுரையே அது. ஆம்! உலகக் கிரிக்கெட்டில் கடந்த 100 ஆண்டுகளாக எந்த அணித் தலைவனும் செய்யாத சாதனையை செய்து காட்டி இருக்கிறான் கருப்பின மக்களின் நட்சத்திரம் தெம்பா பவுமா!

அதுவும் எப்படி!? தான் தலைமையேற்ற 10 டெஸ்டுகளில் 9இல் வெற்றி 1இல் டிரா என தோல்வியே காணாத கேப்டன் என்னும் அழியாப் புகழோடு இதனை நிகழ்த்தியிருக்கிறான். இந்த சாதனைக்கு அவ்வளவு எளிதாக வந்ததல்ல. ஏளனக் கற்கள், கிண்டல் சொற்கள், என பவுமா மீது விழுந்த..

அத்தனை கற்களையும் எடுத்து அவன் கட்டிய வெற்றிக் கோட்டை இது! பவுமாவின் இடத்தில் இருந்து இதை நிச்சயம் இன்னொருவர் நினைத்து கூட பார்த்திருக்க முடியாது! அணியில் 2014 இல் அறிமுகமான பவுமா சந்தித்த அளவு காயங்கள் எந்த ஆட்டக்காரரும் சந்தித்திருக்க முடியாது. 

செஞ்சுரிக்கு டெண்டுல்கர் போல இஞ்சுரிக்கு பவுமா!  ஒரு முழுத் தொடரும் பவுமா விளையாடியது கிடையாது 80 சதவீத தொடர்களில் அவர் காயம்பட்டு விலகிடுவார். ஒரு கட்டத்தில் பவுமாவை உடல் தகுதி காரணம் காட்டியே அவரை ஒதுக்கி வைத்திருந்தனர். IPL வாய்ப்புகளும் வரவில்லை.

ஏன் தெ.ஆவில் நடக்கும் T20 அணியில் கூட தாமதமாகத் தான் இடம் கிடைத்தது. ஆனால் கேலிக்குரிய கேள்விகளுக்கு பவுமாவின் பேட் பதில் சொன்னது. அறிமுக ஒரு நாள் போட்டியில் அவர் அடித்த சதம் அவரை அணியில் எடுக்க வேண்டிய கட்டாயத்திற்கு தேர்வுக்குழுவை தள்ளியது!

தென்னாப்பிரிக்கா அணியில் இடஒதுக்கீடு முறை உள்ளது. ஆடும் 15 வீரர்களில் 9 பேர் வெள்ளையினத்தவர் மீதி 6 பேர் கலர்டு எனப்படும் கலப்பினத்தவர் அதில் நிச்சயம் 2 கறுப்பின வீரர்கள் இருக்கவேண்டும் என்பது விதி. அந்த விதியை வைத்து தான் அவரை அணியில் சேர்த்தது தேர்வுக்குழு! 

டெஸ்ட் கிரிக்கெட்டில்  இங்கிலாந்துக்கு எதிராக அடித்த சதம், இந்தியாவுக்கு எதிராக எடுத்த சதம் என அவரது மட்டை தொடர்ந்து பேசினாலும் காயங்கள் அவரை அதிகமாக முடக்கிவிட்டது. டெண்டுல்கருக்கு டென்னிஸ் எல்போ காயம் போல ஹாம்ஸ்டிரிங் என்னும் காயம் பவுமாவுக்கு உண்டு. 

அடிக்கடி காயங்களால் உள்ளே வெளியே என்று மங்காத்தா ஆடிக் கொண்டிருந்தது பவுமாவின் கேரியர். குயிண்டன் டி காக் கேப்டன் பதவியில் இருந்து விலகியதும் அணியில் அப்போது இருந்த சூழலில் கேப்டன் பதவியை பல வீரர்கள் ஏற்கத் தயங்க பவுமாவை கேப்டனாக்கியது தேர்வுக்குழு!

அப்படி அவர்கள் வேண்டாத பிள்ளையாக கொடுத்த இந்த காண்டாமிருகப் பதவியை பவுமா பணிவுடன் ஏற்றார். சவுத் ஆப்பிரிக்கா ஆடும் ஃபைனலை சவுதி பாலைவனத்தில் வைத்தால் கூட மழை வரும் என்று உலகமே கேலி பேசிய காலமது. ஆனால் பவுமா வந்த பின்பு அந்த நிலை மாறியது!

ஆடிய டெஸ்டுகளில் எல்லாம் வெற்றியே பரிசாக வந்தது. காலம் இதற்குத் தான் காத்திருந்தது என்பது போல பவுமா சந்தித்ததெல்லாம் வெற்றி. இந்தியா ஆஸ்திரேலியா தொடரில் இந்தியா பரிதாபமாக தோற்றதால் உலக டெஸ்ட் சாம்பியன் இறுதிக்கு தகுதி பெற்றது தென் ஆப்பிரிக்கா.

அவர்கள் சந்திக்க இருந்த எதிரணி ஆஸ்திரேலியா! உலகின் மிகுந்த வலுவான டெஸ்ட் அணி, டெஸ்ட் சாம்பியன் ஆட்டங்களில் அதிக தோல்வியை சந்திக்காத அணி என்றெல்லாம் புகழப்பட்ட அவ்வணிக்கு முன் பவுமாவின் வெற்றிப்பயணம் நிறைவடையும் என உலகம் எதிர்பார்த்தது.

அதன்படியே முதல் இன்னிங்ஸில் 138 ரன்களில் தெ.ஆ ஆட்டமிழக்க, ஆஸ்திரேலிய உதடுகளில் கேலிப் புன்னகை குடியேறி பார்வைகளில் கிண்டல் தெறித்தது. 282 ரன்கள் என்னும் இலக்கை லார்ட்ஸில் யாரும் துரத்தியதில்லை எனும் புள்ளிவிவரம் பயமுறுத்த பவுமா முதலில் துரத்தியது..

அந்த புள்ளி விவரத்தை தான்! தன்னுடைய திட்டங்களால் அணிக்கு தளராத நம்பிக்கையை முதலில் தந்தார். அணியாக இணைந்து ஆடுவதின் அவசியத்தை டிரஸ்சிங் ரூமில் விளக்கினார். இரண்டாவது இன்னிங்ஸிலும் விரைவில் 2 விக்கெட்டுகள் விழுந்தவுடன் மார்க்ரம்முடன் இணைந்தார்.

அவரோடு இணைந்தது ஹாம்ஸ்டிரிங் காயமும். “செய் அல்லது செத்து மடி” என்று சொன்ன மகாத்மா காந்தி வாழ்ந்த தென்னாப்பிரிக்காவில் பிறந்தவர் அல்லவா! அந்த காயத்தோடு நொண்டி, குதித்து, தள்ளாடி, தடுமாறி அணி தள்ளாடாமல் அன்றைய ஆட்டத்தை நிறைவு செய்தார் பவுமா!

மறுநாள் வெற்றிக்கு 69 ரன்களே இருந்தது! சரித்திரத்தின் அந்தப் பொன்னாள் விடிந்தது! அன்றைய தினம் பவுமா ஆட்டமிழந்தாலும் தன் அணிக்கு தன் வார்த்தைகளால் நம்பிக்கை தந்து கொண்டே இருந்தார். இன்னும் சொல்லப் போனால் தோனியை விட கூல் கேப்டன் பவுமா மட்டுமே!

கடந்த ஒரு தொடரில் மைதானத்தில் ஆட்டம் சிறிது நேரம் தடைபட்ட போது அந்த 15 நிமிடத்தில் கிரவுண்டிலேயே தூங்கி எழுந்து ஓய்வு எடுத்தவர் பவுமா! லார்ட்ஸின் அந்தப் புகழ் பெற்ற பால்கனியில் அவர் ஆட்டம் முடியும் வரை அமர்ந்திருந்ததையும் வெற்றிக்கு பின் ஆர்பரிக்காமல்..

உணர்வுப்பூர்வமாக அழாமல் உறுதியான ஒரு வீரன் போல கலங்காமல் நின்றார். லார்ட்ஸின் பால்கனியில் கபில்தேவ் வென்ற உலகக்கோப்பையின் கொண்டாட்டம், கங்கூலி தனது சட்டையைக் கழற்றி சுழட்டிய நாட்வெஸ்ட் கோப்பை கொண்டாட்டம் போன்றவற்றிற்கு ஈடானது அந்தத் தோரணை.

பவுமா அவரது கேரியர் முழுமைக்கும் பட்டிருந்த காயத்திற்கு அருமருந்து அந்தத் தருணம் என்றால் அது பொய்யில்லை! நிறவெறி, ஏளனம், இடஒதுக்கீடு,  எல்லாவற்றிற்கும் தனது தலைமையால் பதில் சொல்லியிருக்கிறார் பவுமா. தனது மகனோடு மகிழ்வுடன் மைதானத்தில் வலம் வந்தார்! 

“மகனே நன்றாகப் பார் கருப்பினத்தில் பிறந்து நிறவெறியால் கொத்திக் குதறப்பட்ட ஒருவன் தான் சோக்கர்ஸ் எனப்பட்ட தன் நாட்டு அணிக்கு முதல் உலகக் கோப்பையை வாங்கித் தந்தான் என்று அறிவிக்கும் செயல் அது. ஆம்  இந்த கருப்ப சாமிக்காக காத்திருந்ததே இந்த கப் என்பது தான் உண்மை! 

நிறைவு 🏆

💋 கடவுளும் கமல்ஹாசனும்

🤴கடவுளும் கமலஹாசனும்💋

கடவுள் : வணக்கம் கமல் நல்லா இருக்கிங்களா?

கமல் : வெல்! நான் நன்றாக இருக்கிறேனா என்பது இங்கு முக்கியமில்லை, இந்த உலகம் நன்றாக இருக்கிறதா என்பதே மிகமுக்கியம். ஒவ்வொரு மனிதனும் தனது சுயபுத்தியோடும் ஆத்ம சுத்தியோடும் தனது செயல்களை பரிசோதனை செய்தாலே எல்லாரும் நன்றாக இருப்பதற்கான விதையை போட்டதற்கு சமம்! அந்த விதையை என்றோ நான் விதைத்திருக்கிறேன், எனது தந்தை விதைத்திருக்கிறார். அந்த விதைகள் விருட்சமாகி நிற்கும் போது நன்றாக இருக்கிறது என்பதை எதிர்கால சந்ததியினர் சொல்வார்கள் அதுபோதும்! அந்த ஒன்றே உலகில் எல்லோரும் நன்றாக இருப்பதற்கு சமம்!

கடவுள் : அடடா! உங்களைப் பத்தி தெரிஞ்சி தான் இந்தக் கேள்வியை கேட்டுட்டு போய் ஒரு ஃபுல் மீல்ஸை பொறுமையா ரசித்து ருசித்து சாப்பிட்டு வந்துட்டேன்! 

கமல் : ஆஹ்.. பொறுமையாய் ரசித்து ருசித்து சாப்பிடத் தெரிந்த உங்களுக்கு ஏன் கேள்விகளால் வேள்விகள் செய்ய முடியவில்லை என்று கேட்க விழைகிறேன். தனி ஒரு மனிதனுக்கு உணவில்லை என்றால் இந்த ஜகத்தை அழித்துவிடுவேன் என்றானே எங்கள் சந்தான பாரதி.. ஆ.. மன்னிக்கவும் மகாகவி பாரதி.. அவனது ரெளத்திர குணம் ஏன் வரவில்..

கடவுள் : கமல் இருங்க.. இருங்க.. இப்படி ஒவ்வொரு முறையும் இடைவெளி விடாம நீங்களே பேசினா நான் எப்போ பேசறது சொல்லுங்க?

கமல் : எந்த இடைவெளி? பொதுவாக இடைவெளி என்பது இந்தப் பிரபஞ்சத்தில் வானுக்கா, பூமிக்கா, கடலுக்கா கிரகங்களுக்கா, நட்சத்திரங்களுக்கா, என்பதே தெரியாமல் நான் எப்படி இந்தக் கேள்விக்கு விடை சொல்…

கடவுள் : அட இருங்க கமல்.. நான் யார்னு நீங்க கேட்கவே இல்லயே! அதைக் கேட்கவே மாட்டிங்களா? 

கமல் : ஹா.. யாரும் யாரையும் யாரென்று கேட்பதன் மூலம் அனைவரும் சமஉரிமைகள் பெற்றவராவோம்.. இருப்பினும் யார் நீ..? அதை உன்னையே கேள் நீஎனச் சொல்லித் தந்தவன் எங்கள் கிரேக்கத்து கிழவன்! அவர் வழி தொடரும் என்போன்றோர்கள் யார் நீ.? நீ யார்? என கணக்கிலடங்கா முறை எங்களையேஅனுதினமும் கேட்டுக் கொண்டுதான் இருக்கிறோம். இதுவரை விடை தெரியாஅக்கேள்விக்கு தெரியாது என ஒரு வரியில் என்னால் நேர்மையாக விடைசொல்ல முடியும் என்றாலும் அவ்வாறு சொல்லாதது என் புத்தியில் மையம் கொண்டுள்ள அறச்சீற்றத்தின் மாண்பாகும்.

கடவுள் : யப்பா கமல் இருப்பா.. நானே சொல்லிடுறேன், நான் தான் கடவுள் அதாவது ஆண்டவன். நீங்க கொஞ்சம் உவமை இல்லாம பேசுனா நல்லா இருக்கும். 

கமல் : (சிரிக்கிறார்) ஓ அப்படி சொல்றிங்களா! அடிக்கடி பாலச்சந்தர் சார் என்கிட்ட இப்படித்தான் சொல்லுவார்! கடவுள் நம்பிக்கை இல்லாத என்னிடமே வந்து நான் கடவுள் என்றால் என்னால சிரிக்காமல் இருக்க முடியலை! சொல்லப் போனால் நானே ஆண்டவர் தான்! ஆனா நான் கடவுள் அல்ல என்பது எந்தக் கொம்பனுக்கும் புரியாது, அது எனக்கு மட்டுமே தெரிந்த விடயம்! வேண்டுமெனில் கடவுள் பாதி மிருகம் பாதி கலந்து செய்த கலவை நான்.. என்றும்  சொல்லலாம்.

கடவுள் : உஸ்ஸ்.. சிரமம் தான்.. நான் சக்தி மிகுந்த கடவுள் என்பதை நீங்க ஒப்புக் கொள்ள என்ன செய்ய வேண்டும் சொல்லுங்க செய்கிறேன்.

கமல் : வெல்! நீங்கள் அதை மந்திர தந்திரங்கள் செய்துதான் நிரூபிப்பீர்கள் என்றால் ஹாலிவுட்டில் மேக்கப் கற்றுக் கொள்ளச் சென்ற போது நான் அதையும் கற்றுத் தேர்ந்து வந்திருக்கிறேன். கடவுள் நேரில் வந்தால் என்ன செய்வீர்கள் என்று எம் பகுத்தறிவுத் தந்தை ஈரோட்டாரிடம் கேட்ட போது அவர் சொன்னாராம் கடவுள் இருக்கிறார் என ஒப்புக் கொள்வேனென்று. அதை அப்படியே உங்களுக்கு சொல்ல விரும்புகிறேன். மந்திர தந்திரங்கள் இல்லாமல் உங்களால் கடவுள் என்று நிரூபிக்க முடியுமா?

கடவுள் : அப்படி உங்களுக்கு நிரூபிக்க நான் என்ன செய்ய வேண்டும் சொல்லுங்க.

கமல் : ஹாஹ்ஹா என்னிடம் வசமாக சிக்கிக் கொண்டீர்கள்! ஹேராம் ரீரெகார்டிங் சமயத்தில் இளையராஜா கூட ஒருமுறை இப்படி என்கிட்ட கேட்டு இருக்கார். இப்போ நான் உங்களுக்கு சவால் விடுகிறேன், எங்கே நான் பேசுற ஒவ்வொரு வரியும் அப்படியே தெளிவாக மற்றவர்களுக்கு புரியும்படி உங்களால் வரம் தரமுடியுமா! 

(திடுக்கிடுறார்) கடவுள் : மிஸ்டர் கமல் அப்படி வரம் அருள என்னாலும் முடியாது!! இது கூடவா அறிவு ஜீவியான உங்களுக்குத் தெரியாது?

(இப்போது கமல் திடுக்கிடுகிறார்) ஓ மனைவி, ஓ காதலி, ஓ தமையா, என் அச்சகத்தின் புத்தகம் நீ என்றேன் இப்போது ஓ கடவுளே நீயும் இருக்கிறாய் என்றால் இந்த அச்சகத்தின் புத்தகத்தின் கடைசி பக்கத்தில் உங்களுக்கும் இடம் தருகிறேன். சுஜாதா சார் சொல்லுவார்  infinite னு ஒரு தியரி இருக்கு கமல் அது உங்களுக்கு புரிஞ்சா போதும் என்று  வெல்.. உலகில் கடவுள் இருக்கிறார் என்பதை இப்போது நான் எனது உளமார சமரசமின்றி ஏற்கிறேன்.

கடவுள் : அப்பாடா! மிகுந்த மகிழ்ச்சி உலக நாயகனாக இருந்து கழக நாயகனாக மாறி எம்.பி ஆகியவுடன், உங்கள் நிலைப்பாட்டிலிருந்து எம்பி குதித்து கடவுள் உண்டுன்னு ஒப்புக் கொண்டதற்கு நன்றி! இனி மேல் இந்தத் தவறு நிகழாதல்லவா? 

கமல் : ஆஹ்ங்! ராஜா கைய வச்சா அது ராங்கா போகாது என்று அன்றே எனக்கு வாலி எழுதிவிட்டார்! ஒ.கே.. வரம் கொடுப்பவரை நேரில் சந்தித்தபின்னும் வரம் கேட்காமல் இருந்தேன் என்றால் அந்தப் பிழை என் வாழ்நாள் பிழையாகிவிடாதா? அந்த அவச்சொல் எனக்கு வராதிருக்க உங்களிடம் நான் சில வரங்களை கேட்கலாமா?

கடவுள் : அடடே! புரியற மாதிரி நீங்க எங்கிட்ட இப்போது பேசியதற்கே ஒரு வரம் தனியாக தரவேண்டும். நீங்கள் இரண்டு வரங்களைக் கேளுங்கள் தருகிறேன். 

கமல் : நாகேஷ் அடிக்கடிச் சொல்லுவார் உன்னை நம்பி முயற்சி எடு.. இன்னொருத்தனை நம்பி முடிவு என்ன, உன் முடியைக் கூட எடுக்காதேன்னு.. அதைத் தான் இன்று வரை கடைபிடித்து வருகிறேன். நீங்க கடவுள் தானே எனக்கு என்ன 2 வரம் தரவேண்டும் என்று உங்களுக்குத் தெரியாதா! அதை நீங்களே முடிவெடுங்கள்.

கடவுள் : ஓ அப்படியா! சரி உங்களுக்கு 2 வரங்கள் தருகிறேன். முதல் வரம் : நான் சொல்லும் இரண்டு இயக்குநர்களின் படங்களில் நீங்கள் மறுப்பு சொல்லாமல் நடிக்க வேண்டும்!

கமல் : வெல்! அப்போ இரண்டாவது வரம்?

கடவுள் : நீங்க அதுக்கு மறுப்பு சொன்னால் நீங்கள் பேசுவது உலகுக்கே நன்கு புரிவது போல பேசவேண்டும்.

கமல் : தகிட தக்தீம் தா.. தீம்த.. ம்ம்.. ஆரம்பிக்கலாமா.. நடிப்பதற்கு மறுப்பா!! டோண்ட் பி ஸ்டுப்பிட்.. சொல்லுங்க நடிப்பு என்பது என் சுவாசம்! எந்த இரண்டு இயக்குநர் படங்களில் நான் நடிக்க வேண்டும்? 

கடவுள் : ஒருவர் ஷங்கர்.. இன்னொருத்தர் மணிரத்னம்.. என்ன நடிக்கத் தயார் தானே கமல்? 

கமல் (சில நொடிகள் யோசிக்கிறார்) : வெல்! நான் எப்போதிலிருந்து புரியறா மாதிரி பேசணும் மை காட்..

(சட்டென கமல் திருந்திய அதிர்ச்சியில் கடவுள் நாயகன் ஸ்டைலில் அழுகிறார்) ஹா.. ஹாங்.. ஹாங்ஹா.. ஹாஹ்ஹாங்..ஹ்ஹா.. ஹாங்.. 

கமல் : லெளகீக லைஃப் என்பது அந்தக் காலம்.. தக் லைஃப் என்பது ஆண்டவர் காலம்… என்னை மாற்றியதற்கு நன்றி கடவுளே. {விடை பெறுகிறார்…}

கற்பனை - வெங்கடேஷ் ஆறுமுகம் 🖌️

🥘நெய்ச்சோறு 🐐

🥘 பக்ரீத் விருந்து 🐐

பக்ரீத் தினத்தில் நமது ஓட்டுநர் அண்ணன் விடுமுறை என்றாலும் பக்ரீத் அன்று அவர் வீட்டில் இருந்து எனக்கு பிரத்யேக விருந்து தயாரிப்பதாக சொன்னார்! வழக்கம் போல பிரியாணி தானே என்றேன் அலட்சியமாக. ஆண்டு முழுவதும் நம்முடனே பயணிப்பவர் அல்லவா! அவருக்கு என்னுடைய உணவு ரசனை அப்பட்டமாகத் தெரியும்!

ஹாலிவுட் சஸ்பென்ஸ் படக்கதை போல என்ன மெனு என்பதை பக்ரீத் அன்று தெரிந்துஞ்சிங்கோங்க என்றார். அவர் விருப்பப்படியே விட்டுவிட்டேன். பக்ரீத் முதல் நாள் கமுதி போயிருந்தேன் அங்கு எனது மாமா முறை உறவினர் ஒருவர் மாப்ள நாளைக்கு மதுரையில் தானே இருப்பே நாளைக்கு உனக்கு பக்ரீத் விருந்து அனுப்பறேன் என்றார்.

எங்க அனுப்பணும் சொல்லு அந்த இடத்துக்கு விருந்து சாப்பாட்டை கேரியரில் அனுப்பறேன்னார். பொதுவா இப்படி வாலண்டியரா வந்து சொல்றவங்க அடுத்த நாள் வேறு ஏதோ காரணம் சொல்லி அனுப்பமாட்டார்கள். ஆகவே ஆபிஸ் முகவரிக்கு அனுப்புங்க மாமான்னு சொல்லிட்டு மதுரைக்கு வந்துட்டேன். ஈகையுடன் மறுநாள் விடிந்தது!

காலையில் சேவல் கூவும் முன் என் மொபைல் கூவியது போனில் புதிய எண் ஒன்று! புதிய எண்களை எடுப்பது இல்லை என்றாலும் தூக்கத்தில் எழுந்து அனிச்சையாக மொபைலை அட்டெண்ட் செய்து, ஹலோவினேன். அண்ணாச்சி எழுந்துட்டியளா? ஒறங்கும் போது தொல்ல பண்ணிட்டோனோ? ஏதும் தப்பா நினைச்சுகிடலல்ல?

படபடவென கேள்வித் தொனியாகவே பேசுகின்ற நெல்லை வட்டார வண்ணத்தை பூசிய தமிழ் என்பது கேட்டதும் புரிந்தது. ‘அண்ணாச்சி நீங்க யாரு’ன்னு.. பாத்தியளா நான் அதச் சொல்லல பாருங்க, கமுதி பாஸ்கர் அண்ணாச்சி இருக்காவுள்ளா, அவரு தான் உங்க நம்பர் தந்தாவே தம்பி உங்கச் ச்சாப்பாடு மதியம் எத்தன மணிக்கு வேணும்?

எனக்கு முழு தூக்கமும் தொலைந்தது! அட நம்ம மாமா சொன்னபடியே செஞ்சிட்டாரே. ‘அண்ணாச்சி என்ன சாப்பாடு’ என்றேன். அதெல்லாம் பாஸ்கரு அண்ணாச்சி சொல்லிட்டாவ அத நேர்ல கொண்டுவரும் போது நீங்களே தெரிஞ்சிகிடுங்க. என்ன ஒரு 4 பேர் திருப்தியா சாப்பிடற அளவுக்கு கெட்டிட்டு வந்தா போதும் தானே? என்றார்.

ஆபிஸில் 18 ஊழியர்கள் இருக்காங்க அதில் நம்ம டிரைவர் அண்ணன் இஸ்லாமியர் அவரும் வீட்டில் சமைத்து வருவதாக சொல்லியிருந்தார். அவரை தவிர்த்துஅன்று என்னையும் சேர்த்து 15 பேர் இருந்தோம். அவருக்கு போன் செய்தேன் எடுத்தவுடன் “சார் நான் 12 மணிக்கே சமைச்சு எடுத்துட்டு வந்துடுவேன்னார்! அட இருங்க பாய் என்றேன்.

உங்களால எத்தனை பேருக்கு சமைச்சு எடுத்துட்டு வரமுடியும் என்றேன். சார் இப்போ சொன்னா நிச்சயம் நீங்க இல்லாம இன்னும் 5 பேருக்கு முடியும் என்றார். செய்யுங்க என்றேன். அண்ணாச்சிக்கு போன் செய்து 10 பேருக்கு செய்துதர முடியுமா என்றேன். அட 10 பேருக்கு செஞ்சு அனுப்புறேன் நிச்சயம் 12 பேர் சாப்பிடலாம் பாத்துகிடுங்க..

ஆக மொத்தம் இன்று மதியம் அலுவலகத்தில் பக்ரீத் விருந்துன்னு முடிவாகி அனைவருக்கும் இன்னிக்கு மதிய விருந்து இருக்குன்னு ஆபிஸ் வாட்ஸப் தகவல் அனுப்ப, அத்தனை பேரும் மெனு என்னன்னு கேட்டு பதில் அனுப்பி இருந்தனர். அவங்களுக்கும் நம்ம உணவு ரசனை தெரியும். ஆனா மதிய மெனு என்னான்னு எனக்கே தெரியாதே?

அண்ணாச்சியும் சரி டிரைவர் அண்ணனும் சரி என்னிடம் அதெல்லாம் சஸ்பென்ஸ்னு சொன்னதை திருப்பி அவ்வை சண்முகி பட ஸ்டைலில் அதெல்லாம் சஸ்பென்ஸ்னு நானும் பதில் அனுப்பினேன். அன்று மதியம் வரை எனது ஆபிஸில் ‘வெங்கடேஷ் சாரே சஸ்பென்ஸ் வைக்கிறார்னா இன்னிக்கு எதாவது ஸ்பெஷல் நான் வெஜ்ஜா இருக்கும்..

‘ஒருவேளை ஒட்டக பிரியாணியாஇதுக்குமோ! ‘இல்லப்பா ஆப்கன் ஆடு கறிச்சோறு இல்ல மந்தி பிரியாணி? ‘அட பீஃப், மட்டன், சிக்கன், மீன் எல்லாமே இருக்கும் பாரேன்’ என்று அதன் எச்சில் 2கோடி போகும் எலும்பு 3 கோடி போகும் ரேஞ்சுக்கு எதிர்பார்ப்பில் இருந்தனர். இத்தனை பேரின் எதிர்பார்ப்பு எனக்கு கொஞ்சம் உதறலாகவே இருந்தது.

மதியம் சரியாக மணி 12 :19 ஆகும் போது நமது டிரைவர் அண்ணன் ஆபிஸில் காலடி வைத்ததும் முதல் மரியாதை படத்தில் ராதா காலடி வைத்ததும் சிலிர்க்கும் சிவாஜி கை போல கடிகார முள் சிலிர்த்து சட்டென 12:20ஆனது. அடுத்த விநாடியே அண்ணாச்சியின் போன்! என்ன இன்னிக்கு எல்லாரும் பக்கா பங்சுவாலிட்டியா இருக்காங்களேன்னு..

வியந்து, ‘சொல்லுங்க அண்ணாச்சி என்றேன், எலே தம்பி தப்பா நினைக்காதிய இன்னும் ஒரு கால் மணி நேரம் ஆகும் பாத்துகிடுங்க என்றார். 12: 45க்குள் அவரும் வர பக்ரீத் பிரியாணி பாத்திரங்கள் திறக்கப்பட மடை திறந்த வெள்ளம் போல அவற்றிலிருந்து ஆவி கிளம்பியது. புராணப் படங்கள் போல புகை மண்டலம் இல்லை ஆனால்..

அங்கு அசைவ உணவுகளின் கம கம மணம் ரூம் ஸ்பிரேயர் அடித்தது போல பரவியது. டிரைவர் அண்ணன் நெய் சோறும், மட்டன் சுக்காவும் புதினா சட்னியும் கொண்டு வந்திருந்தார். அண்ணாச்சியும் அதே நெய் சோறும் காயல் களரிக்கறி மற்றும் நல்லி மசாலா கொண்டு வந்திருந்தார். முட்டைகளும் இரண்டு முழுக்கோழி தந்துரியும் இருந்தது.

முந்திரி,பிஸ்தா, கிராம்பு குத்தப்பட்ட உலர் திராட்சை என நெய் கமகமக்க நெய்ச் சோறு, டிரைவர் அண்ணன் வீட்டு நெய் சோற்றில் தக்காளி சேர்க்கவில்லை அவரது புதினா சட்னி அன்றைய டாப் நாச். அண்ணாச்சியின் களரிக்கறியும் ருசியில் அலறவிட்டது. விருந்து முடிந்து 2 நாட்களாகியும் அந்த உணவின் மணம் இன்னும் எங்களது கைகளில்..!

இந்த பக்ரீத் விருந்து முடிந்ததும் தரப்பட்ட பட்டர் ஸ்காட்ச் ஐஸ்க்ரீமை ருசித்துக் கொண்டிருந்தபோது, வருடத்தில் ஒரு சில தினங்களாவது இப்படி ஒரு விருந்து அது அசைவமோ அல்லது சைவமோ அனைவருக்கும் தரவேண்டும் என்ற எண்ணம் எழுந்தது! ஈகை என்றாலே அது உவகை தானே!

🩷 ஏவ்வ்வ்வ்வ்வ்வ்வ் 🥘