மெராமெக் அதிசயகுகை 2

#திரில்_குகைப்பயணம்

பார்ட் - 2 

தானாக வளரும் பாறைகளா.! அது என்ன பாறைகள்.? மழை நின்றதும் சன்ஷேடுகளின் விளிம்பில் முத்து போல சொட்டும் அல்லது வீட்டுக் குழாயில் அரும்பி சொட்டக் காத்திருக்குமே குமிழ் போல நீர்த்துளி அதைப் பார்த்து இருப்பீர்கள் அல்லவா அதைப் போலவே குகையின் மேற் கூரையில் இருந்து சொட்டுச் சொட்டாக அரும்பி வளரத் துவங்குகிறது இப்பாறைகள். பலகாரக் கடையில் காராபூந்தி போடுவதை பார்த்து இருக்கிறீர்களா.? 

நிறைய துளைகள் உள்ள பெரிய கரண்டியில் மாவு கரைசலை ஊற்றுவார்கள் அவையும் கடலைமாவு மழையாய் சரசரவென கீழே விழும் அதே போல அந்த  குமிழ் நீளத்துவங்குகிறது. சுண்ணாம்பு மற்றும் மக்னீசியம் கலந்த இக் கலவை மெல்ல பளிங்கு போலாகி கிறிஸ்டல் போல பளபளப்பான பாறை ஆக வளர்கிறது. சிறியதாக ஒரு கம்பி மத்தாப்பு தடிமனில் உருவாகும் ஒரு துளி நாளடைவில் அக்கம் பக்கத்து கம்பிகளோடு கூட்டணி வைத்து..

அந்த மெகா கூட்டணி பெரும் பளிங்கு பாறையாக மாறுகிறது. மெராமெக் குகைகள் ஏழு நிலைகள் கொண்டவை ஐந்து நிலைகள் பூமிக்கு அடியில் இருக்க இரண்டு நிலைகள் தான் வெளியே தெரிகின்றன. இந்தப் பாறை படிமங்களுக்கு ஓன்க்ஸ் (ONYX) எனப்பெயர்.. ஆண்டுகள் ஆக ஆக அதன் வடிவமும் பரிணாமமும் பிரமிக்க வைக்கின்றன. நம் ஊரில் அமர்நாத் பனிக் குகையில் ஒரே ஒரு லிங்கம் வளர்வதை பிரமிப்பாக பார்க்கிறோம்.

ஆனால் இங்கு ஆயிரம் ஆயிரம் லிங்கங்கள் அதிலும் விஸ்வரூப லிங்கங்கள் எல்லாம் உள்ளன.. இந்த குகை நம் ஊரில் இருந்து இருந்தால் இன்னொரு திருவண்ணாமலை ஆகி சிவஸ்தலமாகி இருக்கும். நீருக்கு அடியிலும் உருவாகும் வைன் டேபிள் என்னும் பாறைப் படிமம் உலகில் மூன்று இடங்களில் உள்ளது.. ஆனால் இங்கு மட்டும் தான் அது தண்ணீருக்கு மேல் உள்ளது.. திராட்சைக் கொத்து போல இப்பாறைகள் இருப்பதால் இதை..

வைன் டேபிள் என்கிறார்கள்.. Botryoids என்பது இந்த படிமத்தின் அறிவியல் பெயர்..சிறு துளியாகி அப்படியே கூரையில் தொங்கவிட்ட கத்தியாகவோ அல்லது கல்லால் ஆன புடலங்காய் தோட்டம் போலவோ சரேல் சரேலென பாறைகள் தொங்குகின்றன.. இவற்றைத் தொடக்கூடாது தொட்டால் வளர்ச்சி நின்றுவிடுமாம். குகைக்குள் டூர் என்பது 1மணிநேரம் 15 முதல் 20 பேர் சேர்ந்தால் ஒரு கைடு நம்மை அழைத்து போவார்.

பாறை இடுக்கில் விரல் நுழைத்து அவர் ஸ்விட்ச் போட பளீரென குகை வெளிச்சம் பெறுகிறது.ஒவ்வொரு இடத்தை கடக்கும் போதும் அதை அணைத்துவிட்டு மறுபடி அடுத்த இடத்தில் போய் ஸ்விட்ச் போடுவார்.. நீளமான உயரமான குகை சுற்றிலும் நீர் சலசலக்கும் சத்தம் பளீர் வெளிச்சம் கும்மிருட்டு என அந்தப்பயணம் முழுவதும் மெல்லிய திகில் கலந்தே இருந்தது. பாறை படிமங்களின் ஆரம்ப நிலையை பார்த்துவிட்டு திரும்பி..

குகைக்குள் நுழைந்த இடத்திற்கு அருகில் விருட்டென குகை மேலே ஏறுகிறது.. அங்கு மின்னும் மஞ்சள் நிறத்தில் டைனாசார் சைசில் ஒரு பாறைப் படிமம் மெகா பந்து போல 35 மில்லியன் ஆண்டுப்பழமையானது என்றார்கள்.. மெய் சிலிர்த்தது.. மிசெளரி ஆற்றின் தண்ணீர் அதில் அபிஷேகம் போல வழிந்து கொண்டு இருந்தது.. அங்குள்ள சிறிய பாறைகளுக்கு பின்னால் வண்ண விளக்குகள் கொடுத்து இருந்தார்கள்.

ஆஹா..என்ன ஒரு அற்புதமான காட்சி.. வைன் டேபிள் படிமங்களில் தானாகவே உருவாகியிருந்த குதிரை வடிவ பாறை இன்னுமொரு அற்புதம். பல படிகள் ஏறி அவற்றை தரிசித்தோம் இங்கு நீர்க்கசிவு அதிகம் வழுக்காமல் பார்த்து நடந்தோம்.. அடுத்து நாங்கள் நுழைந்தது அந்த குகைக்குள்ளேயே ஒரு தியேட்டர் போல ஒரு அமைப்பு அதன் பெயர் THE GREAT CURTAIN அங்கு ஒரு திரைப்படக் காட்சி நடக்கும் என்றார்கள்.

எங்கும் இருள் சூழ்ந்திருந்தது.. சினிமா எதில் திரையிடுவார்கள்? வெண் திரை எங்கே.? எதிரில் தேடினோம் அது கடவுள் போல எங்களுக்கு அகப் படவில்லை. பளீரென விளக்கு எரிந்தது ஒரு அரை விநாடி எங்கள் இதயம் நின்று துடித்தது.. கடவுளின் விஸ்வரூபம் போல் வானுக்கும் பூமிக்கும் வியாபித்து இருப்பது போல் 70அடி உயரம் 60அடி அகலம் 35 அடி கனத்தில் ஒரு பெரும் வைரப் பாறை தக தகவென ஜொலித்தது.. 

அதன் வயது 70 மில்லியன் வருடங்கள்..! அது பற்றி நாளை... வரும்..

மெராமெக் அதிசயகுகை 1

#திரில்_குகைப்பயணம்

பார்ட் - 1

அமெரிக்காவில் மிசெளரி மாநிலத்தின் செயின்ட் லூயிஸ் நகரிலிருந்து ஒரு மணி நேரக் கார் பிரயாணத்தில் இருக்கிறது மெராமெக் குகைகள். இந்தியாவில் உள்ள அஜந்தா எல்லோரா போன்ற குகைகள் மனிதனின் கைவண்ணத்தில் மிளிர்ந்த ஓவிய குகைகள் ஆனால் இது இயற்கை என்னும் ஓவியன் கைவண்ணத்தில் ஜொலிக்கும் பாறைப் படிமங்களை உள்ளடக்கிய குகைகள்.. அத்தனையும் பல மில்லியன் ஆண்டு வயதுள்ள பொக்கிஷங்கள்.

கோடையில் சலசலத்தும் குளிரில் உறைந்தும் ஓடுகின்ற மிசெளரி ஆற்றங் கரையின் ஓரத்தில் மெளனமாக வீற்றிருக்கும் அந்த மலையை வெளியில் இருந்து பார்க்கும் போது அது உள்ளே வைத்திருக்கும் அதிசயத்தை கற்பனை செய்துகூட பார்க்க முடியாது. வலமிருந்து இடமாக மதுரை ஆனைமலை போல ஆனால் அந்தளவு நீளம் கூட இல்லை சற்று குறைவு தான். ஆனால் அதன் உட்புறம் வாசலில் இருந்து உள்ளே 26 மைல்கள்.!

நாங்கள் சென்ற அன்று மிசெளரி ஆற்றில் அந்தக் குளிரிலும் நீர் உறையாமல் சலசலத்துக் கொண்டிருந்தது.. ஆற்றங்கரை என்பதால் அடித்த குளிர் பற்களை Wi - Fi connection கிடைத்தவுடன் குவியும் மொபைல் நோட்டிஃபிகேஷன் சவுண்ட் போல கடகடக்க வைத்தது. வாசலில் 2கெளபாய் கொள்ளையர்கள் தாங்கள் கொள்ளையடித்த பணப் பையுடன் நிற்கும் சிலை. ஏதோ வேடிக்கைக்கு வைத்திருக்கிறார்கள் என நினைத்துக் கொண்டு அங்கே புகைப்படம் எடுத்துக் கொண்டு உள்ளே நுழைந்தோம்.

உள்ளேயும் பல இடங்களில் கெளபாய் உருவங்கள்,தொப்பிகள், சிலையாக கொள்ளையர் உருவங்கள், துப்பாக்கிகள், கோடாரிகள் எல்லாம் காட்சிக்கு வைத்திருந்தார்கள்.. சுவர்களிலும் பலகைகளிலும் ஜெஸ்ஸி ஜேம்ஸ் என்ற பெயரை அடிக்கடி படிக்க நேரிட்டது. யாரோ ஒரு மிகப் பெரிய வீரன் என நாங்கள் நினைத்திருந்தோம்.. கடைசியில் குகைக்குள் நுழையுமிடத்தில் காத்திருக்கும் போது தான் தெரிந்தது அவன் ஒரு கொள்ளைக்காரனென்று. 

ஜெஸ்ஸி ஜேம்ஸ் ஒரு பழங்காலத்து அமெரிக்க வீரப்பன். நம்ம வீரப்பன் சந்தனமரம் வெட்டி காடுகளில் மறைந்து வாழ்ந்தது போல ஜெஸ்ஸீரப்பன் 1870 ஆம் ஆண்டுகளில் அமெரிக்காவை கதிகலங்க அடித்த கொள்ளையன். தன் சகாக்களுடன் ரயில் மற்றும் வங்கிகளை கொள்ளையடித்துவிட்டு வந்து இந்த குகைகளுக்குள் மறைந்துவிடுவானாம். இந்த குகையின் அத்தனை இண்டு இடுக்குகளும் தங்கள் ஜாதகத்தை அவனிடம் தந்துவிட்டபடியால்..

எல்லாம் அவனுக்கு சாதகமாகவே இருந்தது. இந்த குகைக்குள் அவன் வைத்தது தான் சட்டம் சதுரம் வட்டம் எல்லாமே.. இந்த குகைக்குள் அவன் தண்ணீருக்குள் முதலை போல அவனை பிடிக்கவோ வெல்லவோ முடியாது. அறிவியல் வளர்ந்து விட்ட இந்த நூற்றாண்டிலும் குகைக்குள் சக்தி வாய்ந்த விளக்குகள் போட்டதும் பளிச்சிட்ட குகையானது விளக்கு அணைந்ததும் மணிரத்னம் பட எப்ஃக்டில் சட்டென இருள் சூழ்ந்தது. அப்படி என்றால் 1870களில் இந்த கும்மிருட்டில் அவனை வந்து பிடித்திருக்கவே முடியாது. 

வெளியே பாயும் மிசெளரி ஆறும் இந்த குகைக்குள் என்ன இருக்கிறது என ஆவலுடன் சைடில் பாய்ந்து எட்டிப் பார்க்க ஆற்றின் நீர் இந்த குகைக்குள் சில இடங்களில் கசிகிறது, சில இடங்களில் சலசலக்கிறது,சில இடங்களில் அருவியாக கொட்டுகிறது. இந்த வாட்டர் எபஃக்டினால் மொத்த குகையுமே ஏ.சி போட்டது போல சிலு சிலுக்கிறது. அக்காலத்தில் இந்த குகையில் மிகப் பெரிய வெடிமருந்து கிடங்கு ஒன்றும் இருந்ததாம். 

வெளியே போய் கொள்ளையடிக்க இந்த 26 மைல் அகல ஏ.சி வீட்டில் வந்து பதுங்கிட, நன்கு சமைத்துச் சாப்பிட, என ராஜ போக வாழ்க்கை வாழ்ந்த ஜெஸ்ஸீரப்பன் எப்படி இறந்தான் என்பது மறைந்த மலேசிய விமானம் போல மர்மமாகவே உள்ளது. இதையெல்லாம் மீறி ஜெஸ்ஸிக்கு தெரியாத பல மில்லியன் காலத்து அதிசயம் ஒன்று குகைக்குள் இருந்ததை அவன் பெரிதும் அறிந்திருக்க மாட்டான்.. அதுதான் தானாய் வளரும் அதிசயப் பாறைகள்..! 

அது பற்றி நாளை...வரும்

ஹலோ அமெரிக்கா 11

#அமெரிக்கவாழ்க்கையும்_தமிழர்களும்

பார்ட் - 11

பொங்கல் தீபாவளிக்கெல்லாம் அங்கு விடுமுறை கிடையாது கொண்டாட வேண்டுமெனில் லீவு எடுத்துத்தான் கொண்டாட வேண்டும். இதில் தீபாவளி கொஞ்சம் ஓ.கே ஏனெனில் இந்தியர்கள் அனைவரும் கொண்டாடுவதால் அது கொஞ்சம் பிரபலம். தீபாவளி பலகாரம் ஓ.கே ஆனால் இந்த பட்டாசு.? நம்ம ஊருபோல தெருவில் கம்பளம் விரிப்பது போல டென் தவுசண்ட் வாலா வைத்து வெடிக்க முடியாது.வெடித்தால் நீங்கள் கம்பிமத்தாப்புக்கு பதில்..

கம்பி எண்ண வேண்டியது வரும்.அங்கு பட்டாசு வெடிக்க அனுமதி வாங்க வேண்டும். ஏதோ போனால் போகட்டும் என வாசலில் வைத்து வெடிக்க கம்பி மத்தாப்பு புஸ்வாணத்திற்கு மட்டுமே அனுமதி.. அதிலும் வெடிக்காத புஸ்வாணம் இருப்பது அவசியம். இந்திய அமைப்பினர் வேண்டிக் கேட்டுக் கொண்டால் பட்டாசு வெடிக்க ஊருக்கு நடுவே யாருக்கும் இடைஞ்சல் இல்லாத பார்க் போல ஏதாவது ஒரு பொது இடம் தரப்படும். 

அங்கே எவ்வளவு நேரம் நாம் வெடிகள் வெடிக்கப்போகிறோம் எவ்வகையான வெடி?அதன் ஒலியளவுகள் என்ன? எல்லாம் எழுதிக் கொடுத்து அனுமதி பெற வேண்டும் இங்கு ஒவ்வொரு மாநிலத்தின் விதிகளும் மாறுபடும். அதன் படி தான் வெடிக்க முடியும்.விடுப்பு கிடைக்காதவர்கள் தீபாவளியன்று வீட்டில் சமைத்து புத்தாடை அணிந்து கொண்டாடுவதை விட அதையொட்டி வரும் வார விடுமுறையில் கொண்டாடுகிறார்கள். அதுதான் அவர்களுக்கு வசதி.

ஆனால் இப்போது ஒபாமா ஜனாதிபதி ஆனதும் தான் தீபாவளிக்கு விடுமுறை அளிக்கப்பட்டுள்ளது என்றே நினைக்கிறேன்.பொங்கலும் அப்படித்தான் பொதுவாக பொங்கல் நேரம் அங்கு குளிர்காலம் என்பதால் ஜனவரி 15முதல் பிப்ரவரி 15வரை வசதிப்படும் சனி ஞாயிறுகளில் கொண்டாடுகிறார்கள். பானை வைத்து குலவையிட்டு பொங்கல் வைக்க முடியவில்லை என்றாலும் அது போல மாடல்கள் செய்து வைத்து அந்த முறையை நினைவு படுத்திக் கொண்டாடுகிறார்கள். 

அந்த சமயத்தில் தான் அங்கு பொங்கல் கலை நிகழ்ச்சிகள் நடக்கும். அதில் கலந்துகொள்ளத்தான் நாங்கள் அங்கே போனோம். முக்கியமாக நவராத்திரி கொலுவும் அங்கு பிரசித்தம் கொலு வீடுகளுக்கு நம்ம ஊர் போல அழைப்பதும் போவதும் உண்டு. விளக்குபூஜை போன்ற பெண்கள் கொண்டாடும் விழாக்கள் அடிக்கடி நடக்கும் கணவன்மார்கள் மனைவியை கொண்டு போய் இறக்கி விட்டுவிட்டு பிறகு வந்து அழைத்துப் போவார்கள். 

ரங்காச்சாரிக்கு ரம்ஜான் விடுமுறை கிடைத்தது போல அவர்களுக்கு கிறிஸ்துமஸ் விடுமுறை கிடைக்கும். அந்நேரத்தில் அதை வீணாக்காது ஏதாவது ஒரு சிறிய சுற்றுலா கிளம்பிவிடுகிறார்கள். அமெரிக்காவில் மிக விமரிசையாகக் கொண்டாடப்படுவது கிறிஸ்துமஸ் தான் வீட்டு விளக்கு அலங்காரங்கள் எல்லாம் ஜொலி ஜொலிக்கும்..நம்ம ஊர் பீச் மணலில் வீடு கட்டுவது போல அங்கு பனியினால் பெங்குவின் பொம்மை செய்வது வழக்கம்.

நரகாசூரனை வதம் செய்த வாசுவின் பண்டிகையோ தொழுவத்தில் பிறந்த இயேசுவின் பண்டிகையோ அமெரிக்க வாழ் தமிழர்களுக்கு இரண்டுமே ஒன்று தான்.. அங்குள்ள உறவுகள்,நண்பர்கள்,மொழி, கலாச்சாரம் இவைகள் பற்றி அடுத்த பதிவில்..

வரும்...

ஹலோ அமெரிக்கா - 12

#அமெரிக்க_வாழ்_தமிழர்கள்

பார்ட் - 12

அமெரிக்காவில் சொந்தங்கள் என்பது பலருக்கு அங்கு குடியேறிய பிற தமிழ் நண்பர்கள்  தான். விதிவிலக்காக அண்ணன் தம்பி சகோதரி இப்படி குடும்பத்தில் அனைவருமே அமெரிக்காவில் இருக்கும் குடும்பங்களும் உண்டு. டெக்சாசில் நண்பர் கேசவனின் குடும்பத்தார் 24 பேர் அங்கு இருக்கிறார்கள் என அறிந்தேன்.. அமெரிக்காவில் கவுன்சிலர் எலக்ஷன் நடந்தால் நிச்சயம் நண்பர் கேசவன் கவுன்சிலர் ஆகிவிடுவார். 

நிச்சயமாக அங்குள்ள தமிழ்க்குடும்பங்களுக்குள் இருக்கும் பிணைப்பு அலாதியானது.. இங்கு நட்புக்கள் தான் சொந்த பந்தங்கள். பொங்கல் தீபாவளி போன்ற பண்டிகைகளில் ஒன்று கூடி கொண்டாடுகிறார்கள்.. பண்டிகை வரை காத்திருக்காமல் மாதமொரு முறையோ அல்லது இரு மாதங்களுக்கு ஒரு முறையோ யார் வீட்டிலாவது ஒன்று கூடுகிறார்கள். ஒவ்வொருவரும் அவர்கள் பங்கிற்கு ஏதாவது சமைத்து எடுத்து வருவர்.

அனைவரும் ஒன்றாகக்கூடி அமர்ந்து ரசித்து ருசித்து சாப்பிட்டு பின்பு சிரித்து பேசி மகிழ்ந்து அவர்களது நினைவுகளால் தாய் நாட்டிற்கு வந்து போகிறார்கள்.. அவர்கள் உணவினை எடுத்துக் கொண்டு வந்து பங்கிட்டு சாப்பிட்டதைப் பார்த்தபோது எனக்கு கூட்டாஞ்சோறு தான் நினைவுக்கு வந்தது. தமிழ்ப் பள்ளிகள் மூலம் தமிழ் படிப்பது மட்டுமின்றி பாரம்பரிய தமிழர் கலைகளை வளர்க்கிறார்கள் இது எனக்குப் பெருமையாக இருந்தது.

ஆம்.! கரகம், சிலம்பம், தப்பாட்டம், ஒயிலாட்டம், கும்மி, பொய்க்கால் குதிரை, புலி ஆட்டம் போன்ற நம் தமிழர்களின் பாரம்பரிய கலைகளையும் பிள்ளைகளுக்கு பயிற்றுவிக்கிறார்கள். மினியாபொலிஸ் தமிழ்ச் சங்கத்தில் இந்த நிகழ்வினைக் கண்டேன். ஒரு நிமிடம் தமிழகத்தில் இருப்பது போலவே உணர்ந்தேன் அப்படியே ஒரு அரசு விழா போல இருந்தது. அங்கு ஆடியவர்கள் எல்லாம் உயர்பதவியில் உள்ள தமிழர்கள்.பாராட்டுக்கள்.

தமிழ் நூல்கள் சேகரிப்பு, கணினித்தமிழ், திருக்குறள், கம்பன் விழா போன்ற பல தமிழ் வளர்க்கும் நிகழ்வுகளும் ஏராளம். இங்குள்ள வட அமெரிக்க தமிழ் அமைப்பான ஃபெட்னா தான் மிகப் பெரிய தமிழர் அமைப்பு. 50 மாநில தமிழ்ச்சங்கங்களும் ஃபெட்னாவின் ஆலோசனை பெற்று தான் செயல்படுகின்றன. இவ்வமைப்பில் உள்ள  பல புரவலர்கள் பொருள் தந்து பல வகைகளில் அமெரிக்கா முழுவதும் தமிழ் மொழியை வளர்த்துகிறார்கள். 

பிற மொழிகளை கற்றுக் கொள் தமிழ் மொழி மீது பற்றுக் கொள் என்னும் வாசகமும்.. பிறமொழிகளை நேசி தமிழ்மொழியை சுவாசி என்னும் வாசகமும் என்னை வெகுவாக கவர்ந்தன. தாய்நாட்டைப் பிரிந்து பெற்ற தாய் தந்தையரைப் பிரிந்து சொந்தங்களை துறந்து உலகின் இன்னொரு மூலையில் புதிய சூழலில் ஒவ்வாத பருவநிலையில், கடைசிவரை நிலைக்குமா நிலைக்காதா என அறுதியிட்டுக் கூற முடியாத பணியில்...

நிரந்தரமில்லா பணி இருந்தாலும் நீ வாழத் துணி என உறுதியுடன் போராடுகின்றனர் தமிழர்கள். அவர்கள் தங்களது வாழ்வாதாரத்தை மட்டும் பாராமல் தமிழையும் சேதாரமின்றி காக்கிறார்கள். இது தெரியாமல் உங்களை விமர்சித்தவர்கள் கூட நிச்சயம் இனி போற்றுவார்கள்.. 

அமெரிக்க வாழ் தமிழர்கள் வாழ்க்கைத்தரம் உயர்ந்தது தான் ஆனால் அதற்கு அவர்கள் இழந்தது ஆயிரம்.. நாங்கள் உங்களை முடிந்தவரை புன்னகை பூக்க வைப்போம்.. எங்கள் விரல்கள் உங்கள் கண்ணீர் துடைக்க மட்டுமல்ல உங்கள் கைபிடித்து மகிழ்ச்சியின் வாசலுக்கும் அழைத்துச் செல்லும். எல்லையில் இருக்கும் இராணுவ வீரர்களுக்கு மட்டுமில்லை கடல் எல்லை தாண்டி அமெரிக்காவிலும் தமிழ் வளர்க்கும் உங்களுக்கும் ஒரு சல்யூட்..ஜெய்ஹிந்த்..!

நிறைந்தது.

ஹலோ அமெரிக்கா - 10

#அமெரிக்க_வாழ்_தமிழர்கள்

பார்ட் - 10

அமெரிக்காவில் பெரும்பாலும் ஐ.டி நிறுவனங்களில் பணிபுரிபவர்கள் தான் அதிகம் என்றாலும் ஆட்டோமொபைல், வங்கித்துறை, தணிக்கைத்துறை, போன்ற துறைகளிலும் தமிழர்கள் அதிகம் பணிபுரிகிறார்கள். ஒரே நிறுவனத்தில் பல ஆண்டுகள் பணி புரிபவர்கள் என்பது மிகக் குறைவு. அப்படி வேலை பார்த்தால் அந்த நிறுவனத்தின் வளர்ச்சி அபரிமிதமானது என்றும் பணிபுரிபவர் மிகுந்த திறமைசாலி எனவும் அறியலாம். உதாரணம் கூகுள்.

ஒருவர் 10 வருடங்கள் அங்கு வேலை பார்த்து இருந்தால் நிச்சயம் 4 கம்பெனிகளாவது மாறி இருப்பார்.. ஏனெனில் அவன் உன்னை தாக்குவதற்குள் நீ அவனை தாக்கிடு.. இல்ல அங்கிருந்து விலகிவிடு பாலிசி தான். அமெரிக்க நிறுவனங்கள் அலுவலகத்தில் ஒரு குழுவின் பர்பாமென்ஸ் சரியில்லை என்றால்.. இதற்கு முன் அவர்கள் அச்சீவ் செய்த ஹிஸ்டரி எல்லாம் நன்றாக இருந்தாலும் தயவு தாட்சண்யம் இன்றி தூக்கிவிடுவார்கள்.

ஆகவே தான் சம்பள உயர்வு வேறு பணி என அனைவரும் மாறிக் கொண்டே இருக்கிறார்கள்.. ஒரே நிறுவனத்தில் வேலை நிரந்தரம் இல்லை என்பதும் அமெரிக்கத் தமிழர்களுக்கு ஒரு பிரச்சனை. சொந்தத் தொழில் செய்பவர்களும் உண்டு. ரியல் எஸ்டேட், டிரேடிங், டிபார்ட்மெண்ட் ஸ்டோர், ரெஸ்ட்டாரெண்டுகள் இப்படி.. டாக்டர்களும் இருக்கிறார்கள். அங்கு பல்டாக்டர் படித்து க்ளினிக் வைத்தால் நிச்சயம் மில்லியனர் ஆகலாம்.

பற்களை ஆரோக்கியமாக பராமரிக்க அமெரிக்கர்கள் அதிக முக்கியத்துவம் தருகிறார்கள். வருடத்திற்கு குறைந்தது 2 முறையாவது டெண்டிஸ்ட்டுகளை பார்த்து விடுகிறார்கள். அது சம்பந்தமான மவுத் வாஷ், ஃபோம், பல்லிடுக்கை க்ளீன் செய்யும் திரெட், ஈறுகளுக்கு தடவும் க்ரீம், பிரஷ், பற்பசை, என வித விதமாக கடைகளில் விற்கிறார்கள். அடுத்து நம்ம ஊரு நகைக்கடை மீது பெண்களுக்கு எவ்வளவு மோகமோ அதே மோகம் அங்கு நகக்கடையில்.!

ஆம் பெடிக்யூர் எனப்படும் நகங்களை சுத்தம் செய்யும் கடை 50 டாலர்கள் முதல் 500 டாலர் வரை விதவிதமாக நகங்களை சுத்தப்படுத்தி அழகுப் படுத்திக் கொள்கிறார்கள். அடுத்து சலூன் அமெரிக்காவில் சலூன் கடை போட்டால் நல்ல எதிர்காலம் இருக்கிறது. தற்போது முடி வெட்ட மினிமம் 40 டாலர்கள் செலவாகிறது. அதுமட்டுமின்றி நமக்கு வெட்டிவிடுபவர்களிடம் நமக்கு எப்படி வெட்டிவிடுவது என சொல்லிக் கொண்டே இருக்கவேண்டும்.

மறந்து தூங்கிவிட்டால் விழித்துப் பார்க்கும் போது எதிரிலிருக்கும் கண்ணாடியில் பரதேசி அதர்வா தெரியலாம். அங்கிருப்பவர்களுக்கு இது ஒன்று தான் குறை. அரபு நாடுகள் போல கட்டுமானம் துப்புரவு போன்ற பணிகளில் நம்மவர்கள் குறைவு. வட இந்தியர்கள் அதிகம் பெரும்பாலும் மெகா சைஸ் டிபார்ட்மெண்ட் ஸ்டோர்கள் வைத்திருப்பது எல்லாம் அவர்கள் தான். இந்தியாவில் கிடைக்கும் எல்லா பொருளும் கிடைக்கும்.

அமெரிக்காவில் சீக்கியர்கள் குஜராத்திகள் அதிகம் அடுத்து ஜெயின் சமூகத்தினர் சுந்தரத் தெலுங்கர்களும் கணிசமாக இருக்கின்றனர். இந்திய ரெஸ்ட்டாரண்டுகளில் நம் இந்திய ஒருமைப்பாட்டை பார்க்கலாம். நிறைய குருத்துவாராக்களும் ஜெயின் கோயில்களும் நம் தமிழர்களின் கோவில்களும் இங்குண்டு. இங்கு வரும் போது தான் அவர்களுக்கு நம் தாய்நாட்டில் இருப்பது போல உணர்வு. பக்தியும் நம் கலாச்சாரம் அல்லவா.

இந்தக் கோவில்களில் குரு நானக்கும், மகாவீரரும், வெங்கடாஜலபதியும்,  விநாயகரும், முருகரும், பெண் தெய்வங்களும் அமெரிக்க தூதகரத்தின் இண்டர்வியூ அவஸ்தைகள் பாஸ்போர்ட்,விசா, இன்விடேஷன் லட்டர் இந்த பிரச்சனைகள் ஏதுமின்றி அமெரிக்காவில் எழுந்தருளி தம் பக்தர்களுக்கு அருள் புரிகிறார்கள். கோவில்களில் நம் கலாச்சாரம் சரி.. சொந்த பந்தங்கள் பண்டிகைகள் விழாக்கள்.. ?? அது அடுத்த பதிவில்...

வரும்..

ஹலோ அமெரிக்கா - 9

#அமெரிக்க_வாழ்_தமிழர்கள்

பார்ட் - 9 

இன்சூரன்ஸ் இல்லாத மனிதன் இயந்திர மனிதன் இந்தப் புது மொழி அமெரிக்காவுக்கு பொருந்தும். அமெரிக்காவில் இன்சூரன்ஸ் மிக முக்கியம்.. மெடிக்கல், வீடு, கார், வீட்டிலுள்ள ஃபர்னிச்சர், லேப்டாப், கணினி, வீட்டிலுள்ள எலக்ட்ரானிக் பொருட்கள் எல்லாவற்றிற்கும் இன்சூரன்ஸ் அவசியம் உண்டு. இன்சூரன்ஸ் கட்டாத வரி செலுத்தாத அமெரிக்கர்கள் எவரும் இல்லை. பலதரப்பட்ட வகைவகையான இன்சூரன்சுகள் அங்குண்டு.

பேச்சுலரா, திருமணம் ஆயிடுச்சா, ஒரு பிள்ளையா, ரெண்டு பிள்ளையா, அதுக்கு மேலேயா, குழந்தை பெற்றுக்கொள்ள விரும்புகிறீர்களா, இல்ல வேணாமா, உங்க நகம், கை, கால், முடி, தொடை இதற்கு இன்சூரன்ஸ் செய்ய வேண்டுமா எல்லாம் உண்டு. இப்படி டேபிள்மேட்டை விட அதிக வகையான பயன்பாடுகளில் அங்கு இன்சூரன்ஸ் உள்ளது. கை கால் போன்ற உறுப்புகளுக்கு இன்சூரன்ஸ் செய்பவர்கள் பெரும் செலிபிரிட்டிகள் தான்..

அதற்கு பல பில்லியன் மதிப்பில் இன்சூரன்ஸ் எடுத்து சில மில்லியன் தொகையை ஆண்டுதோறும் ப்ரீமியமாக கட்டுகிறார்கள். கார்களுக்கு இன்சூரன்ஸ் ஆரம்பத்தில் அதிகம்.. 2 அல்லது3 வருடங்களுக்குப் பின் நீங்கள் ஒழுங்காக உங்கள் மீது தவறின்றி விபத்து ஏற்படுத்தாமல் போலீஸ் டிக்கெட்டுகள் வாங்காது வண்டி ஓட்டி இருந்தால் இன்சூரன்ஸ் ப்ரீமியம் குறையும்.. இல்லாவிட்டால் நீங்கள் அதிகம் செலுத்த வேண்டியது வரும்.அமெரிக்காவில் முக்கியமானது மெடிக்கல் இன்சூரன்ஸ்.!

அவ்வூர் டாக்டர்கள் 30 டாலருக்கு மருந்து எழுதிக் கொடுத்துவிட்டு 300 டாலர்கள் கன்சல்டிங் ஃபீஸ் வாங்குகிறார்கள். இன்சூரன்ஸ் இல்லாவிட்டால் சின்ன காய்ச்சலுக்கு நம்ம ஊர் மதிப்பில் 20 ஆயிரம் ரூபாய் செலுத்த வேண்டும். இன்சூரன்ஸ் இருந்தால் மினிமம் பே 30 டாலர் செலுத்தினால் போதும் மீதி 270 டாலரை இன்சூரன்ஸ் கம்பெனி அந்த டாக்டருக்கு செலுத்திவிடும்.

குழந்தை பிறந்து பிரசவம் முடிந்து வீடு திரும்ப 50 ஆயிரம் டாலர்கள் வரையெல்லாம் பில் வருமாம்.. கிட்டத்தட்ட 35 இலட்ச ரூபாய். இதனால் வசதி வரும் போது பார்த்துகலாம் என பிள்ளை பெற்றுக் கொள்ளாத அமெரிக்கர்கள் இருக்கிறார்கள். உங்கள் மெடிக்கல் இன்சூரன்ஸை மட்டும் பணிபுரியும் கம்பெனிகள் பார்த்துக் கொள்ளும் ப்ரிமியமும் கொஞ்சம் கம்மி. சொந்த வீடு கார்களுக்கு நாம் தான் இன்சூரன்ஸ் கட்டவேண்டும்.

இன்சூரன்ஸ் கம்பெனியுடன் நாம் பணிபுரியும் கம்பெனி டை - அப்பில் இருந்தால் கட்டணம் கொஞ்சம் குறையும். இயற்கை சீற்றங்களான டொர்னாடோ புயல், வெள்ளம்,தீவிபத்து போன்ற இயற்கை சீற்றங்களுக்கும்

இன்சூரன்சை நாம் தான் தேர்வு செய்ய வேண்டும். அதிலும் டுபாக்கூர் இன்சூரன்ஸ் நிறுவனங்களும் இங்கு உண்டு. இன்சூரன்ஸ் நிறுவனங்களை தேர்ந்தெடுப்பது மிக முக்கியம். நம்பகமான நிறுவனமாக இருக்க வேண்டும்.

இன்சூரன்ஸ் கம்பெனியின் அனுபவம், அவர்களது சேவை, பிறரின் நற் சான்றிதழ் இத்தனையும் சரி பார்த்து நிறுவனத்தை தேர்வு செய்ய வேண்டும். எல்லா இன்சூரன்சிலும் நாம் தேர்ந்தெடுக்கும் கேட்டகிரி, நம் நிர்ணயிக்கும் தொகை, நமக்கு சாதகமான அம்சங்கள் இதைப் பொறுத்து தான் உங்கள் ப்ரிமியம் தொகை இருக்கும். அதைகட்டாவிட்டால் அமெரிக்காவில் நீங்கள் குப்பையைக்கூட கொட்ட முடியாது. சுருக்கமாகச் சொன்னால்..

அமெரிக்காவில் நம் வாழ்க்கைக்கு கம்பெனி தரும் இல்லாள் அமைவது மட்டுமல்ல இன்சூரன்ஸ் கம்பெனி அமைவதும் இறைவன் கொடுத்த வரம். வீட்டு ஃப்ர்னிச்சர்களுக்கு இன்சூரன்ஸ் கட்டி அதை நன்கு பராமரித்து இன்சூரன்ஸ் க்ளைம் செய்யாது இருந்தால் 4 ஆண்டுக்குப் பிறகு நீங்கள் கட்டிய இன்சூரன்ஸ் தொகையில் பெரும் சதவீதம் உங்களுக்கு திரும்பக் கிடைக்கும்.. அங்கு சில இன்சூரன்ஸுகள் சேமிப்பாகவும் இருக்கிறது.

எல்லார் வீட்டிலும் மினி ஜிம் இருக்கிறது.. வீடுகள் இருக்கும் பகுதியில் ஓடுவதற்கு பெரிய கிரவுண்ட் கட்டாயம் அமைந்துள்ளது. தற்சமயம் உணவுப் பழக்கங்கள் கூட மாறிவிட்டது. இத்தனைக்கும் 12 வருடங்களுக்கு முன் அங்கு வெஜிடேரியனே கிடையாது என்ற நிலை இருந்தது. இப்போது அப்படி இல்லை. ஜங்புட் பற்றி எல்லாம் நல்ல விழிப்புணர்வு வந்திருக்கிறது. அது மட்டுமின்றி அங்கு ரிட்டயர் மெண்ட் 68வயதில் தான்.

நாற்பது ஐம்பது வயதுகள் எல்லாம் பேரிளம் வயதுகள் அங்கு 70க்கு மேல் தான் ஓல்டு மேன். அவர்களுக்கும் இந்த இன்சூரன்ஸ் தொகை ஒரு சேமிப்பே.மேலும் அங்கு உடல்நலத்தில் அக்கறை அதிகம் அதிகாலை, மதியம், மாலை இப்படி எந்நேரமும் பலர் ஜாகிங் போவதை பனிக் காலத்திலும் பார்க்கலாம். நம் தமிழர்கள் கையில் பட்டையாக ப்ளூ நிறத்தில் கட்டியிருந்த பிளாஸ்டிக் வாட்ச்சைப்பார்த்தேன்.

அது என்ன என்ற போது தினமும் அவர் நடக்கும் அடிகளை அளந்து சொல்லும் கருவி அது அதன் ரிப்போர்ட்டை கம்ப்யூட்டரில் இணைத்து பணிபுரியும் அவர்கள் கம்பெனிக்கு அனுப்பிவிட்டால் உங்கள் நடையில் எத்தனை ஸ்டெப்புகள் இருக்கோ அதற்கேற்றபடி இன்செண்ட்டிவ் உண்டு.. இதை இன்சூரன்ஸ் கட்ட பலர் பயன்படுத்திக் கொள்கிறார்கள். அவர்கள் உடல் நலத்தில் அவ்வளவு அக்கறை கொள்கிறது அந்தக் கம்பெனி.

இந்தளவிற்கு நம் மீது அக்கறை கொள்ளும் கம்பெனிக்கு நாம் என்ன கைமாறு செய்ய எனக் கேட்கிறீர்களா..? ரெண்டே வருடத்தில் வேறு கம்பெனி மாறிவிடுவது தான் அந்த கைமாறு..! ஏன்.? அதுபற்றி நாளை..

வரும்...

டாலர் Note(d)..

#நோட்டு_அடித்ததை_நோட்டம்_விட்டோம்

டாலஸ் நகரில் நண்பர் சவுந்தரிடம் இந்த ஊரில் சுற்றிப்பார்க்க முக்கியமான இடங்கள் என்னென்ன? எனக் கேட்டபோது அமெரிக்க டாலர் நோட்டு ப்ரிண்ட் பண்ற ப்ரஸ் இங்க தான் இருக்கு பார்க்குறிங்களா என்றார். கண்கள் விரிய அங்க எல்லாம் பப்ளிக் அலவ் பண்றாங்களா என்றோம் வியப்புடன்.! ஆம் என்றவர் அன்று காலையே நண்பர் நந்தாவுடன் எங்களை அனுப்பி வைத்தார். தீபாவளி பட்டாசை கையில் கொடுத்துவிட்டு சத்தமில்லாம வெடிங்க என்று சொல்வது போல வாசலில் இருந்த செக்யூரிட்டி முக்கியமாக உள்ளே காமிரா செல்போனுக்கு அனுமதி இல்லை என்றார்.. கட்டிடத்தின் நான்கு புறமும் இரும்பு வேலிகளில் மின்சாரம் பாய்ந்து கொண்டிருக்க மெயின் பில்டிங்கிற்கும் ரிசப்ஷனுக்கும் இடையே ஒரு சேப்பாக்கம் கிரவுண்ட்டே கட்டலாம்.

ரிசப்ஷன் மெட்டல் ஸ்கேனர் எங்களை கற்பழித்து புனிதமானவர்கள் என சான்றிதழ் அளிக்க உள்ளே அனுமதிக்கப் பட்டோம். உள்ளே சென்று ஒரு பஸ் ஸ்டாப்பில் நின்ற 35 விநாடி பேட்டரி கார் வந்தது.. வெளுத்த வெள்ளரிப்பழ நிறத்தில் போலீஸ்  சீருடையில் ஒரு பெண்மணி கண்ணிலேயே சிரித்து வரவேற்று வண்டியேற்றினார். 5 நிமிட பிரயாணம் மெயின் பில்டிங் உள்ளே மீண்டும் மெட்டல் யாக குண்டத்தில் இறங்கி எங்களை நிரூபித்து உள்ளே நுழைந்தோம்.. முதலில் இருந்தது இன்பர்மேஷன் சென்டர்.. அங்கு டாலர்கள் பற்றிய  அச்சிடப்பட்ட அழகிய ப்ரவுஷர்களாக இருந்தன அவை இலவசம் தான். எடுத்துக் கொண்டோம். 

அடுத்து டாலர்களின் புகைப்பட கண்காட்சி மற்றும் ரூபாய் நோட்டுகளின் பிளாக்குகள் டாலரில் உள்ள வாட்டர் மார்க்குகள் டாலர் நோட்டின் சீரியல் எண்கள் இவற்றின் மாதிரிகளை கண்டோம்.. சிலவற்றை ஐபேடுகளில் டச் செய்து நாமே பார்க்கும் வசதி இருந்தது.. அடுத்து டாலர் நோட்டு பற்றிய விநோத செய்திகள் அரங்கு.

அமெரிக்காவில் மட்டுமே டாலர் நோட்டை கிழித்து தந்தாலும் செல்லும்.. ஒரு மாடு விவசாயியின் 6000 டாலர்களை தின்றுவிட அந்த மாட்டை வெட்டி அதன் வயிற்றில் இருந்த் நோட்டுகளை சரிபார்த்து அந்த விவசாயிக்கு 5000 டாலர்களை திருப்பித் தந்த செய்தி ஆச்சர்யமாக இருந்தது.. தீ விபத்தில் பாதி எரிந்த நோட்டுகள், முழுதும் கருகியவை, கரையான் அரித்த நோட்டுகள், மழை வெள்ளத்தில் ஊறிய நோட்டுகள் இப்படி எந்த நிலையில் பணம் தந்தாலும் அதற்கு நிகரான டாலராக மாற்றித் தருகிறார்கள். அவர்கள் பணம் எந்நிலையிலும் மதிப்பு மாறாத பணம் அடுத்து டாலர் ப்ரிண்ட்டிங் செய்யும் ப்ரஸ்.. இங்கு நுழைபவர்களுக்கு ஒரு வாக்கி டாக்கி தரப்படுகிறது அதில் ஆங்கிலம் ஸ்பானிஷ் சீனம்  முதலான 8 மொழிகளில் அறிவிப்பு வரும். குறிப்பிட்ட இடத்தில் போய் நின்று அங்கு அறிவிப்பு பலகையில் உள்ள எண்ணை வாக்கி டாக்கியில் அழுத்தினால் அந்த இடத்தைப் பற்றிய அறிவிப்பை வாக்கி டாக்கியில் கேட்கலாம்.

டாலர் ப்ரிண்ட் செய்யும் இடத்தை கழுகுப் பார்வையில் பார்க்கும் படி ஏற்பாடு..புல்லட் ஃப்ரூப் கண்ணாடிகள் வழியாக துல்லியமாக தெரிந்தது. உலகின் மதிப்பு மிக்க பணம் அங்கு ஷீட் ஷீட்டாக ப்ரிண்ட் ஆகி தனித் தனியாக கட் செய்து மிஷின் மூலம் கட்டுகளாகியது. ஒரு இடத்தில் இருந்த சிறிய குவியலில் நீங்கள் பார்க்கும் குவியல் 16 மில்லியன் என எழுதியிருந்தனர். லட்சகணக்கில் அடிக்கும் கட்சி போஸ்டர்கள் போல பணம் அச்சடிக்கப்பட்டு அதை குவியல் குவியலாக அடுக்கியிருந்தனர்.. அமெரிக்காவில் இரண்டு இடங்களில் மட்டுமே டாலர் அச்சிடப்படுகிறதாம் ஒன்று வாஷிங்டன் இன்னொன்று டாலஸ்.. பலவிதமான வாட்டர் மார்க் நுணுக்கமான எண்கள் குறியீடுகள் எல்லாம் ஒவ்வொரு செக்ஷனில் பூர்த்தியாக இறுதியில் கட்டுகளாகிறது.

பிறகு டாலர் பற்றி ஒரு திரைப்பட காட்சியையும் பார்த்து விட்டு.. வெளியேறினால் டாலர் ஷாப்.. வித விதமான கீ செயின்கள், போஸ்டர்கள், டேபிள் வெயிட்டுகள், பொம்மைகள் எல்லாம் டாலர் படம் போட்டு ஒரு புறம் ப்ரிண்ட் ஆன டாலர் ஷீட் கூட விற்றார்கள்.. ஞாபகத்துக்கு ஒரு போஸ்டர் மட்டும் வாங்கினேன்.. இந்த இடத்தை பற்றி ஃபேஸ்புக்கில் எழுதப் போவதால் சில புகைப்படம் எடுத்துக் கொள்ளலாமா எனக் செக்யூரிட்டி அதிகாரியிடம் கேட்டேன். அதற்கு அவர் கஞ்சா கருப்புவை பார்த்த வீனஸ் வில்லியம்ஸ் பார்வையில் என்னை பார்த்து அதோ தூரத்தில் (சுமார் 2கி.மீ) இருக்கும் நுழைவு வாயிலில் போட்டோ எடுத்துக் கொள் என்றார் வெகு அலட்சியமாக.. கண்ணால் சிரித்த கண்ணழகி மெரிலின் தான் ஐடியா சொன்னார் கூகுளில் போட்டோ கிடைக்கும் என்று அவர் சொன்னதன்படி எடுத்து பதிவிட்டு உள்ளேன்..அவருடனும் போட்டோ எடுக்க முடியவில்லை  டாலர் பற்றி எழுத உதவி செய்த அவருக்கு அடுத்த முறை மீனாட்சி அம்மன் கோவில் டாலரை நேரில் பரிசளிக்க அந்த மீனாட்சி அருள வேண்டும்.