வெண்மணற் கடற்கரை 1

ரின் சோப் விளம்பரத்தில் வருவது போல பளிச்சிடும் வெண்மையில் ஒரு கடற்கரை! அதென்ன வெண்மை? அமெரிக்காவின் ஃப்ளோரிடா மாகாணத்திலுள்ள மியாமி போர்ட் லாடர்டேல் பீச் தான் அது.. இந்த பீச்சின் மணல் வெண்ணிறத்தில் இருக்கும் என்றார்கள்.. பீச் என்பதால் ஷார்ட்ஸ் டி-சர்ட் அணிந்து ஆவலுடன்  கிளம்பினோம்.. நண்பர் சுந்தர் தான் எங்களைக் காரில் அங்கு அழைத்துப் போனார். மாலை 3 மணி..

போர்ட் லாடர்டேல் என்னும் வரவேற்பு முகப்பை அடைந்தோம்.. மதிய நேரம் என்பதால் கூட்டம் குறைவாக இருந்தது.. பீச் மணல் பகுதியில்

இறங்கினோம்.. ஆஹா.. வெண்ணிற மணல் சுத்தம் என்றால் படு சுத்தம் ஒரு குப்பை கூட இல்லை.. கால்கள் புதைய புதைய அதில் நடந்தோம்.. கரையெங்கும் சூரியக் குளியல் எடுத்துக் கொண்டிருந்த கால்,அரை, முக்கால், முழு நிர்வாண ஆண் பெண்களைக் கடந்தோம்.

ஏற்கனவே கலிஃபோர்னியாவின் சாண்ட்டா க்ரூசில் இதையெல்லாம் பார்த்து பழகியிருந்ததால் கிளர்ச்சிகள் ஏதுமின்றி அவர்களைக் கடக்க முடிந்தது. எதிரே அலையடித்து ஆர்ப்பரித்துக் கொண்டிருந்தது அட்லாண்டிக் கடல்.. பீச் மணல் வாக்கிங் என ஒரு பயிற்சி இருக்கிறது கரையில் கால்களை அலைகள் நனைக்கும் மணற்பரப்பில் நடக்கும் பயிற்சி அது.. அந்த பயிற்சியைப் பலர் மேற் கொண்டு இருந்தனர்.

கடல் நீர் காலை நனைத்ததும் சிலிர்த்தேன்.. அந்த மதிய நேரத்திலும் சில்லென்ற ஐஸ்வாட்டர் போல் அட்லாண்டிக் குளிர்ந்து கிடந்தது. முழுவதும் நனைந்ததும் அடித்த காற்றில் உடல் நடுங்கியது ஆனால் பீச் மணலில் அடித்த வெயிலில் வந்து அமர்ந்தால் 5 நிமிடத்தில் ஆடைகள் உலர்ந்தன குளிரும் வெப்பமும் கலந்த சுகமான அனுபவம். இதுபோல பல முறை குளித்து கரையேறி ஆனந்த மடைந்தோம்.

நான்கு மணியை நெருங்க மெல்ல அங்கிருந்து நடக்க இப்போது நிறைய பேர் கூட்டம் கூட்டமாக பீச் நோக்கி வந்து கொண்டிருந்தனர் ஆங்காங்கே பீச் வாலிபால் ஆடத்துவங்கியிருந்தனர்..சுற்றுப் புறம் முழுக்க கண்ணுக்கு குளிர்ச்சியான காட்சிகள்.. ஆனால் நாங்கள் அங்கிருக்கும் ஒரு பணக்காரர்கள் குடியிருப்பு பகுதிக்கு செல்ல வேண்டியது இருந்தது.. அதென்ன பணக்கார குடியிருப்பு.! இருங்க...

(வரும்)