15. எல்லே இளம்கிளியே...
#ஆண்டாள்_பெருமை
இதற்கு முன் வந்த 14 பாடல்களில் கோபியரை எழுப்பிய ஆண்டாள் இந்த 15 வது பாடலிலிருந்து அவர்களோடு உரையாடுகிறார். ஒருவரின் குணநலன்கள் பற்றி அறிந்து நெடுநாள் பழகிய இருவர் பேசும் பேச்சில் நக்கலும் நையாண்டியும் தொனிக்கும் அல்லவா.. "நீ யாருன்னு எனக்குத் தெரியும் நான் யாருன்னு உனக்குத்தெரியும் இந்த டகால்டி வேலை எல்லாம் எங்கிட்ட வேணாம் மகனே"என்று கவுண்டமணி சொல்வது போல.
பொதுவாக இருவர் பேசிக் கொண்டிருப்பதை நாம் கவனிப்பதில்லை நிறைய சானல்களில் ரிமோட்டை தேட வைப்பது சுவாரஸ்மில்லாத பேச்சுகள் தான்.. ஆண்டாளின் இந்த பாசுரத்தின் விளக்கத்தை மட்டும் வட்டார வழக்கான சென்னைத் தமிழில் இருவர் பேசிக் கொள்வதைப் போல பார்க்கலாமா எளியவர்களின் மொழியில் படிக்கஒரு சுவாரஸ்யம் கிடைக்கும்
எயுப்புறவங்கோ : இந்தாம்மே கிளி கணக்கா இர்க்குற பொண்ணே ! எம்மாநேர்ந்தான் தூங்கிகினு இர்ப்ப?
படுத்துனு இர்க்கற பொண்ணு : ஏ.. இன்னா அல்லாரும் கீச் கீச்னு கொரல் வுடுறீங்க? கம்முனு கிடங்கோ தோ வந்துரேன்....
எயுப்புறவங்கோ : நீ மெய்யாலுமே படா கில்லாடி தாம்மே நீ இன்னா பேசுவேன்னு எங்க அல்லாருக்கும் மின்னாடியே தெர்யும்.. வுன் வாய்ல இர்ந்து இன்னா வரும்ன்னும் தெர்யும்..
படுத்துனு இர்க்குற பொண்ணு : ஆரு நானா கில்லாடி.... நீங்க தாம்மே படா கில்லாடிங்கோ! உங்க அல்லாரையும் கண்டுகினு தான் நான் கத்துகினு இருக்கேன்.....
எயுப்புறவங்கோ : தோடா... எயுந்து வராம பட்த்துகினே சொம்மா பேசிகினே இர்க்கே! சுகுரா எயுந்துரும்மே! விர்தம் இர்க்குறத வுட அப்டி உனுக்கு இன்னா பெர்ய வேல கீது?.
படுத்துனு இர்க்குற பொண்ணு : அல்லாரும் வந்துகினாங்களா?
எயுப்புறவங்கோ : அக்காங் ! அல்லாரும் வந்துகினாங்கோ!வோணும்ன்னா நீயே வந்து கரீட்டா கீதான்னு எண்ணிக்கோ....
மதுரா புரியில பெர்ய ஆனையவே பூன மேறி மிறிச்சி கொன்னவரு... எதுக்குரவன் நெஞ்சுல இர்க்குற மஞ்சா சோத்த எட்த்து அவன் ஆணவத்த உண்டுல்லைன்னு ஆக்குனபரு..அவர பத்தியே பாடினு இர்ப்போம் எயுந்து வா கண்ணு..
சென்னைத்தமிழ் பேசுபவர்கள் ஆண்டாளைப் படித்தால் இப்படித்தான் பேசுவார்களா எனக் கேட்டால் இல்லை அவர்கள் நல்ல தமிழுக்கு மாறி விடுவார்கள் என்பேன்.. ஏனெனில் பக்தியில் தமிழ் வளர்த்த தங்கத் தாரகை இதய தெய்வம் புரட்சித்தலைவி நிரந்தர முதல்வர் எங்கள் அம்மா ஆண்டாள் அருளிய பாசுரங்கள் அப்படி.
மார்கழி 15ஆம் நாள் பாடல்...
எல்லே இளம்கிளியே இன்னம் உறங்குதியோ
சில்என்று அழையேன்மின் நங்கையீர் போதருகின்றேன்
வல்லைஉன் கட்டுரைகள் பண்டேஉன் வாய்அறிதும்
வல்லீர்கள் நீங்களே நானேதான் ஆயிடுக
ஒல்லைநீ போதாய் உனக்கென்ன வேறுடையை
எல்லாரும் போந்தாரோ போந்தார்போந்து எண்ணிக்கொள்
வல்ஆனை கொன்றானை மாற்றாரை மாற்றழிக்க
வல்லானை மாயனைப் பாடேலோர் எம்பாவாய்.
16. நாயகனாய் நின்ற...
#ஆண்டாள்_பெருமை
பெரிய மனிதர்களை சந்திக்கச் செல்லும் போது அவர்களது செக்யூரிட்டிகளுக்கு நாம் பெரும் மரியாதை தருவோம் கிட்டத்தட்ட அந்த வி.ஐ.பி.யாகவே அவரும் பிகு செய்வார். இந்த பூசாரிகள் வரமளித்தால் தான் நீங்கள் கடவுளையே காண முடியும். இவ்வளவு ஏன் ஏ.வி.எம் ஸ்டுடியோ வாட்ச்மேன் காலில் விழுந்து அனுமதி கேட்ட எத்தனையோ பேர் இன்று மிகப் பெரிய பிரபலங்கள் ஆகியிருக்கின்றனர்.
இந்தப் பாடலில் விழித்தெழுந்த பெண்கள் நந்தகோபனின் மாளிகை வாசலுக்கு வந்து வாயில் காப்போனிடம் கேட்கிறார்கள் எங்கள் நாயகன் நந்தகோபனின் கொடி பறக்கும் தோரண வாயிலை காவல் காப்போனே ஆயர்குலப் பெண்கள் எங்களுக்கு வேண்டியதை தருவேன் என நேற்றே சொன்னார் மாய மணிவண்ணர் அவரை எழுப்ப வந்துள்ளோம்.
நோன்பிருந்து நீராடி தூய்மையாக வந்துள்ளோம் நாங்கள் வந்த இந்த நல்ல காரியம் நிறைவேற எங்களை உள்ளே சென்று பாட விடு அழகிய இம் மணிக்கதவின் தாழ்ப்பாளை திறந்துவிடு.. இந்த காலத்தில் இவ்வளவு இளம்பெண்கள் கூட்டமாகப் போனால் இப்படியெல்லாம் பாட வேண்டாம் வாட்ச்மேனே வாயில் ஜொள்ளு விட்டு கதவுகளைத் திறந்து இருப்பான்.
ஆண்டாளின் பாடல்களில் தமிழில் அருகி மறைந்த பல தமிழ் வார்த்தைகளை காணலாம். உதாரணமாக கொண்மூ, எழினி என்ற தமிழ் வார்த்தைகளுக்கு அர்த்தம் என்னவென்று தெரியுமா? இவை இரண்டுமே மேகத்தை குறிக்கும் தமிழ்ச் சொற்கள்.. இன்று மேகம் முகில் போன்ற வார்த்தைகள் மட்டுமே வழக்கில் உள்ளன.
இந்தப் பாடலிலும் நென்னல் என்ற வார்த்தையைக் குறிப்பிடுகிறார். நென்னல் என்றால் நேற்று என அர்த்தம், மாணிக்கவாசகரின் திருவெம்பாவையிலும் இந்த வார்த்தை வருகிறது. ஆண்டாள் எழுதிய தமிழ் நென்னலில் மட்டுமன்று என்றும் கன்னல்.
மார்கழி 16 ஆம் நாள் பாடல்...
நாயக னாய்நின்ற நந்தகோ பன்உடைய
கோயில்காப் பானே கொடித்தோன்றும்
தோரண வாயில்காப் பானே மணிக்கதவம் தாள்திறவாய்
ஆயர் சிறுமிய ரோமுக்கு அறைபறை
மாயன் மணிவண்ணன் நென்னலே வாய்நேர்ந்தான்
தூயோமாய் வந்தோம் துயில்எழப் பாடுவ
வாயால்முன் னம்முன்னம் மாற்றாதே அம்மாநீ
நேய நிலைக்கதவம் நீக்கேலோர் எம்பாவாய்.
17. அம்பரமே தண்ணீரே...
#ஆண்டாள்_பெருமை
நிச்சயிக்கப்பட்ட அத்தை மகள் திருமணத்திற்கு முன் நம் வீடு வரும் போது எடுத்தவுடன் அத்தானை கேட்காமல் மாமா சவுக்கியமா அத்தை சவுக்கியமா நாத்தனார் சவுக்கியமா என பைபாசில் பிரயாணித்து அத்தான் என்னும் ஊருக்கு வருவதற்குள் வெட்கம் பிடிங்கித்தின்னும். அதுவும் அவர்கள் சரி சரி இதுக்கு தானே இவ்வளவு சுத்தி வந்தே..எனக் கேட்கும் போது..
அங்கே கையும் களவுமாய் பிடிபட்ட நிலை ஏற்படும் இருப்பினும் அதெல்லாம் சுகமான வலி.. இங்கும் ஆண்டாள் ஒவ்வொருவராக எழுப்பி கடைசியில் கண்ணன் என்கிறார்.. அதிலும் நந்தகோபா எழுந்திரு யசோதா எழுந்திரு என எல்லாரையும் எழுப்பி கண்ணனை மட்டும் பலராமா அப்படியே உன் தம்பி கண்ணனையும் எழுப்பு என்கிறார் நாணம் ததும்ப.. அதுமட்டுமின்றி..
உண்ண உணவு, உடுக்க உடை, குடிக்க நீர் இம்மூன்றும் மனிதனுக்கு அவசியம் வேண்டும் என உலகில் முதன் முதலில் சொன்னவர் ஆண்டாளாகத் தான் இருக்க வேண்டும்.இதைக் கேட்ட ஆண்டாள் இருக்க இடம் மட்டும் ஏன் கேட்கவில்லை..? உலகில் சொந்தமாக சில சதுர அடிகள் நிலம் கிடைப்பதை விட உலகத்தை ஓங்கி தன் திருவடிகளால் அளந்த நாராயணன் காலுக்கு கீழ் ஒரிடம் கிடைத்தால் அதுவே அவருக்கு போதும்.
மார்கழி 17 ஆம் நாள் பாடல்...
அம்பரமே தண்ணீரே சோறே அறம்செய்யும்
எம்பெருமான் நந்தகோ பாலா எழுந்திராய்
கொம்பனார்க்கு எல்லாம் கொழுந்தே குலவிளக்கே
எம்பெரு மாட்டி யசோதாய் அறிவுறாய்
அம்பரம் ஊடஅறுத்து ஓங்கி உளகுஅளந்த
உம்பர்கோ மானே உறங்காது எழுந்திராய்
செம்பொற் கழலடிச் செல்வா பலதேவா
உம்பியும் நீயுன் உறங்கேலோர் எம்பாவாய்.
20. முப்பத்து மூவர்...
#ஆண்டாள்_பெருமை
திருப்பாவையில் பஞ்ச் டயலாக்.. ஆச்சர்யமாக இருக்கிறதா கண்ணனுக்கு ஆண்டாள் பஞ்ச் டயலாக் எழுதியிருக்கிறார் என்பது உங்களுக்கு தெரியுமா புயலடிச்சு பொழைச்சவன பார்த்துருக்க இந்த பூபதி அடிச்சு பொழச்சவனை பார்த்துருக்கியா ஒரு தடவை முடிவு பண்ணிட்டா எம் பேச்ச நானே கேக்க மாட்டேன்.. நான் ஒரு தடவ சொன்னா.. கண்ணா சிங்கம் சிங்கிளாத் தான் வரும் இதற்கெல்லாம் குறைவில்லாத ஒரு பஞ்ச் ஆண்டாள் வைக்கிறார்.
கடந்த பாசுரத்தில் கட்டிலில் நப்பின்னை மார் மீது தலை வைத்து கொஞ்சம் ரொமாண்டிக்காக கண்ணன் உறங்கினார் அல்லவா.. அந்த சுகத்தில் ஒரு பாட்டுக்கே எழுந்து வந்து விட்டால் நன்றாக இருக்குமா.?ஆக இந்தப்பாடல் அவர்களை எழுப்பும் 2வது பாடல்.. இந்தப்பாடலில் அவர் கண்ணனின் வீர தீர பராக்ரமத்தை சொல்லி ஆரம்பிக்கிறார்.. இதன் உள் குத்து இவ்வளவு வீரமுள்ள ஆளு நீ பொம்பளை மார்ல சாஞ்சிகிட்டு என உசுப்பிவிடத்தான்.
முப்பத்து முக்கோடி தேவர்களுக்கும் ஒரு பிரச்சனைன்னா சொல்லாம அங்க ஆஜராகுரா வீரா, ஓழுக்கத்தில நீ கில்லி, துணிச்சலா அடிப்ப சொல்லின்னு ஆரம்பிச்சு வைக்குறார் பாருங்க ஒரு பஞ்ச்.. "உன் பேரைக்கேட்டாலே எதிரிகளுக்கு காய்ச்சல் வரும் தூயவனே" அடடா என்னா ஒரு பஞ்ச் என்னா ஒரு அடைமொழி! இப்படி கண்ணனை சொல்லிட்டு கொஞ்சம் "பீப்" ஒலிக்க வேண்டிய வார்த்தைகளை நப்பின்னைக்கு வர்ணனையாகச் சொல்கிறார்.
பக்தி இலக்கியங்களில் பெண்ணின் மார்பகம், பிறப்புறுப்பு பற்றியெல்லாம் சகஜமாக எழுதிய பெண்களில் ஆண்டாளும் ஒருவர்.. அக் காலத்தில் இதெல்லாம் சாதாரணம்.. இப்போது தான் கண்ணியம் இன்றி எழுதுவது எல்லாம் பெண்ணியம் எனப் பேசுகிறார்கள். செப்புக் கவசம் போல் மார்பகங்களும்,செவ்விதழ்களும் சிறு மருங்குல் தாங்கிய இடுப்பும் உள்ள நப்பின்னையே நீ எழுந்து நோன்பிற்குரிய விசிறியையும் கண்ணாடியையும்..
உன் மணவாளனிடத்தில் தந்து எங்களுக்கு அதை தரச்செய்து எங்களை நீராட விடுவாயாக என்கிறார்.. ஒன்று நிச்சயம் பாசுரத்தில் பஞ்ச் பீப் எல்லாம்
இருப்பது தெரிஞ்சா சினிமாக்காரர்கள் இந்த பக்கம் பாய்ந்து விடும் அபாயம் இருக்கிறது.. கப்பம் செப்பம் வெப்பம் என டி.ஆருக்கும் முன்னோடியாக ஆண்டாள் இருந்து தான் ஒரு சகலகலாவல்லி என்பதை நிரூபித்து இருக்கிறார்.. யார் கண்டது அவர் காலத்தில் சினிமா இருந்திருந்தால் அதிலும் வெற்றிக் கொடி நாட்டியிருப்பார் ஆண்டாள்.
மார்கழி 20 ஆம் நாள் பாடல்....
முப்பத்து மூவர் அமரர்க்கு முன்சென்று
கப்பம் தவிர்க்கும் கலியே துயில்எழாய்
செப்பம் உடையாய் திறல்உடையாய் செற்றார்க்கு
வெப்பம் கொடுக்கும் விமலா துயில்எழாய்
செப்பென்ன மென்முலைச் செவ்வாய்ச் சிறுமருங்குல்
நப்பின்னை நங்காய் திருவே துயில்எழாய்
உக்கமும் தட்டொளியும் தந்துஉன் மணாளனை
இப்போதே எம்மை நீராட்டேலோர் எம்பாவாய்.
21. ஏற்ற கலங்கள்...
#ஆண்டாள்_பெருமை
கறந்தபால் அடுப்பின்றி பொங்குமா? பொங்கும் என்கிறார் ஆண்டாள். வழக்கம் போல கண்ணனுக்கு இக்காலத்து அரசியல் தலைவர்களுக்கு ப்ளக்ஸ், பேனர், போஸ்டர், ஆர்ச்சில் கொடுக்கும் அடை மொழி போல் அவர் காலத்து வாசகங்களுடன் போற்றிப் பாடிப் புகழ்ந்து எழுப்புகிறார்.
19ஆம் நாள் 20ஆம் நாள் ஆகிய இரண்டு நாட்களும் பாடிய பாசுரங்கள் கேட்டு கண்ணன் எழுந்திருக்கவில்லை.. இப்போது என்ன செய்வது? சரண்டர் தானே! அதையும் அழகான உவமையுடன் சொல்லி ஆண்டாள் அடையும் சரணாகதியைப் பாருங்கள்.
பசுவிடம் இருந்து பால் கறக்கும் போது அதன் மடியில் இருந்து பாத்திரத்தின் அடியில் வேகமாக விழும் பால் அதிவேகமாக மேலேறி பொங்குகிறது.. (இந்த உவமை நியூட்டனின் விதியை நினைவு படுத்துகிறது)அப்படியென்றால் எவ்வளவு பால்வளம்! எவ்வளவு ஆரோக்கியமான பசுக்கள். இதுபோல பல பசுக்கள் வைத்திருக்கும் நந்தகோபரின் மகனே.
உலகை காப்பவனே, பெரிய மனிதனே, அவதாரப் புருஷனே,ஒளிவடிவனே, நீ தூங்கலாமா? உன் எதிரிகள் கூட உன் பலம் அறிந்து உன்னுடன் மோத பயந்து உன் வாசல் வந்து காத்திருப்பது போல அடியவர்கள் நாங்களும் உன் வாசலில் வந்து உன்னைப் புகழ்ந்து பாட காத்து நிற்கின்றோம்.. நீ எழுந்து எமக்கு அருள் புரிவாய்.
ஆண்டாள் கோபமாய், தாபமாய், செல்லமாய், காதலாய், ஊடலாய் கண்ணனைப் பாடுபவர். எதற்கும் மசியவில்லை என்றால் படாரென்று கண்ணனின் காலில் விழுந்துவிடுவாள்.. அவள் ஆதாயத்திற்காகவும் பதவிக்காகவும் இன்றைய அமைச்சர்கள் போல் காலில் விழுபவள் அல்ல.. கண்ணன் மேல் காதலில் விழுந்தவள்.
மார்கழி 21 ஆம் நாள் பாடல்...
ஏற்ற கலங்கள் எதிர்பொங்கி மீதளிப்ப
மாற்றாதே பால்சொரியும் வள்ளல் பெரும்பசுக்கள்
ஆற்றப் படைத்தான் மகனே அறிவுறாய்
ஊற்றம் உடையாய் பெரியாய் உலகினில்
தோற்றமாய் நின்ற சுடரே துயில்எழாய்
மாற்றார் உனக்கு வலிதொலைந்துஉன் வாசற்கண்
ஆற்றாது வந்துஉன் அடிபணியு மாபோலே
போற்றியாம் வந்தோம் புகழ்ந்தேலோர் எம்பாவாய்.
22. அங்கண்மா ஞாலத்து...
#ஆண்டாள்_பெருமை
ஹே.ஹே.ஹே.. இந்த பாஷா யாருக்கும் கெட்டது செய்யமாட்டான்.. தன்ன நம்பி வந்தவங்கள கைவிடவே மாட்டான்.. என்னை நம்பாம கெட்டவங்க அதிகம்.. நம்பிக் கெட்டவங்க யாருமில்லை இப்ப முடிவு பண்ணிக்கோங்க இந்த மாணிக் பாஷாவா இல்ல அந்த மார்க் ஆண்டனியா.? இப்படி பாஷா படத்தில் ரஜினி கேட்டதும் எல்லா பெரிய டான்களும் பாஷாவை கையில் முத்தமிட்டு ஏற்றுக் கொள்ளும் காட்சி நினைவிருக்கிறதா.!
அப்படி ஒரு காட்சியை ஆண்டாளும் பாசுரத்தில் வைத்திருக்கிறார் உலகின் பெரும் அரசர்கள் யாவரும் திருமால் வசம் சரணடைய அவன் காலடியில் வந்து காத்திருக்கிறார்கள் என்று. பார்த்தால் பசி தீரும்.. பாவம் தீருமா.? கண்ணனின் கண் பார்வை நம்மீது பட்டால் அது சாத்தியம் என்கிறார் அதற்கு அவனைச் சரணாகதி அடைவதைத்தவிர வேறு வழியில்லை என்கிறார் ஆண்டாளின் உவமைத் திறன் மிளிரும் மற்றொரு பாடல் இது.
அலைகள் தாலாட்ட திருப்பாற்கடலில் பள்ளி கொண்டிருக்கிறார் நாரணன் அவரைக் காண உலகை கட்டியாளும் பெரிய சக்ரவர்த்திகள் அனைவரும் தங்கள் பராக்கிரமத்தை மறந்துவிட்டு அக்கடலோரம் வந்து அவன் செம்பாதங்களை தொழுது நிற்கிறார்கள். அவர்களோடு அடியவர்களாகிய நாங்களும் நிற்கின்றோம் எங்களை மெல்ல கண் திறந்து பார் கண்ணா என சொல்லி வைக்கிறார் பாருங்கள் ஒரு உவமானம்.அடடா என்ன அழகு.!
மெல்லக் கண்விழிப்பாய் கண்ணா மெல்ல மெல்ல... ஒரு கால் சலங்கை மணியின் வாய் பிளவு போல.. செந்தாமரைப் பூ மலர்வதைப் போல மெல்லக் கண் திற என்கிறார்.. எவ்வளவு அழகியல் பாருங்கள்.. சூரியனும் சந்திரனும் ஒன்றாக உதித்தது போல நீ விழித்து உன் பார்வை எங்கள் மீது பட்டால் நாங்கள் செய்த பாவங்கள் அனைத்தும் தொலைந்து போய்விடும் என்கிறார். இது ஆண்டாள் கண்ணனை துயில் எழுப்பும் மூன்றாம் நாள் பாடல்.
எனக்கென்னவோ 3 நாட்களுக்கு முன்பே விழித்துக் கொண்ட கண்ணன் ஆண்டாளின் தமிழமுதைப் பருகுவதற்காகத்தான் தூங்குவது போல நடிக்கிறான் என்றே நினைக்கிறேன். அவன் பொல்லாத கள்வன் அல்லவா. படிக்கும் நமக்கே இவ்வளவு இன்பமென்றால் பாடு பொருளான அவனுக்கு! நிஜத்தில் கண்ணனைக் கட்டிப் போட்டது யசோதையல்ல ஆண்டாள் தான்.
மார்கழி 22 ஆம் நாள் பாடல்...
அம்கண்மா ஞாலத்து அரசர் அபிமான
பங்கமாய் வந்துநின் பள்ளிக்கட் டிற்கீழே
சங்கம் இருப்பார்போல் வந்து தலைப்பெய்தோம்
கிங்கிணி வாய்ச்செய்த தாமரைப் பூப்போலே
செங்கண் சிறுச்சிறிதே எம்மேல் விழியாவோ
திங்களும் ஆதித் தியனும் எழுந்தாற்போல்
அம்கண் இரண்டும்கொண்டு எங்கள்மேல் நோக்குதியேல்
எங்கள்மேல் சாபம் இழிந்தேலோர் எம்பாவாய்.
23. மாரிமலை முழைஞ்சில்...
#ஆண்டாள்_பெருமை
சிங்கத்தை நீ காட்டுல பார்த்துருப்ப சர்க்கஸ்ல பார்த்துருப்ப டிவில பார்த்து இருப்ப படத்துல பார்த்துருப்ப நேர்ல பார்த்துருக்கிறியா பாக்குறியா பாக்குறியா என சிங்கம் படத்தில் ஹைடெசிபலில் சூர்யா பேசும் வசனம் நினைவிருக்கிறதா.! அதுபோல எந்த மீடியாவும் இல்லாத காலத்திலேயே சூர்யா போல கத்தாமல் அதிகாலையில் துயிலெழுப்பும் வகையில் மென்மையாய் ஆண்டாள் பாடுகிறார் கண்ணன் எனும் ஆண் சிங்கத்தைப் பற்றி.
அடைமழைக் காலத்தில் தன் மலைக்குகையில் உறங்கி ஓய்வெடுத்த சிங்கம் அக்காலம் முடிந்ததும் விழித்தெழுந்து கண்ணில் தீ பறக்க வீரமாய் ஒரு பார்வை பார்த்து அதன் பிடரியை சிலிர்த்து உடம்பை உதறி நெட்டி முறித்து நான்கு பக்கமும் பார்த்து பின் கம்பீரமாக கர்ஜித்து தன் குகையை விட்டு வெளியேறுவது போல காயாம்பூ நிறக் கண்ணா நீயும் எழுவாயாக.
உன் பரந்த மாளிகையிலிருந்து வெளியேறி உனக்காக போட்டு இருக்கும் சிங்காசனத்தில் அமர்ந்து நாங்கள் உன்னிடம் கேட்டதை சீர் தூக்கிப் பார்த்து எங்களுக்கு வரமருள வேண்டும் என்கிறார். இதில் ஆச்சர்யமான விஷயம் அந்த காலத்திலேயே ஆண்டாளுக்கு சிங்கங்கள் பற்றித் தெரிந்திருந்தது.. இந்தியாவின் புவியியல் அமைப்புப்படி குஜராத் மாநிலத்துக் காடுகள் தான் சிங்கங்கள் வாழ்வதற்கான சூழல் அமையப் பெற்றவை
தமிழகத்திலோ ஶ்ரீவில்லிப்புத்தூரிலோ சிங்கங்கள் வாழ்ந்திருக்க வாய்ப்பில்லை.. இருப்பினும் மலைக் குகையில் இருந்து வெளிப்பட்ட சிங்கம் என்பது அவர் காலத்து யாத்ரீகர்கள் யாரோ சொல்லக் கேட்டு எழுதி இருக்கலாம் இருப்பினும் அதன் பார்வை அதன் சுபாவம் இதெல்லாம் கேட்டு உள்வாங்கி கற்பனையில் இப்படி எழுதியதும் மிகுந்த ஆச்சர்யம் தான். சிங்கத்தின் பிடரி மயிர்க்கு வேரி மயிர் எனப்பெயர்.
அது வேர்க்கும் போது ஏற்படும் அரிப்பில் தான் அது தலையை சிலிர்க்குமாம்.. சிங்கக் கூட்டத்து தலைவனை அதன் பிடரி மயிர் மணத்தை கொண்டு தான் பிற சிங்கங்கள் தெரிந்து கொள்ளுமாம்.. இந்த அறிவியல் எல்லாம் தாண்டி ஆண்டாள் கண்ணனை சிங்கம் எனப்பாட நரசிம்ம அவதாரம் தான் இன்ஸ்பிரேஷனாக இருந்திருக்கும். அவர் ஓங்கி அளந்தா உலகமே மூன்றடி தானே.
மார்கழி 23 ஆம் நாள் பாடல்...
மாரி மலைமுழைஞ்சில் மன்னிக்
சீரிய சிங்கம் அறிவுற்றுத் தீவிழித்து வேரி
மயிர்பொங்க எப்பாடும் பேர்ந்துஉதறி
மூரி நிமிர்ந்து முழங்கிப் புறப்பட்டுப்
போருமா போலேநீ பூவைப்பூ வண்ணாஉன்
கோயில்நின்று இங்ஙனே போந்தருளிக் கோப்புடைய
சீரிய சிங்கா சனத்துஇருந்து யாம்வந்த
காரியம் ஆராய்ந்து அருளேலோர் எம்பாவாய்.
24. அன்று இவ்வுலகம்...
#ஆண்டாள்_பெருமை
இப்பாடலில் ஆண்டாள் கிருஷ்ணலீலைகளையும் பிற அவதாரங்களையும் அவர் செய்த வதங்களையும் போற்றிப் பாடுகிறார். சண்டைக்கு பாட்டா.? சென்னை குப்பங்களில் பாட்டுப் பாடிக் கொண்டு போடும் குஸ்திச் சண்டை இருந்தது. சண்டையிடுபவர் தன்னைப்பற்றி பெருமையாகப் பாடிக் கொண்டே சண்டையிடுவார்கள். இது மதுரைப் பகுதிகளிலும் சிலம்புச் சண்டையில் உண்டு. நான் தான் உங்கொப்பன்டா, நல்லமுத்து பேரன்டா..
வெள்ளிச் சிலம்பெடுத்து விளையாடப் போறேண்டா எனத் தொடங்கும் பாடல் கேட்டு இருப்பீர்கள்.. பெருமாளின் அவதாரச் சண்டைகளை பிறர் செருக்கை அழித்தசெயலை அப்படியே ஒரு மெட்ராஸ் குப்பத்து ஆள் ஒருத்தர் தன் தலைவனை பார்த்து அவர் அருமை பெருமையை புகழ்ந்து பாடினா எப்படி இருக்குமோ அப்படி இந்தப்பாடலை யோசித்தேன் அட இந்தத் தமிழிலுமே இப்பாடல் படா சோக்காகீதுப்பா.
அன்னிக்கு ஒரு தபா காலாலெயே ஒல்கத்த அள்ந்தவுரே! உன் காலத் தொட்டு கும்புட்டுக்றோம்.. சிலோனுக்கு போயி அங்க ராபணன் கதய முட்ச்சவரே! உனுக்கு இர்க்குற தில்ல நென்ச்சு பெர்மப்படுறோம்.. சனியன் சகடய எட்டி மிறிச்சவரே உன்ய புகய்ந்து பாடுறோம்.. கன்னுக்குட்டி மேறி வேசங் கட்டிகினு வந்த வத்சாசுரன அப்டியே கபால்ன்னு கால புட்ச்சு தூக்கி
பக்கத்துல மரம் மேறி வேசம்கட்டி நின்னுகினு இர்ந்த கபித்தாசுரன் மேல்ய விசிறி அட்ச்சி ஒர்யே கல்லுல ரெண்டு மாங்கா அட்சா மேறி ரெண்டு பேரியுமே காலி பண்ணவரே! உன் பாதத்தில மாட்டினு இருக்குற வீரகழல தொட்டு கும்புட்டுக்றோம்: கோகுலத்துல குடபுட்ச்சது கணக்கா அப்டியே ஏக் தம்முல அலேக்கா மலய தூக்கி மக்கள காப்பாத்ன கோவர்த்தனரே.! உன் பாசமான கொண்த்த நென்ச்சு பெர்மப்படுறோம்!
உனுக்கு எதிரியா எப்டியாப்பட்டவன் வந்து நின்னாலும் கெலிக்குற உன் வேல் கம்ப புகயறோம் இப்டி ஒன் அல்லா பெர்மயயும் வீர தீரத்தயும் பறயட்ச்சு பாடிகினு இர்க்கதான் இங்க வந்தோம்.. எங்க மேல இர்க்கம் காட்டி ஒன் அருள கொட்த்துடு சாமி... ஆண்டாளம்மா எம்மா அயகா சொல்லிக்கீறாங்க இல்ல..! நாளிக்கு பாக்கலாம்... வர்ட்டா..
மார்கழி 24 ஆம் நாள் பாடல்...
அன்றுஇவ் உலகம் அளந்தாய் அடிபோற்றி
சென்றங்குத் தென்இலங்கை செற்றாய் திறல்போற்றி
பொன்றச் சகடம் உதைத்தாய் புகழ்போற்றி
கன்று குணில்ஆ வெறிந்தாய் கழல்போற்றி
குன்று குடையாய் எடுத்தாய் குணம்போற்றி
வென்று பகைகெடுக்கும் நின்கையில் வேல்போற்றி
என்றென்றுன் சேவகமே ஏத்திப் பறைகொள்வான்
இன்றுயாம் வந்தோம் இரங்கேலோர் எம்பாவாய்.
25. ஒருத்தி மகனாய்...
கவிஞர் கண்ணதாசன் கண்ணன் மீது அபிமானம் கொண்ட ஆண் ஆண்டாள் கண்ணனை சிலாகித்தவர் முத்தையா என்னும் தன் இயற்பெயரைக் கண்ணதாசன் என மாற்றிக்கொண்டவர். தனித்துவமான கவிதைகள் பல எழுதியவர் ஆண்டாளின் வரிகளையும் உரிமையுடன் தன் பாடலில் எடுத்துக் கொண்டார்.. எம்.ஜி.ஆர் படமான தாய் சொல்லைத் தட்டாதே படத்தில் இடம் பெரும் பாடலில் ஆண்டாளின் இப் பாசுர வரிகள் உள்ளது.
ஒருத்தி மகனாய் பிறந்தவனாம்... என்ற பாடல் இந்தப் பாடல் கவிஞரின் சொந்த வாழ்க்கைப் பற்றிய பாடல் என்போரும் உண்டு. முத்தையா என்ற கண்ணதாசன் பெற்ற தாய் தந்தையரால் சுவீகாரம் கொடுக்கப்பட்டவர்.. அவர் ஒருத்தி மகனாகப் பிறந்து ஒருத்தி மகனாக வளர்ந்தவர் என்பார்கள் எது எப்படியோ கண்ணனது வாழ்வும் கண்ணதாசன் வாழ்வும் ஒன்றுபோல அமைந்தது விட்டது ஆச்சரியம் தான். இப்போது ஆண்டாளுக்கு வருவோம்.
தாய்மாமன் கம்சனால் சிறைவைக்கப்பட்ட தேவகி என்னும் ஒருத்திக்கு மகனாகப் பிறந்து அதே இரவில் யமுனையைக் கடந்து யசோதையிடம் அடைந்து அந்த ஒருத்தியின் மகனாக மறைவாக வளர்ந்தவனே.. நீ உயிருடன் இருப்பது தெரிந்து கஞ்சன் வயிறு எரிவது போல கம்சன் வயிறு எரிய அவன் இழைத்த தீங்குகளை தவிடு பொடியாக்கினாய்.. வானுக்கும் பூமிக்கும் நெடுந்துயர்ந்த திருமாலே உன்னை நினைத்து உருகினோம்.
நாங்கள் விரும்பிய பறையை அருளினால் அதையிசைத்து உன் வீரத்தையும் செல்வத்தையும் வாயாரப் பாடி எங்கள் வருத்தம் தொலைத்து மகிழ்வோம். கண்ணனை வாயாரப்பாடினாலே வருத்தம் தொலையுமாம். கண்ணனின் விளம்பரத் தூதுவரான ஆண்டாள் எல்லா பாசுரத்திலும் சொல்வது ஒன்று தான். கண்ணனை நினைத்து அவன் புகழ் பாடி சரணாகி துதித்தால் உங்கள் "கீர்த்திக்கு நான் கேரண்டி" என உத்திரவாதம் அளிக்கிறார் ஆண்டாள்.
தாய் சொல்லைத்தட்டாதே என்ற படத்தில் வரும் கவிஞரின் பாடல் MGR க்கு எழுதியது.. ஆனால் பாடலின் அந்த வரிகள் அப்படியே கண்ணனுக்கும் பொருந்தும்படி கவிஞர் எழுதியிருப்பதை கேட்க கீழுள்ள லிங்க்...
மார்கழி 25 ஆம் நாள் பாடல்...
ஒருத்தி மகனாய்ப் பிறந்துஓர் இரவில்
ஒருத்தி மகனாய் ஒளித்து வளரத்
தரிக்கிலான் ஆகித்தான் தீங்கு நினைந்த
கருத்தைப் பிழைப்பித்துக் கஞ்சன் வயிற்றில்
நெருப்பென்ன நின்ற நெடுமாலே உன்னை
அருத்தித்து வந்தோம் பறைதருதி யாகில்
திருத்தக்க செல்வமும் சேவகமும் யாம்பாடி
வருத்தமும் தீர்ந்து மகிழ்ந்தேலோர் எம்பாவாய்.
26. மாலே மணிவண்ணா...
#ஆண்டாள்_பெருமை
மனிதர்கள் கடவுளிடம் வேண்டும் போது என்ன கேட்பார்கள்? பி.எம்.டபிள்யூ கார், பெரிய பங்களா, தங்கம், வைரம், கோடி கோடியாய் பணம், பெயர், புகழ், நீண்ட ஆயுள் , தோட்டம் துரவு, நிறைவான செல்வம் என அவர்கள் லிஸ்ட் பெரிது. ஆனால் ஆண்டாள் இவற்றில் ஒன்று கூட கேட்கவில்லை! அவளது லிஸ்ட்டில் இதெல்லாம் தேவைப்படவில்லை! அதை படிப்போமா.
மணிவண்ணா.. இந்த மார்கழி நீராட எமக்கு எம் முன்னோர்கள் செய்த நெறிகளில் என்ன வேண்டும் என நீ கேட்டால்.. இந்தா என் பட்டியல்.. உலகம் அதிர முழங்கும் உன் பாஞ்சசன்யம் போல பல வெண்சங்குகள் வேண்டும், பெரும் ஒலி தரும் பறைகள் வேண்டும், பல்லாண்டு உன்னைப் போற்றிப் பாடிட ஓதுவார்கள் வேண்டும், அழகிய விளக்குகள் வேண்டும், கொடி மரங்கள் வேண்டும், அக் கொடி மரத்தில் கட்டிட வெண் சீலைகள் வேண்டும்..
ஆலிலைக் கண்ணா இவையெல்லாம் எமக்கு அருளினாலே போதும்.. தட்ஸ் ஆல்.. பாருங்கள் இதில் ஏதாவது ஒரு இடத்திலாவது சராசரி மனிதனின் ஒரு ஆசையாக இருக்கிறதா என்று.. அவருக்கு ஒரே ஆசை கண்ணன் தான்.. தனக்கு கிடைக்கும் செல்வத்தையும் புகழையும் விட கண்ணனைப் புகழ்ந்து பாடிட இப்பொருட்களே போதும் என்கிறார் மிகச் சிம்பிளாகவும் ஹம்பிளாகவும்.
மார்கழி 26ஆம் நாள் பாடல்...
மாலே மணிவண்ணா மார்கழிநீ ராடுவான்
மேலையார் செய்வனகள் வேண்டுவன கேட்டியேல்
ஞாலத்தை எல்லாம் நடுங்க முரல்வன
பால்அன்ன வண்ணத்துஉன் பாஞ்ச சன்னியமே
போல்வன சங்கங்கள் போய்ப்பா டுடையனவே
சாலப் பெரும்பறையே பல்லாண்டு இசைப்பாரே
கோல விளக்கே கொடியே விதானமே
ஆலின் இலையாய் அருளேலோர் எம்பாவாய்.
27. கூடாரை வெல்லும்...
#ஆண்டாள்_பெருமை
இந்த காலத்து மாடர்ன் பெண்கள் ஜீரோ டயட் என்னும் பேரில் கொலை பட்டினி கிடந்து பொடி டப்பாவில் எல்லாம் லஞ்ச் கொண்டு செல்வதைப் பார்க்கிறோம்.. ஆண்டாள் காலத்திலெல்லாம் இப்படி டயட் கிடையாது ஆண்டாள் கேட்கும் சாப்பாடு என்ன தெரியுமா தட்டு நிறைய பால் சோறு இட்டு அதிலே கரண்டி கரண்டியாய் நெய்யை விட்டு அந்த பாலும் நெய்யும் முழங்கை வழியே சர்ரென சரிவில் இறங்கும் சைக்கிள் போல வழிய வழிய சாப்பிட வேண்டும் என்கிறார். எவ்வளவு கொழுப்புச்சத்து மிகுந்த உணவு.!
ஏற்கனவே பாலாம் அதுல நெய்யாம்.. இதெல்லாம் ஆயர்பாடியில் உள்ள பசுக்களின் பால் வளத்தையும் அவர்களுக்கு இதெல்லாம் அன்று விலை அதிகம் உள்ள பொருளாக இருந்திருக்காது என்பதும் தெரிகிறது. அன்று எல்லாமே ஹோம் மேட்.. நாம தான் இப்ப ஜங்புட் பிடியில் இருக்கிறோம். சோறு மட்டும் ஆடம்பரமாக இருந்தா போதுமா?அதை சாப்பிடப்போறவங்க அலங்காரமா இருக்க வேணாமா! அந்த சாப்பாட்டை சாப்பிடப் போகும் முன் என்னென்ன ஆடைகள் என்னென்ன ஆபரணங்கள் அணியவேண்டும்.?
இதோ காஸ்ட்யூம் & பேஷன் டிசைனராக மாறி ஆண்டாள் ரெஃபர் செய்கிறார்.. கைகளில் அணிய தங்கவளைகள், இருதோளிலும் அணிய கைவங்கிகள், தங்கப்பூ போன்ற பெரிய தோடுகள், அதற்கு மாட்டல்கள், காலணிகள், இன்னும் பல நகைகள் அதுக்கு மேட்ச்சா உயர்ந்த ஆடைகள் இப்படி ஜோய் ஆலுக்காஸ் மாடல் போல கிளம்பி வந்து அதன் பிறகு தான் அந்த பால்சோறை அனைவரும் ஒன்றாகக் கூடி பின்பு சாப்பிடணுமாம். இத்தனையையும் பகைவரையெல்லாம் வெல்லும் கோவிந்தனைப் பாடி..
பயனைடைந்து நாங்கள் பெறும் பரிசுகள் என்கிறார். அது சரி தினமும் பாலும் நெய்யும் சாப்பிடும் பெண் உருவத்தில் பிந்துகோஷாக அல்லவா இருப்பாள்.. பின் ஏன் ஆண்டாள் அப்படிக் கேட்டார்..!பருத்திவீரன் படத்தில் ப்ரியாமணியை அவரது தந்தை வயது வந்த பெண்பிள்ளை என்றும் பார்க்காமல் மூர்க்கமாக தாக்குவார்.. அவர் அடித்து முடித்ததும் ஆவேசமாக ப்ரியாமணி பாட்டி கையிலிருந்த சாப்பாட்டுத் தட்டை வாங்கி அதிலிருக்கும் கறிச்சோற்றை அள்ளியள்ளி தின்று கொண்டே பாட்டியிடம் சொல்லுவார்..
இந்த அடி எல்லாம் தாங்க உடம்புல தெம்பு வேணாம்.. இன்னும் ரெண்டு கறியை போடு என்பார். அதே போலத் தான் சதா கண்ணனை நினைத்து நினைத்து உருகி உருகி அந்த ஏக்கத்தில் நிற்கவும் அவன் புகழ் பாடவும் ஒரு தெம்பு வேண்டுமல்லவா.. அவனை உருகி நினைக்க நினைக்க உடம்பில் சேரும் போஷாக்கும் உடலில் தேங்காமல் கரைந்தோடி விடும் அல்லவா.. ஆகவே நெய்யும் பாலும் கூட ஆண்டாளுக்கு ஜீரோ டயட் தான்.
மார்கழி 27 ஆம் நாள் பாடல்...
கூடாரை வெல்லும்சீர் கோவிந்தா உந்தன்னைப்
பாடிப் பறைகொண்டு யாம்பெறும் சம்மானம்
நாடு புகழும் பரிசினால் நன்றாகச்
சூடகமே தோள்வளையே தோடே செவிப்பூவே
பாடகமே என்றனைய பலகலனும் யாம்அணிவோம்
ஆடை உடுப்போம் அதன்பின்னே பாற்சோறு
மூடநெய் பெய்து முழங்கை வழிவாரக்
கூடி இருந்து குளிர்ந்தேலோர் எம்பாவாய்.
28. கறவைகள் பின்சென்று...
#ஆண்டாள்_பெருமை
"மன்னிப்பு..ஏய்..தமிழ்ல எனக்கு பிடிக்காத ஒரே வார்த்தை" கேப்டனின் புகழ் பெற்ற பஞ்ச் டயலாக் இது.. கோலிவுட் ரமணாவுக்கு வேண்டுமானால் இது பிடிக்காமல் இருக்கலாம் ஆனால் கோகுலத்து ரமணனுக்கு அது மிகப் பிடிக்கும் என்கிறார் ஆண்டாள். சரி ஏன் மன்னிப்பு கேட்க வேண்டும்? தவறு செய்ததால்.. ஏன் தவறு செய்ய வேண்டும்..? அது தெரிந்து செய்தது அல்ல தெரியாமல் நடந்தது..ஆக்சுவலி எங்க குலத்தோட குவாலிட்டி தெரியுமா.?
காலையில மாடு கன்னு மேய்க்க ராமராஜன் மாதிரி பாடிக் கிட்டே கிளம்புவோம் பசிச்சா இருக்கிறதை பகிர்ந்து கிட்டு லஞ்ச் சாப்பிடுவோம்.. நாங்க அவ்வளவா அறிவு அதிகமில்லாத படிக்காத இடையர் குலத்து ஆளுங்க..ஆனா நீ.. எங்க குலத்துல குறையில்லாம பிறந்த கோவிந்தன் பெரிய அறிவாளி.. நீ எங்க குலத்துல பிறந்ததே பெரும் புண்ணியம் உனக்கும் எங்களுக்கும் இருக்குற உறவை யாராலும் பிரிக்கவே முடியாது.
இதையும் மீறி சின்னப் புள்ளத்தனமா நாங்க எதாவது பேசியிருந்தாலோ இல்ல உன்னை தப்பா பேர் சொல்லிக் கூப்பிட்டு இருந்தாலோ அதுக்கெல்லாம் கோவப்படாம நாங்க செஞ்சத எல்லாம் மன்னிச்சு நாங்க கேட்டதை கொடுத்துடு அப்படி கொடுத்துட்டா அதுவே போதும் உன்னையே நினைச்சு பாடிகிட்டு இருக்கிறத வுட வேற என்னத்தசெஞ்சிடப்போறோம்.
ஆண்டாள் கண்ணனிடம் அறியாமல் செய்த தவறுக்கெல்லாம் மன்னிப்பு கேட்கிறார். அவன் மன்னிப்பான் என்று ஆணித்தரமாக நம்புகிறார். மன்னிப்பு கேட்கிறவன் மனுஷன் மன்னிக்க தெரிஞ்சவன் பெரிய மனுஷன்ன்னு சொல்லுவாங்க.. முதலில் தான் ஒரு மனிதன் என்பதை மன்னிப்புக் கேட்டு நிரூபிக்கிறார் ஆண்டாள்.. நிச்சயம் அவன் மன்னிப்பான்னு அவளுக்கு நன்றாகத் தெரியும்.. ஏன்னா ரமணன் பெரிய மனுஷன் அல்லவா.
மார்கழி 28 ஆம் நாள் பாடல்...
கறவைகள் பின்சென்று கானம்சேர்ந்து உண்போம்
அறிவுஒன்றும் இல்லாத ஆய்க்குலத்து உந்தன்னைப்
பிறவி பெறுந்தனைப் புண்ணியம் யாம்உடையோம்
குறைஒன்றும் இல்லாத கோவிந்தா உந்தன்னோடு
உறவேல் நமக்குஇங்கு ஒழிக்க ஒழியாது அறியாத
பிள்ளைகளோம் அன்பினால் உந்தன்னை
சிறுபேர் அழைத்தனமும் சீறி அருளாதே
இறைவாநீ தாராய் பறையேலோர் எம்பாவாய்.
29. சிற்றம் சிறுகாலே...
#ஆண்டாள்_பெருமை
மார்கழி முடிய இன்னும் 1நாள் தான் இருக்கு கடந்த 28 நாளா பாடுறோம்.. ஒரு வேளை எதுக்கு இந்த பாட்டெல்லாம் கண்ணனுக்கு புரியலையோ.? டாடி எனக்கு ஒரு டவுட்டு போல சந்தேகம் எழுகிறது ஆண்டாளுக்கு.. அம்மாவின் அமைச்சரவை அமைச்சர் போல கண்ணன் பதிலே பேச மாட்டேங்குறாரே! ஏன்?சரி விஷயத்தைக் கேட்டுட வேண்டியது தான்.
அது மட்டுமல்ல இந்த 29 வது நாள் பாடலில் வித்யாசமான ஒரு சின்ன வேண்டுகோள் வைக்கிறார். மனதில் படும் ஆசைகளுக்கு காவல் வைக்கச் சொல்கிறார்.. ஆசைக்கு காவலா.! ஆண்டாள் ஆட்டையில இது புதுசா இல்ல இருக்கு.. என்கிறீர்களா.. ஆம் அந்தக் காவலும் எதற்கு என்றால் ஆண்டாளின் காதல் மேம்படவே.. புரியலையா? சரி வாங்க சொல்றேன்.
இந்தாப்பா கண்ணா தினம் அதிகாலையில வந்து உன் காலில் விழுந்து உன்னை கும்பிடுறோம் இதுக்கான காரணம் என்னான்னு இப்ப கேட்டுக்கோ.. நாங்க எல்லாரும் பசுமாடு மேய்ச்சு கிட்டே பாட்டுப் பாடி கட்டுச் சோறு சாப்பிட்டு ஜீவனம் நடத்துற ஆயர் குலத்தவங்க ஆனா நீயோ பெருமையான கடவுள்.. நீ பந்தா எதுவும் இல்லாம எங்க குலத்தில் வந்து பிறந்த பாரு நாங்க அதுக்கு தான் இப்படிச் செய்யறோம்.
உன்கிட்ட இருந்து கொடுன்னு கேட்டு அதை வாங்கிகிட்டு போக மட்டும் நாங்க வரலை உனக்கு ஏதாவது ஒரு சின்ன உதவியாவது நாங்க பதிலுக்கு பண்ணணும் இல்லியா? இல்லாட்டி அது எங்களுக்கு பெரிய அவமானம்.. உனக்கு எடுபிடியா இருந்து சின்னச் சின்ன வேலைன்னாலும் சரி எங்களை அதைச் செய்யவிடு.. இந்த ஜென்மம் இல்ல இன்னும் ஏழேழு ஜென்மம்...
எடுத்தாலும் உன்னுடன் சேர்ந்தவங்களாக தான் இருப்போம் உனக்கே பணி செய்து கிடப்போம்.. கடைசியா ஒண்ணு கேக்குறோம் எங்களக்கு இதைத்தவிர வேற ஆசை ஏதாவது வந்தா அப்படி ஒரு நெனப்பே வராத மாதிரி நீ அருள் செஞ்சா போதும்.எப்படி பாருங்க கண்ணனை நினைப்பதை தவிர வேறு ஆசைகள் வேண்டாமாம். வந்தாலும் அதை அகற்றணுமாம்.
அதாவது உன்னை நினைக்கிற இந்த மனசுல வேற நினைப்பே வரக்கூடாது எங்கள் ஆசைக்கு காவல் இரு வேறு ஆசைகள் வந்தா உள்ள விட்டுறாதே.. இப்ப கண்ணன் தான் ஜாக்கிரதையா இருக்கணும் அப்படி வேற நினைப்பு வந்தா அவரது காவல் சரியில்லைன்னு அர்த்தம் ஆகிடுமே..
நாங்க உன்னை தாம்பா நினைச்சுட்டு இருக்கோம் வேற நினைப்பு வந்தா அதுக்கு நாங்க பொறுப்பு இல்ல.. அப்பா கோவிந்தா.. நாங்க சொல்ல வந்தது சுருக்கமா இது தான் The ball is in your court இதை அந்த நூற்றாண்டிலேயே அழகுத்தமிழில் சொல்லி வைத்திருக்கிறார் ஆண்டாள்.
மார்கழி 29 ஆம் நாள் பாடல்...
சிற்றம் சிறுகாலே வந்துஉன்னை சேவித்துஉன்
பொற்றா மரைஅடியே போற்றும் பொருள்கேளாய்
பெற்றம்மேய்த்து உண்ணும் குலத்தில் பிறந்துநீ
குற்றுஏவல் எங்களைக் கொள்ளாமல் போகாது
இற்றைப் பறைகொள்வான் அன்றுகாண் கோவிந்தா
எற்றைக்கும் ஏழ்ஏழ் பிறவிக்கும் உன்தன்னோடு
உற்றோமே ஆவோம் உனக்கேநாம் ஆட்செய்வோம்
மற்றைநம் காமங்கள் மாற்றேலோர் எம்பாவாய்.
30. வங்கக் கடல்...
#ஆண்டாள்_பெருமை
ஆண்டாள் curriculum vita
பெயர் : ஆண்டாள், இயற்பெயர் : கோதை, உத்தேசமான பிறந்த தினம் : கி.பி.885 நவ 25 அல்லது கி.பி 886 டிசம்பர் 24, கண்டெடுத்த நாள் & நட்சத்திரம் : கலியுகம் நள வருஷம் ஆடி மாதம் சனிக்கிழமை சுக்ல பட்சம் பூர நட்சத்திரம், வளர்ப்பு தந்தை பெயர் : பெரியாழ்வார், கணவரின் பெயர் : அரங்கன் ஶ்ரீரங்கம், பட்டப் பெயர்கள் : சூடிக் கொடுத்த சுடர் கொடி, ஆண்டாள், நாச்சியார், எழுதியவை : திருப்பாவை, நாச்சியார் திருமொழி திருப்பாவை பாடல் இலக்கணம் : இயற்றர விணை கொச்சகக் கலிப்பா.
ஆண்டாளின் திருப்பாவை சங்கத் தமிழ்மாலை என போற்றப்படுகிறது.. திருப்பாவை என்பது பின்னர் வந்த பெயராகும்.. இதில் இருக்கும் பாவை நோன்பு சங்க இலக்கியங்களிலும் வருகிறது.ஶ்ரீவில்லிபுத்தூரை ஆயர்பாடியாகவும் வடபெரும் கோயிலை நந்தகோபர் மாளிகையாகவும் அதிலுள்ள தெய்வத்தை கிருஷ்ணனாகவும் பாவித்து பாடினார் ஆண்டாள்.
உன்மனதிலிருப்பது எந்த ஊரான்.? என திருமாலைப் பற்றி பெரியாழ்வார் கேட்டு பெருமாளின் திவ்ய தேசங்கள் அனைத்தையும் சொல்ல திருவரங்கன் பேர் கேட்டதும் ஆண்டாளுக்கு வெட்கம் வர அரங்கனோடு மணமா? எப்படி சாத்தியம் என உறங்கப்போக கனவில் வந்த அரங்கன் அவளை அலங்கரித்து திருவரங்கம் அழைத்து வா எனச்சொல்ல அவரும் கோதையை அலங்கரித்து ஶ்ரீரங்கம் செல்ல அங்கு பெருமானுடன் ஐக்கியமடைந்தார் ஆண்டாள்.
தனது திருப்பாவையில் வான சாஸ்திரத்தையும் மழை பெய்வித்தலையும் ஆண்டாள் எழுதியது இன்றளவும் வியப்பிற்குரியது.. திருமால் மீது அவர் கொண்ட காதல் மிக மிக ஆழமானது. மார்கழி 30 நாட்களும் இந்த பாவை நோன்பை மேற்கொள்வது வைணவ மரபு...இந்த 30 பாடல்களையும் மார்கழியில் படித்தாலும் அது நன்மையே.. இனி 30ஆம் நாள் பாடல்..
பாற்கடல் கடைந்த மாதவனை சந்திர முகத்தானை நம் பெண்கள் சென்று வேண்டியது கிடைத்த நிகழ்வினை ஶ்ரீவில்லிப்புத்தூரிலே வாழ்வார்.. பெயரிலே பெரியாழ்வார் அவரின் செல்ல மகள் ஆண்டாள் அருளிய திருப்பாவை முப்பதையும் தவறாமல் பாடினால் நான்கு தோள்களும் தாமரைக் கண்களும் கொண்ட திருமாலின் திருவருள் பெற்று பேரின்பத்துடன் வாழ்வாங்கு வாழ்வார்கள்.
ஒரு நாள் நீ யாரையம்மா மணம் செய்து கொள்வாய்.? என பெரியாழ்வார் கேட்டபோது திருமாலுக்கென்றே படைக்கப்பட்டது என் உடல்.. அதை இந்த மனிதர்களுக்கு என்னும் வார்த்தையை என் காதில் கேட்டாலே என்னால் வாழ முடியாது எனச் சொன்னவள்..ஏனென்றால் அரங்கன் மேல் அவள் கொண்ட காதல் அப்படி.. "மனிதர் உணர்ந்து கொள்ள இது மனிதக் காதல் அல்ல..அல்ல.. அல்ல.. அதையும் தாண்டி புனிதமானதுதுதுதுதுது"...
- சுபம்-
மார்கழி 30 ஆம் நாள் பாடல்...
வங்கக் கடல்கடைந்த மாதவனை கேசவனை
திங்கள் திருமுகத்து சேய்இழையார் சென்றுஇறைஞ்சி
அங்கப் பறைகொண்ட ஆற்றை அணிபுதுவைப்
பைங்கமலத் தண்தெரியல் பட்டர்பிரான்
கோதைசொன்ன சங்கத் தமிழ்மாலை முப்பதும் தப்பாமே
இங்குஇப் பரிசுரைப்பார் ஈரிரண்டு மால்வரைதோள்
செங்கண் திருமுகத்துச் செல்வத் திருமாலால்
எங்கும் திருவருள்பெற்று இன்புறுவர் எம்பாவாய்.
