16. நாயகனாய் நின்ற...

#ஆண்டாள்_பெருமை

பெரிய மனிதர்களை சந்திக்கச் செல்லும் போது அவர்களது செக்யூரிட்டிகளுக்கு நாம் பெரும் மரியாதை தருவோம் கிட்டத்தட்ட அந்த வி.ஐ.பி.யாகவே அவரும் பிகு செய்வார். இந்த பூசாரிகள் வரமளித்தால் தான் நீங்கள் கடவுளையே காண முடியும். இவ்வளவு ஏன் ஏ.வி.எம் ஸ்டுடியோ வாட்ச்மேன் காலில் விழுந்து அனுமதி கேட்ட எத்தனையோ பேர் இன்று மிகப் பெரிய பிரபலங்கள் ஆகியிருக்கின்றனர்.

இந்தப் பாடலில் விழித்தெழுந்த பெண்கள் நந்தகோபனின் மாளிகை வாசலுக்கு வந்து வாயில் காப்போனிடம் கேட்கிறார்கள் எங்கள் நாயகன் நந்தகோபனின் கொடி பறக்கும் தோரண வாயிலை காவல் காப்போனே ஆயர்குலப் பெண்கள் எங்களுக்கு வேண்டியதை தருவேன் என நேற்றே சொன்னார் மாய மணிவண்ணர் அவரை எழுப்ப வந்துள்ளோம்.

நோன்பிருந்து நீராடி தூய்மையாக வந்துள்ளோம் நாங்கள் வந்த இந்த நல்ல காரியம் நிறைவேற எங்களை உள்ளே சென்று பாட விடு அழகிய இம் மணிக்கதவின் தாழ்ப்பாளை திறந்துவிடு.. இந்த காலத்தில் இவ்வளவு இளம்பெண்கள் கூட்டமாகப் போனால் இப்படியெல்லாம் பாட வேண்டாம் வாட்ச்மேனே வாயில்  ஜொள்ளு விட்டு கதவுகளைத் திறந்து இருப்பான்.

ஆண்டாளின் பாடல்களில் தமிழில் அருகி மறைந்த பல தமிழ் வார்த்தைகளை காணலாம். உதாரணமாக கொண்மூ, எழினி என்ற தமிழ் வார்த்தைகளுக்கு அர்த்தம் என்னவென்று தெரியுமா? இவை இரண்டுமே மேகத்தை குறிக்கும் தமிழ்ச் சொற்கள்.. இன்று மேகம் முகில் போன்ற வார்த்தைகள் மட்டுமே வழக்கில் உள்ளன.

இந்தப் பாடலிலும் நென்னல் என்ற வார்த்தையைக்  குறிப்பிடுகிறார். நென்னல் என்றால் நேற்று என அர்த்தம், மாணிக்கவாசகரின் திருவெம்பாவையிலும் இந்த வார்த்தை வருகிறது. ஆண்டாள் எழுதிய தமிழ் நென்னலில் மட்டுமன்று என்றும் கன்னல்.

மார்கழி 16 ஆம் நாள் பாடல்...

நாயக னாய்நின்ற நந்தகோ பன்உடைய
கோயில்காப் பானே கொடித்தோன்றும்
தோரண வாயில்காப் பானே மணிக்கதவம் தாள்திறவாய்
ஆயர் சிறுமிய ரோமுக்கு அறைபறை
மாயன் மணிவண்ணன் நென்னலே வாய்நேர்ந்தான்
தூயோமாய் வந்தோம் துயில்எழப் பாடுவ
வாயால்முன் னம்முன்னம் மாற்றாதே அம்மாநீ
நேய நிலைக்கதவம் நீக்கேலோர் எம்பாவாய்.

15. எல்லே இளம்கிளியே...

#ஆண்டாள்_பெருமை

இதற்கு முன் வந்த 14 பாடல்களில் கோபியரை எழுப்பிய ஆண்டாள் இந்த 15 வது பாடலிலிருந்து அவர்களோடு உரையாடுகிறார். ஒருவரின் குணநலன்கள் பற்றி அறிந்து நெடுநாள் பழகிய இருவர் பேசும் பேச்சில் நக்கலும் நையாண்டியும் தொனிக்கும் அல்லவா.. "நீ யாருன்னு எனக்குத் தெரியும் நான் யாருன்னு உனக்குத்தெரியும் இந்த டகால்டி வேலை எல்லாம் எங்கிட்ட வேணாம் மகனே"என்று கவுண்டமணி சொல்வது போல.

பொதுவாக இருவர் பேசிக் கொண்டிருப்பதை நாம் கவனிப்பதில்லை நிறைய சானல்களில் ரிமோட்டை தேட வைப்பது சுவாரஸ்மில்லாத பேச்சுகள் தான்.. ஆண்டாளின் இந்த பாசுரத்தின் விளக்கத்தை மட்டும் வட்டார வழக்கான சென்னைத் தமிழில் இருவர் பேசிக் கொள்வதைப் போல பார்க்கலாமா எளியவர்களின் மொழியில் படிக்கஒரு சுவாரஸ்யம் கிடைக்கும்

எயுப்புறவங்கோ : இந்தாம்மே கிளி கணக்கா இர்க்குற பொண்ணே ! எம்மாநேர்ந்தான் தூங்கிகினு இர்ப்ப?

படுத்துனு இர்க்கற பொண்ணு : ஏ.. இன்னா அல்லாரும் கீச் கீச்னு கொரல் வுடுறீங்க? கம்முனு கிடங்கோ தோ வந்துரேன்....

எயுப்புறவங்கோ : நீ மெய்யாலுமே படா கில்லாடி தாம்மே நீ இன்னா பேசுவேன்னு எங்க அல்லாருக்கும் மின்னாடியே தெர்யும்.. வுன் வாய்ல இர்ந்து இன்னா வரும்ன்னும் தெர்யும்..

படுத்துனு இர்க்குற பொண்ணு : ஆரு நானா கில்லாடி.... நீங்க தாம்மே படா கில்லாடிங்கோ!  உங்க அல்லாரையும் கண்டுகினு தான் நான் கத்துகினு இருக்கேன்.....

எயுப்புறவங்கோ : தோடா... எயுந்து வராம பட்த்துகினே சொம்மா பேசிகினே இர்க்கே! சுகுரா எயுந்துரும்மே! விர்தம் இர்க்குறத வுட அப்டி உனுக்கு இன்னா பெர்ய வேல கீது?.

படுத்துனு இர்க்குற பொண்ணு : அல்லாரும் வந்துகினாங்களா?

எயுப்புறவங்கோ : அக்காங் ! அல்லாரும் வந்துகினாங்கோ!வோணும்ன்னா நீயே வந்து கரீட்டா கீதான்னு எண்ணிக்கோ....

மதுரா புரியில பெர்ய ஆனையவே பூன மேறி மிறிச்சி கொன்னவரு... எதுக்குரவன் நெஞ்சுல இர்க்குற மஞ்சா சோத்த எட்த்து அவன் ஆணவத்த உண்டுல்லைன்னு ஆக்குனபரு..அவர பத்தியே பாடினு இர்ப்போம் எயுந்து வா கண்ணு.. 

சென்னைத்தமிழ் பேசுபவர்கள் ஆண்டாளைப் படித்தால் இப்படித்தான் பேசுவார்களா எனக் கேட்டால் இல்லை அவர்கள் நல்ல தமிழுக்கு மாறி விடுவார்கள் என்பேன்.. ஏனெனில் பக்தியில் தமிழ் வளர்த்த தங்கத் தாரகை இதய தெய்வம் புரட்சித்தலைவி நிரந்தர முதல்வர் எங்கள் அம்மா ஆண்டாள் அருளிய பாசுரங்கள் அப்படி.

மார்கழி 15ஆம் நாள் பாடல்...

எல்லே இளம்கிளியே இன்னம் உறங்குதியோ

சில்என்று அழையேன்மின் நங்கையீர் போதருகின்றேன்

வல்லைஉன் கட்டுரைகள் பண்டேஉன் வாய்அறிதும்

வல்லீர்கள் நீங்களே நானேதான் ஆயிடுக

ஒல்லைநீ போதாய் உனக்கென்ன வேறுடையை

எல்லாரும் போந்தாரோ போந்தார்போந்து எண்ணிக்கொள்

வல்ஆனை கொன்றானை மாற்றாரை மாற்றழிக்க

வல்லானை மாயனைப் பாடேலோர் எம்பாவாய்.

14. உங்கள் புழக்கடை...

#ஆண்டாள்_பெருமை

லேட்டஸ்ட் பாத்ரூம் ஃபிட்டிங் சார் கிட்டத்தட்ட 20 இலட்சம் செலவாச்சு ஒரு ஸ்டீம் பாத் & மல்டி ஷவர் சேம்பர் பிக்ஸ் பண்ணியிருக்கேன் வாட்டர் பிரஷர்ல தெறிக்கும் பாருங்க அதுல குளிக்கிறதே தனி சுகம் பைப் எல்லாம் ஜாகுவார் கம்பெனி.. குழந்தைகளுக்கு ரிவால்விங் பாத்டப் கூட ஒண்ணு இருக்கு.. இது இன்றைய வசதி படைத்தவர்களின் குளியலறை.

ஆனால் 20இலட்சமல்ல 20 கோடி கொடுத்தாலும் கிட்டாத நேச்சுரல் பாத் ரூம் ஆண்டாள் காலத்தில் பாருங்களேன் வீட்டு பின் புறத்தில் அமைந்துள்ள குளம் அங்கு செந்தாமரைகள் மலர்ந்தும் அல்லிகள் மொட்டாகவும் காணப்படுகிறது. மார்கழி என்பதால் நிச்சயம் சில்லென்ற நீர்  இப்படி ஒரு குளத்துக் குளியல் மல்டி ஷவர் தருமா.? அந்த பெண்ணை எழுப்புகிறார்..

பெண்ணே காலையில் சூரியன் உதித்து தாமரை மலர்ந்து அல்லி மூடி விட்டது வெண்ணிறப் பற்கள் மின்ன காவியணிந்த துறவிகள் அவர்களின் ஆன்மிகக் கடனான சங்கு முழங்க கிளம்பிவிட்டனர். உங்களையெல்லாம் நானே வந்து எழுப்புவேன் என ஜம்பமாக வாயாடிவிட்டு நீயே இப்படி தூங்கலாமா? இப்படி உறங்க உனக்கு வெட்கமாக இல்லை.. எழுந்து வா

நீளக்கைகள் இரண்டில் சங்கும் சக்கரமும் தரித்திருக்கும் தாமரைக் கண்ணனை அவரின் அழகை அவர் பெருமையை வாயாரப்பாடலாம் வா.

மலர் மலர்வதை வாய் திறப்பு எனவும் மொட்டு மூடிக்கொள்வதை வாய் மூடி எனவும் ரசனையோடு ஆண்டாள் விளக்கியிருப்பதை பாருங்கள்.

இத்தனை நூற்றாண்டுகளுக்கு பின்னும் மனிதர்கள் திறந்த வாய் மூட மறந்து திளைத்துக் கிடக்கிறார்கள் ஆண்டாளின் தமிழ் குளத்தில்.

மார்கழி 14 ஆம் நாள் பாடல்...

உங்கள் புழக்கடைத் தோட்டத்து வாவியுள்

செங்கழுனீர் வாய்நெகிழ்ந்து ஆம்பல்வாய் கூம்பினகாண்

செங்கற் பொடிக்கூரை வெண்பல் தவத்தவர்

தங்கள் திருக்கோயில் சங்கிடுவான் போதன்றார்

எங்களை முன்னம் எழுப்புவான் வாய்பேசும்

நங்காய் எழுந்திராய் நாணாதாய் நாவுடையாய்

சங்கோடு சக்கரம் ஏந்தும் தடக்கையன்

பங்கயக் கண்ணானைப் பாடேலோர் எம்பாவாய்.

13. புள்ளின்வாய்க் கீண்டானை...

#ஆண்டாள்_பெருமை

சரக்கிருக்கு ரபபப்பப்பா... முறுக்கிருக்கு ரபபப்பப்பா... இந்த வரிகள் ராஜா கைய வச்சா அது ராங்காப் போனதில்ல பாடலிலும், சரக்கிருக்கு.. முறுக்கிருக்கு.. எனக்கெதுக்கு மனக் கவலை.. இந்த வரிகள் புதுச்சேரி கச்சேரி எக்கசக்க பார்ட்டி ஒண்ணு புடிச்சேன் பாடலிலும் வரும்.. முதல் பாடல் அபூர்வ சகோதரர்கள் படம் இரண்டாவது சிங்கார வேலன் படம்.

இரண்டுமே கமல் படம் இரண்டையும் எழுதியவர் கவிஞர் வாலி.. நான் கூட இவ்வளவு பெரிய கவிஞர் வாலிக்கு இந்த இருவரிகளை விட நல்ல வரிகள் அவர் கற்பனையில் வரவில்லையா என நினைத்ததுண்டு.. ஆண்டாளின் பாசுரம் படித்த பின்பு அதற்கு விளக்கம் கிடைத்தது.. ஆண்டாளும் ஒரே வார்த்தையை வேறு வேறு பாசுரங்களில் பயன்படுத்தியுள்ளார்.. அது மார்கழி 6ஆம் நாள் பாடல்.

6 ஆம் நாள் பாசுரத்தின் முதல் அடியில் புள்ளும் சிலம்பினகாண் என்னும் அதே வார்த்தையை 13 ஆம் நாள் பாசுரத்தின் 5 வது வரியில் அப்படியே உபயோகிக்கிறார்.. கொக்கின் வடிவெடுத்து வந்த அசுரன் பகாசூரனின் வாயைப் பிளந்தவன்.. ராவணனின் பத்துத் தலைகளை கிள்ளியெறிந்தவன் அவன் புகழ்பாடி மற்ற பெண்கள் எல்லாம் நோன்பிருக்க சென்று விட்டனர்.

வெள்ளி முளைக்க வியாழன் மறைய கூட்டில் இருக்கும் பறவைகளும் சப்தம் எழும்புகின்றன போதரிக் கண்ணுடைய பெண்ணே.. போதரிக் கண் என்றால் வண்டமர்ந்த தாமரைப்பூ போன்ற கண்களாம்.. கரு விழிகளை வண்டாகவும் கண்ணை தாமரையாகவும் உவமைப் படுத்துகிறார் ஆண்டாள். இம் மார்கழி நன்னாளில் எங்களோடு வந்து குளிரக்குளிர குளிக்காமல் ஏன் இப்படி..

பள்ளி கொண்டு உறங்குகிறாய்.? நீ உறங்குகிறாயா அல்லது கள்ளத்தனமாக உறக்கம் வருவது போல நடிக்கிறாயா.? எங்களுடன் வந்து சேர்ந்து கொள் எம்பாவாய்.. என செல்லமாகவும் உறங்குபவளை அதட்டுகிறார் ஆண்டாள். ஆண்டாளின் திருப்பாவை ஒரு டூ-இன்- ஒன் அதில் தான் இராமாயணம் மகாபாரதம் இரண்டையும் ஒன்றாகப் படிக்கலாம்.

மார்கழி 13 ஆம் நாள் பாடல்...

புள்ளின்வாய்க் கீண்டானைப் பொல்லா அரக்கனைக்

கிள்ளிக் களைந்தானைக் கீர்த்திமை பாடிப்போய்ப்

பிள்ளைகள் எல்லாரும் பாவைக் களம்புக்கார்

வெள்ளி எழுந்து வியாழம் உறங்கிற்று

புள்ளும் சிலம்பினகாண் போதரிக் கண்ணினாய்

குள்ளக் குளிரக் குடைந்துநீ ராடாதே

பள்ளிக் கிடத்தியோ பாவாய்நீ நன்நாளால்

கள்ளம் தவிர்ந்து கலந்தேலோர் எம்பாவாய்.

10. நோற்றுச் சுவர்க்கம்...

#ஆண்டாள்_பெருமை

ஆமா இவரு பெரிய பணக்காரரு அம்பானிக்கே கடன் கொடுத்தவரு மாதிரி பேசறாரு.. பொதுவாக நாம் கிண்டலாக பேசும் போது ஒப்பீடு இது போல மிகைப்படுத்தலாக இருக்கும்.. அதாவது அவரே பெரியவர் அதை விடவா நீ பெரியவன் என்னும் தொனியில் கூறுவோம்.. அதிகாலை எழும்பாமல் உறங்கிக் கிடக்கும் பெண்ணிற்கு ஆண்டாளும் ஒரு ஒப்பீடு தருகிறார்.

சொர்க்கம் புகவேண்டும் என்பதற்காக விரதம் இருக்கின்ற பெண்ணே.. நீ கதவைத்தான் திறக்கவில்லை ஒரு குரல் கொடுத்தாவது பதில் பேசலாமே.! நறுமண துளசியை மாலையாய் அணிந்திருக்கும் நாராயணன் பெருமையை ஊர் மெச்ச போற்றித் துதித்தால் அவர் பேரின்பத்தை நமக்கு பரிசாகத் தருவார்.. அதை விட்டுவிட்டு சிற்றின்பமான இந்த உறக்கம் தேவையா.?

அன்று யமனிடம் வாய் தவறி வரம் கேட்டு தூக்கத்தை வரமாக பெற்றானே கும்பகர்ணன் அவனிடம் நீ தூக்கத்தை பரிசாகப் பெற்றுக் கொண்டாயா.? உனக்கும் அவனுக்கும் போட்டியா? அல்லது அவன் உன்னிடம் தோற்று விட்டானா.? எல்லையற்ற உன் சோம்பலை துறந்துவிடு வா வந்து இவ்வாசல் கதவை திறந்துவிடு.. என உறங்குபவளை கும்பகர்ணனோடு ஒப்பிடுகிறார்.

எனக்கென்னவோ ஆண்டாள் பாடினால் கும்பகர்ணனே எழுந்து வந்து விடுவான் என்றே தோன்றுகிறது.

மார்கழி 10 ஆம் நாள் பாடல்...

நோற்றுச் சுவர்க்கம் புகுகின்ற அம்மனாய்

மாற்றமும் தாராரோ வாசல் திறவாதார்

நாற்றத் துழாய்முடி நாராயணன் நம்மால்

போற்றப் பறைதரும் புண்ணியனால்

பண்டுஒருநாள் கூற்றத்தின் வாய்வீழ்ந்த

கும்ப கருணனும் தோற்றும் உனக்கே

பெருந்துயில்தான் தந்தானோ ஆற்ற

அனந்தல் உடையாய் அருங்கலமே

தேற்றமாய் வந்து திறவேலோர் எம்பாவாய்.

9. தூமணி மாடத்து...

#ஆண்டாள்_பெருமை

பாலுமகேந்திரா, பி.சி.ஶ்ரீராம், சந்தோஷ்சிவன், மணிகண்டன் போன்ற புகழ் பெற்ற ஒளிப்பதிவாளர்கள் படமாக்கும் காட்சிகள் கலைநயம் மிக்கதாக இருக்கும். அதற்கு முக்கியக் காரணம் காட்சிக்கேற்ற அழகான லைட்டிங்.! இயற்கையாகவோ செயற்கையாகவோ வரும் ஒளியின் மூலம் அந்தக் காட்சியை மெருகு ஏற்றுவார்கள். ஆண்டாளும் ஒரு ஒளிப்பதிவாளர் தான்.

ஆண்டாள் இப்பாடலில் நம் கண்முன்னே படமாக லைட்டிங் அமைக்கிறார்

இப்படி (வைட் ஆங்கிளில்)ஒரு வீடு அந்த அதிகாலை இருளில் வீட்டில் ஒரு அழகான விளக்கு மாடம் அங்கு மணிகளுடன் வெண்ணிற திரைச்சீலைகள் அசைகின்றன அதனைச் சுற்றி அலங்காரமான விளக்குகள் எரிகின்றன. 

மணம் கமழும் சாம்பிராணிப் புகை பரவிக்கிடக்க காமிரா பார்வேர்டில் ஜூம் ஆகிறது. இலவம் பஞ்சுமெத்தையில் உறங்கிக் கொண்டு இருக்கிறாள் ஒருத்தி. அப்படியே இந்த காட்சியைக் கற்பனை செய்து பார்த்தால் அடடா ஒரு மணிரத்னம் படம் போலவோ ஷங்கர் படம் போலவோ இருக்கிறதா..!!

ஆண்டாள் ரசனை ராணி.. அவளது அழகியல் மிகுந்த பார்வை பாசுரங்களின் பல இடத்தில் பிரதிபலிக்கும்.. வார்த்தைகளிலேயே இந்தக் காட்சியை அமைத்த அவள் திறனைப் பாருங்கள் வளமானகற்பனை, ஆழ்ந்த ரசனை, கண்ணன் மேல் கொண்ட அளவிலாக் காதல் அத்தனையும் விளங்கும்.

இங்கே இந்த காட்சியை நிறுத்திவிட்டு அடுத்த ஷாட் அப்படியே கதவிற்கு இந்தப்பக்கம் நாம் மாற்றுவோம்... அங்கே தினமும் இந்த வீட்டிற்கு வரும் அப் பெண்ணின் தோழிகள் கதவுக்கு வெளியில் இருந்து இவளை கூப்பிட்டு எழுப்புகிறார்கள். மாமன் மகளே என்ன உறக்கம்? மணிக்கதவை திறந்துவிடு

அட மாமியே நீ உன் மகளை எழுப்ப மாட்டாயா.?

உன் மகள் என்ன பேசா மடந்தையா? செவித்திறன் அற்றவளா? மயங்கிக் கிடக்கிறாளா? யாராவது அவளை மந்திரத்தால் மயக்கிவிட்டார்களா? மாயவர்களுக்கு எல்லாம் பெரிய மாயன், மாதவன்,வைகுந்தன் என்று அவன் பல நாமங்களை சொல்லிப்பாடுவோம் அவளை சீக்கிரம் எழுப்பு... ஆண்டாள் இது போல கூப்பிட்டு நம்மை எழுப்பினால் அதற்காகவே தூங்கலாம் போல.

மார்கழி 9 ஆம் நாள் பாடல்...

தூமணி மாடத்து சுற்றும் விளக்கெரியத்

தூமம் கமழத் துயிலணைமேல் கண்வளரும்

மாமான் மகளே மணிக்கதவம் தாழ்திறவாய்

மாமீர் அவளை எழுப்பீரோ உன்மகள்தான்

ஊமையோ அன்றி செவிடோ அனந்தலோ

ஏமப் பெருந்துயில் மந்திரப் பட்டாளோ

மாமாயன் மாதவன் வைகுந்தன் என்றென்று

நாமன் பலவும் நவின்றேலோர் என்பாவாய்.

8. கீழ்வானம் வெள்ளென்று...

#ஆண்டாள்_பெருமை

தன்னை வணங்குபவனை அருள்வது கடவுளின் குணம். ஆனால் நம்மை வா வா என்றழைத்து அருளும் கடவுள் இருக்கிறாரா.! கண்ணன் இருக்கிறான் என்கிறார் ஆண்டாள். கண்ணன் ஆ வென்று வாய் பிளந்த போது அவரது அன்னைக்கு அன்று உலகில் உள்ள எல்லாமும் தெரிந்தது..  அது தான் உலகின் முதல் கூகுள்.. காட்டியது நம் கோகுல்..

நம் வேண்டுதலுக்கு ஏற்றபடி திருவிளையாடல் தருமி சொல்வது போல எவ்வளவு பிழை இருக்கிறதோ அதற்கு ஏற்றபடி... என அதை ஆராய்ந்து நம்மை ஆ வென்று அழைத்து ஆட்கொள்வான் ஆயர்குலக் கண்ணன்.. ஆ வென்றால் பசுக்கள் என்றும் அர்த்தம் அந்தப் பசுக்கள் பாலைப் பொழிவது போல அவன் பக்தர்களுக்கு அன்பைப் பொழிவான்.

அவனைச் சேவிக்க என்ன செய்ய வேண்டும் உறங்கும் பெண்ணே..? பார் கீழ் வானம் விடிந்துவிட்டது எருமைகள் புல்வெளியில் பரந்து மேய்கின்றன.. பாவை விரதம் இருக்கின்ற இடத்திற்கு பலர் போய்விட்டனர் சிலர் அங்கு கிளம்ப ஆயத்தமாகிக் கொண்டிருக்கிறார்கள் அவர்களை தடுத்து நிறுத்தி உன் வீட்டு வாசலில் நிற்கின்றோம் நீ எழுந்து வா..

குதிரையாக உருமாறி வந்த கேசி என்னும் அரக்கனின் வாயைப் பிளந்தவன் சாணுகன் முஷ்டிகன் என்ற இருமல்லர்களை வீழ்த்தியவன் தேவாதி தேவன் அவன் அவனை சேவிப்போம் அப்போது தான் அவன் வா வென்று அழைத்து நம்மை அருள்வான் என்கிறார்.. கண்னனின் அருள் வருகிறதோ இல்லையோ ஆண்டாள் ஆ வென்றால் கண்ணனே வருவான் போல.

மார்கழிப் 8ஆம் நாள் பாடல்...

கீழ்வானம் வெள்ளென்று எருமைசிறுவீடு

மேய்வான் பரந்தனகாண் மிக்குள்ளபிள்ளைகளும்

போவான் போகின்றாரை போகாமல் காத்துன்னை

கூவுவான் வந்துநின்றோம் கோது கலமுடைய

பாவாய்! எழுந்திராய் பாடிப்பறை கொண்டு

மாவாய் பிளந்தானை மல்லரை மாட்டிய

தேவாதி தேவனைச் சென்று நாம் சேவித்தால்

ஆஆ என்று ஆராய்ந்து அருளேலோர் எம்பாவாய்.

6. புள்ளும் சிலம்பின...

#ஆண்டாள்_பெருமை

சங்கு ஊதிட்டாங்க என்றால் இப்போது கதை முடிஞ்சது ஆள் காலி என்று தான் அர்த்தமாகிறது.. சங்கில் ஊற்றி வாயில் பால் ஊற்றினால் பிறப்பு சங்கூதி வாயில் பால் ஊற்றினால் இறப்பு என ரைமிங்காக ஸ்டேட்டஸ் போடுகிறோம் ஆனால் பெருமாளுக்கு சங்கு ஓர் அடையாளம் ஓர் ஆயுதம். 

பொதுவாக நாஸ்டால்ஜியா நினைவுகளில் நமது இளம் பிராயத்தில் காலை 6 மணிச்சங்கு மதியம் 12 மணிச் சங்கு என சங்கொலிப்பதை கேட்டு இருப்போம்.. இதில் ஆலைகளில் இழுந்து எழும்பும் சங்கொலியும் உண்டு.. சங்கொலி என்பது எதையும் தொடங்கும் போது ஒலிக்கும் சப்தம்.

அப்போது ஏன் இறப்புக்கு ஊதவேண்டும்? அது முடிவல்லவா?இல்லை இறப்பு மனிதர்களுக்கு மறுமையின் தொடக்கம் அதில் நம்பிக்கை இல்லாதவர்கள் அமர வாழ்வின் தொடக்கம் என்று கூட எடுத்துக்கொள்ளலாம் இப்படி பிறப்பு இறப்பு ஆலயம் போர் என வாழ்வில் சங்கொலிக்காத இடமே இல்லை 

அது பாஞ்சஜன்யமாய் பாரதப் போரில் முழங்கியதை இங்கு நினைவு கூர்வோம். அதோ அந்தச் சங்கு கருடனின் தலைவனானப் பெருமாள் கோவிலில் இருந்து பேரொலியாய் ஒலிக்கிறது.. அது அந்த நாளின் நல்ல தொடக்கமாக அமைய அந்த சப்தம் உன் காதுகளில் விழவில்லையா.?

என கேட்டு ஆரம்பிக்கிறார்.. அந்த சங்கொலியோடு பறவைகள் சிலம்பும் சப்தமும் பேரரவமாய் ஒலிக்கிறது என்கிறார்.இன்றும் மதுரைத் தமிழில் சலம்புவது என்றால் சத்தம் இடுவது என அர்த்தம்.. இந்த சிலம்புவது தான் சலம்புவதாக மருவியிருக்கும் என்று எண்ணுகிறேன்.

ஒரு விஷயத்தில் இன்றைய தமிழக அமைச்சர்களுக்கு ஆண்டாள் முன்னோடி இவர்களுக்கு அம்மா புகழ்.. ஆண்டாளுக்கு அரியின் புகழ்.. அவன் புகழ் பாடாது அவர் வாய் ஓயாது.. பறவைகள் சிலம்ப சங்கதிர ஒலி கேட்டு எழுந்திருக்காத பிள்ளைகளா.. உங்களுக்கு தெரியுமா..?

நம் பெருமான் பூதகியிடம் பால் குடித்து கொன்றது சகடனை காலால் நிறுத்திக்கொன்றது பாம்பின் மேல் உறங்கியது என.. அவர் காலத்து மாண்பு மிகு இதயதெய்வம் தங்கத்தாரகை போல கிருஷ்ணரின் பெருமைகளைச் சொல்லி இறுதியில் இப்படி முடிக்கிறார்... மனதில் நாரணனை நினைத்து

முனிவர்களும் யோகிகளும் அரி என்று உச்சரிக்கும் பேரொலியைக் கேட்டால் அது நம் காது வழியே மனதிற்குள் சென்று நம்மை குளிரச் செய்யுமாம் அதை கேட்பதற்காகவாவது எழுந்து வா என்கிறார்.

பொதுவாக அதிகாலையில் அரி என உச்சரிப்பது நலம் விளைவிக்கும் என்பார்கள். ஆனால் ஆண்டாள் அரி என்னும் சப்தம் காதுகளில் விழுந்தால் போதும் என்கிறார்.. அவருக்கு அதுவே போதும்.

பின்குறிப்பு:

பாடல்களில் அரி என்று உச்சரிக்காமல் ஆபாசமாக உச்சரித்து அதற்கும் பீப் போட்டு சாங்கு பாடி தனக்கே சங்கு ஊதிக் கொண்டவர்களின் சங்கொலி பற்றி இதில் நான் குறிப்பிடவில்லை.

மார்கழி 6ம் நாள் பாடல்...

புள்ளும் சிலம்பின காண் புள்ளரையன் கோயிலில்

வெள்ளை விளிசங்கின் பேரரவம் கேட்டிலையோ?

பிள்ளாய் எழுந்திராய் பேய் முலை நஞ்சுண்டு

கள்ளச் சகடம் கலக் கழியக் காலோச்சி

வெள்ளத் தரவில் துயிலமர்ந்த வித்தினை

உள்ளத்துக் கொண்டு முனிவர்களும் யோகிகளும்

மெள்ள வெழுந்து அரியென்ற பேரரவம்

உள்ளம் புகுந்து குளிர்ந்தேலோ ரெம்பாவாய்!

12. கனைத்து இளம்...

#ஆண்டாள்_பெருமை

நாட்டில் பாலும் தேனும் ஆறாக ஓடுகிறது என்னும் சொற்றொடரை சுபிட்சத்திற்கும் செழிப்பிற்கும் உதாரணமாகச் சொல்லுவார்கள். ஆண்டாள் வீட்டுச் சுபிட்சத்திற்கு இதை ஒப்பிடுகிறார்.. போகிற போக்கில் தாய்ப்பாசம், பேரன்பு இவையெல்லாம் மிருகங்களுக்கும் உண்டு என அழகாக சித்தரிக்கும் அவரது கற்பனையைப் பாருங்கள்..

தங்கள் கன்றுகளின் குரல் கேட்ட எருமைகள் தாய்ப்பாசம் பொங்க தம் கன்றுகளை நினைத்து தம் மடியில் இருந்த பாலை யாரும் கறப்பதற்கு முன் தாமாகவே சுரக்கின்றன.. அப்படி சுரந்த பால் வீடெங்கும் வெள்ளமென ஓடி வீடே பால் சகதியாக உள்ளது.. இத்தனை பால் தரும் செழிப்பான மாடுகள் பல வைத்திருக்கும் செல்வந்தனின் தங்கையே..

மார்கழி மாதம் பெய்யும் அதிகாலை பனியின் துகள்கள் எங்கள் தலைமீது படிந்திருக்க நாங்கள் உன் வீட்டருகே வந்து உனக்காக நிற்கின்றோம்.. இராவணனை வதம் செய்த இராமன் பேர் பாடுகிறோம் நீயும் வந்து வாய் திறந்து பாடு.. வா கதவைத்திற.. உனக்கு ஏனிந்த பெரு உறக்கம்.. நீ இப்படி உறங்குவது அக்கம் பக்கத்திலிருப்போர்க்கு எல்லாம் தெரிந்துவிட்டது எழுந்து வா பெண்ணே..

இந்த வர்ணனையைப் படித்ததும் ஒரு பால் பண்ணைக்குள் சென்று வந்த உணர்வு ஏற்படுகிறது அல்லவா! பால் மணம் கூட மூக்கில் உணர முடிகிறது.. இது பாலின் மணம் மட்டும் அல்ல ஆண்டாள் கண்ணன் பால் கொண்ட காதலின் மணம்.. ஆம் அது கறந்த பாலைப் போல் அவ்வளவு புனிதமானது.

மார்கழி 12ஆம் நாள் பாடல்..

கனைத்துஇளம் கற்றெருமை கன்றுக்கு இரங்கி
நினைத்து முலைவழியே நின்றுபால் சோர
நனைத்துஇல்லம் சேறாக்கும் நற்செல்வன் தங்காய்
பனித்தலை வீழநின் வாசற் கடைபற்றிச்
சினத்தினால் தென்இலங்கைக் கோமானைச் செற்ற
மனத்துக்கு இனியானைப் பாடவும்நீ வாய்திறவாய்
இனித்தான் எழுந்திராய் ஈதென்ன பேர்உறக்கம்
அனைத்துஇல்லத் தாரும் அறிந்தேலோர் எம்பாவாய்.

11. கற்றுக் கறவை...

#ஆண்டாள்_பெருமை

இடையோ இல்லை.. இருந்தால் முல்லைக் கொடிபோல் மெல்ல அசையும்.. என எம்.ஜி.ஆர் படப் பாடலையும், உண்டென்று சொல்வதுந்தன் கண்ணல்லவா வண்ணக் கண்ணல்லவா இல்லை என்று சொல்வதுந்தன் இடை அல்லவா.. மின்னல் இடை அல்லவா..! சிவாஜிப் பட பாடலையும் கேட்டிருப்போம்.

இஞ்சி இடுப்பழகி, ஒல்லிக் குச்சி உடம்புக்காரி,போன்ற தமிழ்த் திரைப்படப் பாடல்களில் சொல்லப்படும் உவமைகள் போல ஆண்டாள் தன் பாடலில் இடை பற்றி குறிப்பிடுகிறார். ஆண்டாளின் உவமையில் அவளது இடை பாம்பின் படம் போல என்கிறார். சரேலென விரியும் போது தான் அது தெரியும் அதற்கு முன் அது இருக்கிறதா என்பதே தெரியாது என்கிறார். எவ்வளவு அழகான கற்பனை பாருங்கள்.

கன்றுகளோடு கறவைப் பசுக்களும் கூட்டமாக நிற்க பாலைக் கறந்து கொண்டிருக்கும் ஆயர் குலத்தினர் பாலைக் கறப்பதிலும் தம்மை எதிர்க்கும் பகைவர் குல வேரை அறுப்பதிலும் வல்லவர்கள் அக்குலத்தில் பிறந்த தங்கக் கொடியே..புற்றிலிருக்கும் பாம்பின் படம் போன்ற அல்குல் உடைய மெல்லிடையாளே.. மயில் போன்ற பெண்ணே.. 

உன் தோழியர் யாவரும் உன் வீட்டு வாசல் வந்து கார் முகில் வண்ணனின் புகழைப் பாடிக் கொண்டிருக்கிறோம்..எதற்கும் அசராமல் உனக்கு ஏனிந்த உறக்கம்? செல்வச் சீமான் பெற்ற செல்லப்பெண்ணே நீ அசையாமல் படுத்துறங்கும் நோக்கமென்ன? எழுந்திடுவாய் எம்பாவாய் என அழைக்கிறார்.

அல்குல் என்றால் பெண்ணின் பிறப்புறுப்பு அது தான் நாகத்தின் விரித்த படம் போல இருக்கும் இன்றைய உரையாசிரியர்கள் நாகரிகம் கருதி அல்குலை இடையாக்கி விட்டார்கள் என்ற கருத்தும் இருக்கிறது.. எப்படியோ இரண்டிற்கும் அந்த உவமை அழகாகப் பொருந்துகிறதே!

அரவமின்றி உறங்கும் பெண்ணிற்கு அந்த அரவம் விரிக்கும் படத்தையே உவமையாகச் சொன்ன ஆண்டாளின் பாசுரம் பக்தி இலக்கியத்தின் மகுடி... இதற்கு மயங்காத பாம்புகள் ஏது.! (அரவம் = பாம்பு & ஓசை)

மார்கழி 11ஆம் நாள் பாடல்...

கற்றுக் கறவைக் கணங்கள் பலகறந்து
செற்றார் திறலழியச் சென்று செருச்செய்யும்
குற்றம்ஒன் றில்லாத கோவலர்த்தம் பொற்கொடியே
புற்றுஅரவு அல்குல் புனமயிலே போதராய்
சுற்றத்து தோழிமார் எல்லாரும் வந்துநின்
முற்றம் புகுந்து முகில்வண்ணன் பேர்பாட
சிற்றாதே பேசாதே செல்வபெண் டாட்டிநீ
எற்றுக்கு உறங்கும் பொருளேலோர் எம்பாவாய்.

7.கீசு கீசு என்று...

#ஆண்டாள்_பெருமை

தயிர் சப்தம் போடுமா?போடும் அது தான் தயிரரவம் என்கிறார் ஆண்டாள்.. அரவம் என்றால் பெருஞ் சப்தம் பேரொலி என்னும் அர்த்தமும் உண்டு. ஆண்டாளின் அழகிய வர்ணனையைக்  கேளுங்கள்.. அதிகாலையில் வாசனைக் கூந்தலுடைய ஆயர்குலப் பெண்கள் மத்தினால் தயிர்கடைய தயிரரவம் எழும்புகிறது.

இந்த ஒரு சப்தத்திற்கு துணையாக இன்னும் சில இசைகளை  இதனோடு இணைக்கிறார் ஒரு இசைஞானி போல ஆண்டாள்.. ஆனை சாத்தான் குருவிகளின் கீச்சென்ற பேச்சு தயிர்கடையும் போது அசையும் பெண்களின் மீதிருந்து கலகலவென ஒலிக்கும் கழுத்துத் தாலியும் காசுமாலையும் ஒன்றொடு ஒன்று மோதும் சத்தம்.. 

இத்தனை ஒலிகளுடன் நாங்கள் கேசவனைப் பற்றி பாடும் பாட்டு இத்தனையுமா உன் காதுகளில் விழவில்லை? அல்லது கேட்டும் கேட்காதது போல இருக்குறாயா! அடி பேய்ப்பெண்ணே எழுந்திரு என்கிறார்.. உண்மையில் பேய்ப் பெண் ஆண்டாள் தான்.. கண்ணனை பேய் போல நினைத்து துதிக்க அவர் ஒருவரின்றி யாரால் முடியும்..!

மார்கழி 7ஆம் நாள் பாடல்..

கீசுகீசு என்றுஎங்கும் ஆனைச்சாத் தன்கலந்து
பேசின பேச்சரவம் கேட்டிலையோ பேய்ப்பெண்ணே
காசும் பிறப்பும் கலகலப்பக் கைபேர்த்து
வாச நறும்குழல் ஆய்ச்சியர் மத்தினால்
ஓசை படுத்த தயிரரவம் கேட்டிலையோ
நாயகப் பெண்பிள்ளாய் நாரா யணன்மூர்த்தி
கேசவனைப் பாடவும்நீ கேட்டே கிடத்தியோ
தேச முடையாய் திறவேலோர் எம்பாவாய்.

5. மாயனை மன்னு...

#ஆண்டாள்_பெருமை

நாளைய வரலாறே.. இளஞ்சிங்கமே, புதுமை விரும்பியே, மாவீரனே, வாழும் வள்ளுவரே, இப்படி எல்லாம் பல அரசியல் தலைவர்களுக்கு அடைமொழி கொடுத்து அவர்களது தொண்டர்கள் போஸ்டர்கள் பேனர்கள் அடித்திருப்பதை பார்த்திருப்போம்.

இதற்கும் முன்னோடி ஆண்டாள் தான். தன் தானைத் தலைவன் கண்ணனுக்கு பாசுரத்தில் அவர் தரும் அடை மொழிகளைப் பாருங்கள் மாயனே, வடமதுரை மைந்தனே, யமுனைத் துறைவனே, ஆயர்குல அணிவிளக்கே, என்றெல்லாம் விளித்து விட்டு..முத்தாய்ப்பாக கூறுகிறார்...

தாயை குடல்விளக்கம் செய்த தாமோதரனே என்று அதாவது கண்ணனைப் பெற்றதால் அவரது தாயின் வயிறு பரிசுத்தம் அடைந்ததாம்.. எப்படி ஒரு கற்பனை பாருங்கள் தற்போதைய தமிழகத்தில் ஆண்டாள் அரசியல்வாதியாக  இருந்திருந்தால் நிச்சயம் இந்த வார்த்தைக்காக அவருக்கு அமைச்சர் பதவி கிடைத்திருக்கும்.

ஆனால் எவரும்  தூய மனதோடு மலர் தூவி கண்ணன்பேரை சொல்லி பூஜிப்பதே போதும் அப்படிச் செய்தாலே நம் செய்த செய்ய நினைக்கிற கேடுகள் எல்லாம் தீயினால் தூசாகும் என்கிறார். இந்தத் தீயினால் தூசாகும் என்னும் தொனியில்..

தன் தலைவன் கண்ணனால் நம் பாவங்கள் பஸ்பமாகும் பொசுங்கும் பொடிப் பொடியாகிவிடும்  என பிறருக்கு உத்திரவாதம் அளிக்கிறார்.. தனக்கு அதுவே போதும் என்கிறார் பதவியை எதிர்பாராத அப்பாவித் தொண்டரான ஆண்டாள்.

மார்கழி 5 ஆம் நாள் பாடல்..

மாயனை மன்னு வடமதுரை மைந்தனைத்
தூய பெருநீர் யமுனைத் துறைவனை
ஆயர் குலத்தினில் தோன்றும் அணிவிளக்கைத்
தாயைக் குடல்விளக்கம் செய்த தாமோதரனைத்
தூயோமாய் வந்துநாம் தூமலர்தூ வித்தொழுது
வாயினால் பாடி மனத்தினால் சிந்திக்கப்
போய பிழையும் புகுதருவான் நின்றனவும்
தீயினில் தூசாகும் செப்பேலோர் எம்பாவாய்.

4. ஆழிமழைக் கண்ணா...

#ஆண்டாள்_பெருமை

கடல் நீர் ஆவியாகி மேகத்தில் சேர்ந்து மழையாகப் பொழிகிறது என்பது இன்றைய அறிவியல் மனிதர்களான நமக்கெல்லாம் தெரியும்.. ஆனால் இது ஆண்டாள் வாழ்ந்த காலத்திலும் தெரிந்திருக்கிறது என்பது தான் வியப்பான செய்தி. எந்த ரமணனும் இல்லாத காலத்திலும் ஆண்டாள் வாசித்த வானிலை அறிக்கை தான் இந்த பாடல்.. 

கருமை நிற கண்ணனை மேகமாக உருவகப்படுத்துகிறார் ஆண்டாள். மழைக் கடவுளான வருணா நீ கடலுக்குள் நுழைந்து நிறைய நீரை எடுத்துக் கொண்டு பெரும் ஒலியுடன் மேலெழுந்து மேகமாக மாறி மின்னல் ஒளிர அம்பு போல் சரம் சரமாய் மாலவன் அடியவர்களுக்கு  அருள்வது போல மழையை பொழிவாயாக என்கிறார்.

இதில் பெருமாளின் சங்கினை இடியாகவும் அவரது சக்கரத்தின் ஒளியை மின்னலாகவும் அவரது சாரங்கம் என்னும் வில் அம்பை மழையாகவும் ரசனையோடு உவமைப் படுத்துகிறார்.  மார்கழியிலும் அக் காலத்தில் மழை இருந்திருக்கிறது என்பது இன்றைய சென்னை வாசிகளுக்கு திகிலூட்டும் சேதி.

மார்கழி 4 ஆம் நாள் பாடல்...

ஆழிமழைக்கண்ணா!ஒன்று நீ கைகரவேல்;


ஆழியுள் புக்கு முகந்து கொடு ஆர்த்தேறி


ஊழி முதல்வன் உருவம் போல் மெய் கறுத்துப்


பாழியம் தோளுடைய பற்பநா பன்கையில்


ஆழி போல் மின்னி,வலம்புரி போல நின்றதிர்ந்து,


தாழாதே சார்ங்க முதைத்த சரமழை போல்


வாழ உலகினில் பெய்திடாய்,நாங்களும்


மார்கழி நீராட மகிழ்ந்தேலோ ரெம்பாவாய்.

3. ஓங்கி உலகளந்த...

#ஆண்டாள்_பெருமை

சினிமாவில் மாண்டாஜ் ஷாட்டுகள் என்னும் ஒரு வகை உண்டு.. ஒன்றுக்கொன்று சம்பந்தமில்லாத வெவ்வேறு காட்சிகள் ஆனால் அனைத்தும் அது தொடர்பானவை. உதாரணமாக முதல்வன் திரைப்படத்தில் ஒரு நாள் முதல்வராக அர்ஜுன் இருந்துவிட்ட பின் நாடெங்கும் வெவ்வேறு ஊர்களில் மக்கள் அவரது ஆட்சியின் சிறப்பைப் பற்றி டிவியில் கூறுவார்கள். இது மாண்டாஜில் ஒரு வகை.

பாலுமகேந்திரா மணிரத்னம் படங்களில் மாண்டாஜ் காட்சிகள் பாடலில் இடம் பெறும் கலைஞன் படத்தில் வரும் எந்தன் நெஞ்சில் நீங்காத தென்றல் நீ தானா பாடல் மாண்டாஜுக்கு நல்ல உதாரணம்.இந்த மாண்டாஜ் உத்தியை ஆண்டாளும் கையாள்கிறார். 

ஓங்கி இவ்வுலகை அளந்த பெருமாளை வணங்கி குளித்து விரதம் இருக்கிறார்கள் பெண்கள் அவரை வணங்குவதால் என்னவெல்லாம் நடக்கும்? அப்படியே ஷாட்டை இங்க கட் பண்ணா.. நாட்டில் தீயவை அழிகிறது மாதம் மும்மாரி பொழிகிறது நெல்கள் செழிப்பாக வளர்கிறது.. அந்த வயல்களிடையே ஓடும் கால்வாயில் மீன்கள் துள்ளி விளையாடுகின்றன.. அதன் கரைகளில் இருக்கும் கருங்குவளை மலர்களில் தேன் உண்ணுகிறது..

மடி நிறைய பால் நிறைந்திருக்கும் பசுக்கள் கறப்பதற்கு முன் தானாகவே கொடுத்த வள்ளல் போல பாலை சுரக்கிறது.. எங்கும் செல்வம் செழிக்கிறது. இத்தனயும் மார்கழி விரதத்தின் மகிமைகள் என்கிறார் இயக்குநர் இமயம் ஆண்டாள்.

மார்கழி 3 ஆம் நாள் பாடல்...

ஓங்கி உலகளந்த உத்தமன் பேர் பாடி 


நாங்கள் நம் பாவைக்குச் சாற்றிநீ ராடினால்


தீங்கின்றி நாடெல்லாம் திங்கள் மும் மாரிபெய்து


ஓங்கு பெருங் செந்நெல் ஊடு கயலுகளப்


பூக்குவளைப் போதில் பொறிவண்டு கண்படுப்பத்


தேங்காதே புக்கிருந்து சீர்த்த முலைபற்றி


வாங்கக் குடம் நிறைக்கும் வள்ளல் பெரும் பசுக்கள்


நீங்காத செல்வம் நிறைந்தேலோ எம்பாவாய்.

2. வையத்து வாழ்வீர்காள்...

#ஆண்டாள்_பெருமை

Universal என்னும் வார்த்தைக்கு உலகெங்கும் பெண்கள் தங்களை அலங்கரித்துக் கொள்வதில் காட்டும் அக்கறையை உதாரணமாகச் சொல்லலாம்.பெண்கள் மேக்கப் போட உடை மாற்றி கிளம்ப ஆகும் நேரம் இதையெல்லாம் கிண்டலடித்து துணுக்குகள் படித்திருப்போம்.

இன்று பல வீடுகளிகளில் அழகு சாதனப் பொருட்கள் அத்யாவசியப் பொருட்களாகி விட்டன. மாதம் சில பல ஆயிரங்கள் அதற்குச் செலவும் ஆகிறது. ஆனால் அதிகாலை எழுந்து குளித்துவிட்டு அதன் பின் கண்ணில் மையிட்டுக் கொள்வதில்லை தலையில் பூச்சூடிக் கொள்வதில்லை என எந்தப் பெண்ணும் சொல்வாளோ..!!

பாவை நோன்பு என்னும் விரதத்தை கடைபிடிக்கும் ஆண்டாள் சொல்கிறார். நெய் உண்ணோம் பால் உண்ணோம் என சாப்பாடும் விஷயத்தில் மட்டும் விரதம் இருப்பது பெரிதல்ல.தீய சொற்கள் பேசாதிருப்பது பெரிதல்ல.. தான தருமங்கள் செய்வது பெரிதல்ல.. 

செய்யக் கூடாததை செய்யாமல் இருப்பது பெரிதல்ல

பெண்ணின் இயல்பான அலங்கரிக்கும் குணத்தையும் அந்த மாலவனுக்கு அர்ப்பணிப்பது தான் பெரிது.. அதுவே இந்நோன்பின் நோக்கம் என்னும் போது கண்ணன் மேல் ஆண்டாள் கொண்ட அளவிலா நேசம் புரியும்.

மார்கழி 2ஆம் நாள் பாடல் :

வையத்து வாழ்வீர்காள் நாமும்நம் பாவைக்குச்


செய்யும் கிரிசைகள் கேளீரோ பாற்கடலுள்


பையத் துயின்ற பரம னடிபாடி


நெய்யுண்ணோம் பாலுண்ணோம் நாட்காலே 

நீராடி
மையிட்டு எழுதோம் மலரிட்டு நாம் 

முடியோம் செய்யா தனசெய்யோம் தீக்குறளைச் 

சென்றோதோம் 
ஐயமும் பிச்சையும் 

ஆந்தனையும் கைகாட்டி
 உய்யுமாற் எண்ணி 

உகந்தேலோர் எம்பாவாய்.

1. மார்கழித் திங்கள்..

#ஆண்டாள்_பெருமை

ஒரே வார்த்தையில் பல விஷயங்களை  சொல்லிவிடுவார்கள் சிலர். ஆண்டாளும் அப்படியே நிலா சூரியன் மேகம் மூன்றுமே கண்ணன் ஒருவனே என்கிறார்.. கார்மேக வண்ணமும் சூரியன் போல சூடும் நிலா போல் குளிர்ச்சியும் ஒன்றாக உடையவன் என்கிறார்.. மார்கழி மாதத்து நிறை நிலா நன்னாளில் நீராடச் செல்வோம் 

ஆயர்குல செல்வப் பெண்களே கூரான வேலினால் கொடுமையை அழிக்கும் நந்தகோபனும் அழகிய கண்ணுள்ள யசோதையும் வளர்த்த இளம் சிங்கம் கார்மேகவண்ண சூரிய சந்திரன் போல முகமுடைய கண்ணன் நமக்கு பறை தந்து அருள்வான் உலகமே அவனை புகழும்படி பாடிடுவோம் வாருங்கள்.

இந்தப் பாடலில் ஏரார்ந்த கண்ணி என்று அழகான கண் உடையவள் என யசோதையையும் வர்ணிக்கிறார்.. உலகில் மாமியாரின் அழகை வர்ணித்த ஒரே பெண் ஆண்டாளாகத் தான் இருக்க முடியும்.. சரிதானே!

மார்கழி 1ஆம் நாள் பாடல்..

மார்கழித் திங்கள் மதிநிறைந்த நன்னாளால்


நீராடப் போதுவீர் போதுமினோ 

நேரிழையீர்
 சீர்மல்கும் ஆய்ப்பாடிச் செல்வச்

சிறுமீர்காள்
 கூர்வேல் கொடுந்தொழிலன் 

நந்தகோ பன் குமரன் 
ஏரார்ந்த கண்ணி யசோதை 

இளம் சிங்கம்
 கார்மேனி செங்கண் கதிர்மதியம் 

போல் முகத்தான் 
நாரா யணனே நமக்கே 

பறை தருவான்
 பாரோர் புகழப் படிந்தேலோர் எம்பாவாய்.

T3

#தோழா_தோழி_திருவிழா

T 3 என சுருங்க அழைக்கப்படும் இவ்விழாவிற்கான அழைப்பு முதலில் ஷாஜகான் ஸார் பதிவில் நண்பர்களுக்கு பொதுவில் வைக்கப்பட்டிருந்தது.. ஏற்கனவே இருமுறை அவரை சந்திக்க இருந்து அது முடியவில்லை.. இம்முறை அவரை சந்திக்கும் வாய்ப்பை தவறவிடக்கூடாது அதனால்  நிச்சயம் ஒருநாளாவது அங்கு போவது என முடிவெடுத்து இருந்தேன்.

இடையில் பெருமழையால் சென்னையில் பல வேலைகள் தள்ளிப்போக 2 நாட்களும் போகும் சூழல் ஏற்பட்டது.. நான் முகநூலில் குருவாக ஏற்றுக் கொண்டிருக்கும் நான் ராஜா மகள் நிச்சயம் 2 நாளும் வரவேண்டும் என என்னிடம் கேட்டுக் கொண்டார்.. நிச்சயம் 2 நாட்களும் வருகிறேன் என உத்திரவாதம் அவருக்கு தந்துவிட்டேன். ஆனால் அதற்கும் வினை வந்தது.

நிகழ்ச்சிக்கு சரியாக 4 தினங்களுக்கு முன் புதிய திரைப்படத்தில் நடிக்கும் வாய்ப்பு 16,17 &18 ஆகிய மூன்று தினங்களும் எனக்கு படபிடிப்பு கொஞ்சம் படபடப்பும் வந்தது.லதா அருணாச்சலம் அங்கு போகிறார் எனத்தெரிந்ததும் ராஜாமகளிடம் நான் 18 ஆம் தேதி வரமுடியாது ஆனால் நிச்சயம் 19 ஆம் தேதி வருகிறேன் எனத் தகவல் சொல்லச் சொன்னேன்.

எனக்கு கொஞ்சம் அதிர்ஷ்டம் இருந்தது 18 ஆம் தேதி மதியமே படபிடிப்பு முடிய உடனே கிளம்பிவிட்டேன். சரியாக மாலை 5 மணிக்கு மண்டபத்தை நெருங்க ஷான் கருப்பசாமியும் ஶ்ரீதர் சுப்ரமணியமும் ஒரு கடையில் காபி அருந்திக் கொண்டிருந்தார்கள் உங்களைப்பத்தி தான்பேசிகிட்டு இருந்தோம் கரெக்டா வர்றீங்க என்றார்ஷான் சேர்ந்தே மண்டபத்திற்குள் நுழைந்தோம். மேடையில் ஷாஜகான் ஸார் பேசிக்கொண்டிருந்தார்.

பிரபா சுப்ரமணியன் தேநீருடன் வரவேற்றார்.. ஆதித்யா ஆதித்யா, கார்த்திக் புகழேந்தி, தமிழ் அரசி, லதா அருணாச்சலம், மரியா சிவானந்தம் என அறிந்த முகங்களும் பல அறியாத முகங்களும் இருந்தனர்.. ராஜாமகள் மேடையில் பம்பரமாக சுழன்று கொண்டிருந்தார்.. அவருக்கு உதவியாக அவரது குடும்பத்தினரும்.. மாலை ஞானி அவர்களின் பரிட்சார்த்தா குழுவினரின் நாடகம் இருப்பதாக அறிவித்து விட்டு ஷாஜகான் ஸார் மேடையிலிருந்து கீழிறங்கி

என்னைப் பார்த்ததும் விழிகள் விரிய புன்னகைத்தார்.. விரைந்து அவரை தழுவி கை குலுக்கிக் கொண்டேன்.. வந்ததற்கு மிக்க மகிழ்ச்சி என்றார்.. வாங்க சாப்பிட போகலாம் என்னும் குரலுக்கு திரும்பினால் ராஜாமகள்.! குருவை வணங்கினோம் பிரமாதமான சுண்டல் வாழைக்காய் பஜ்ஜி டீ என எளிய சுவையான சிற்றுண்டி.. இங்கு பரிமாறிய உணவுகளை தனிப்பதிவாக போட உத்தேசம்..ஆகவே வாங்க ஞானி ஸார் நாடகம் பார்க்க போலாம்.

வரும்...

பாரதிக்கு

#பாரதிக்கு_சமர்ப்பணம்

செந்தமிழ்நாடெனும் போதினிலே- மழை வெள்ளமும் பாயுது வீட்டினிலே- எங்கள் அமைச்சர்கள் யாவர்க்கும் பேச்சும் இல்லே- பெருமூச்சும் பிறக்குது மக்கள் மூக்கினிலே..

சோகம் நிறைந்த தமிழ்நாடு- வீண் விளம்பரம்  நிறைந்த தமிழ்நாடு- நிலவினில் கண்டிடும் குழிகளைப் போல் நெடுஞ்சாலைகள் கொண்ட தமிழ்நாடு..

காவிரி தென்பெண்ணை பாலாறு-தமிழ்க் கண்டதோர் வையை பொருனைநதி- மணல் வாரி எடுத்து பின் வெள்ளத்திலே நன்கு மூழ்கிக் கிடக்கும் தமிழ்நாடு..

முத்தமிழ் பின்தள்ளி நல் ஆங்கிலத்தில் கல்விச் சாலைகள் கொண்ட தமிழ்நாடு-செல்வம் எத்தனை யுண்டோ அத்தனையும் விற்று கல்வி வியாபாரமான தமிழ்நாடு...

நீலத் திரைக்கட லோரத்திலே-நின்று மீனவர் வருவதை எதிர்பார்த்திருந்து அண்டை நாட்டிடம் அவர் மாட்டியதும் ஒரு கடிதம் எழுதுகின்ற தமிழ்நாடு...

வள்ளுவன் சிலப்பதி காரமென்று-மணியாரம் படைத்த தமிழ்நாடு

இதை புத்தகத்தில் மட்டும் படித்துவிட்டு வெட்டி ஜம்பம் அடிக்கும் தமிழ்நாடு...

சிங்கள நாட்டுக்கு கச்சத்தீவையுமே தாரையும் வார்த்த தமிழ்நாடு

புலிக்கொடி மீன்கொடி பறந்த இந்நாட்டினில் கட்சிக் கொடிகள் பறக்கவிட்ட திருநாடு..

ஏரிகள் எல்லாம் ஆக்ரமிப்பு அதை கேட்கவும் தைரியம் எழவும் இல்லை பிறர் வெள்ளத்து நிவாரணப் பொருட்களிலும் நன்கு ஸ்டிக்கர்கள் ஒட்டும் தமிழ்நாடு. 

<{புதிய பாரதி}>

கலிபோர்னியா..

#பேரரசு_இயக்கத்தில்_அர்னால்டு

( அர்னால்டு நடித்து எந்திரன் ஹிட் ஆனதும் தமிழ் இயக்குநர்கள் படையெடுத்து அர்னால்டின் தயாரிப்பாளரிடம் கதை சொல்கிறார்கள் முதலில் பேரரசு.. )

வாங்க மிஸ்டர் பேரரசு.. வணக்கம்ண்ணே நம்ம அர்னால்டு அண்ணனுக்கு கேத்த செம கதை ஒண்ணு சொல்றேன்.. அர்னால்டண்ணன் அமெரிக்காவுல ஒரு லேத் பட்டறை வைச்சு இருக்காரு.. எம்.எஸ். பாஸ்கர், பென்ஜமின், முத்துக்காளை, கிங்காங்ன்னு செம அதிரடி குரூப்பு அந்த ஃபிரெண்டுங்க..

கிங்காங் என்றதும் தயாரிப்பாளர் மல்யுத்த வீரரான்னு கேக்க.. இல்லண்ணே இவரு காமெடி கிங்காங்.. கதையை கேளுங்க படத்துல அண்ணனுக்கு ரெண்டு தங்கச்சி.. ஒண்ணு நம்ம லட்சுமி மேனன் இன்னொண்ணு சரண்யா மோகன்.. பேரரசு ஒரு நிமிஷம் அர்னால்டுக்கு இவங்க தங்கச்சியா நல்லாவா இருக்கும்..? லட்சுமி மேனன் கூட ஓகே அர்னால்டுக்கேத்த உடல் வாகு..

ஆனா சரண்யா எப்படி..? சரிண்ணே நம்ம மல்லிகா புள்ள இருக்கு பழைய சோத்த போட்டு உடம்பை டெவலப் பண்ணா அர்னால்டு அம்மான்னா கூட ஏத்துக்குவாங்க.. ஓகே கதையோட ஒன்லைன் என்ன..? அதாவதுண்ணே இந்த ஃபேஸ்புக் ட்விட்டர் இதனால பாதிக்கப்படுற பெண்களை அண்ணன் எப்படி காப்பாத்துறாரு..அதான் ஒன் லைன்.

அட பரவாயில்லையே லேட்டஸ்ட் டிரண்டுக்கெத்த மாதிரி இருக்கே மேல சொல்லுங்க..அண்ணே சின்ன வயசுல அமெரிக்காவுல கலிபோர்னியாவுல பொறந்த நம்ம அண்ணனோட அப்பாவுக்கு ரெண்டாவது பொண்டாட்டி ஒண்ணு இருக்கு அவங்களுக்கு பொறந்தவங்க தான் இந்த தங்கச்சிங்க..

சாகுறப்ப இந்த உண்மையை அர்னால்டுகிட்ட அவர் சொல்லிட்டு அந்த தங்கச்சிங்களுக்கு நீ தான் தகப்பனா இருந்து கல்யாணத்தை நடத்தியாகணுமுன்னு சத்யம் சிவம் சுந்தரம் எல்லாம் வாங்கிட்டு சாக.. இது வரைக்கும் தான் ஒரு அநாதைன்னு நினைச்ச அர்னால்டண்ணன் தனக்கு 2 தங்கச்சிங்க இருக்காங்க தெரிஞ்சதும் பாசத்துல உருகுறாரு.

அவங்களைத் தேடி கண்டுபிடிக்குறாரு அவங்களும் தனக்கு இப்படிப் பட்ட அண்ணன் ஒருத்தர் இருக்காருன்னு தெரிஞ்சதும் கண் கலங்குறாங்க.. அப்புறம் அண்ணன் அமெரிக்கா முழுக்க மாப்பிள்ளை தேடிகிட்டு இருக்க ஒருநாள் என்ன நம்ம தங்கச்சிங்க ரெண்டு பேரும் எப்பவும் நெட் பார்த்துகிட்டு இருக்காங்க அது ஏன்னு போய் பார்க்குறாரு.

அப்ப தான் அந்த உண்மை தெரிய வருது தங்கச்சிங்க ரெண்டு பேருமே ஃபேஸ்புக் மூலமா தமிழ்நாட்டில் காதல் வயப்பட்டு இருப்பதை.. தங்கச்சிங்க விருப்பத்தை நிறைவேற்ற அண்ணன் தங்கச்சிங்களை கூட்டிகிட்டு சென்னைக்கு பிளைட் ஏறுறாரு.. சென்னையில எங்க தங்குறது யாரைப் பார்க்குறதுன்னு கூட அவருக்கு தெரியாது. வந்து இறங்கிட்டாரு

ஏர்போர்ட்டில் ஒரு டாக்ஸி ஏற்பாடு பண்ணி அவங்க கிளம்ப அந்த டாக்சி டிரைவர் திடீர்னு மயக்க மருந்து ஸ்பிரே அடிக்க மூணு பேரும் மயங்கி விழுகுறாங்க.. கார் ஊருக்கு ஒதுக்குப் புறமா இருக்குற ஒரு பாழடையாத நல்ல பங்களாவுக்கு போகுது.. அங்க மூணு பேரையும் ஒரு தூணில் கட்டிப் போடுறாங்க.. அர்னால்டுக்கு விழிப்பு வருது..

கை கால அசைக்க முடியலை அப்படி கட்டிப் போட்டு இருக்காங்க எதிர்ல 20 ரவுடிங்க.. டேய் அவுத்துவிடுங்கடான்னு கத்துறாரு.. வில்லன்கள் கேலியாக சிரிக்க திடீர்னு வாசல்ல நெருப்பு பொறி அரிசிப் பொரி, அவல் பொரி எல்லாம் பறக்க வில்லன்கள் பதறி திரும்ப.. காக்கி பேண்ட் சட்டை உள்ள கருப்பு பனியன் கண்ணுல கூலிங் கிளாஸ் சனியன்னு ஒருத்தர்..

வெரி இன்ட்ரஸ்டிங் பேரரசு... யார் அந்த என்ட்ரியான கேரக்டர்.. (வெட்கத்துடன்) நான் தான் சார் என்னைப் பாத்ததுமே ரவுடிங்க பேதி பீதியாகி ஓடிடறாங்க.. அர்னால்டை நான் தான் காப்பாத்துறேன்.. அர்னால்டு என்னை கட்டிப்பிடிச்சுக்குறாரு.. இப்ப ஸ்க்ரீன்ல கதை திரைக்கதை வசனம் பாடல் இயக்கம் பேரரசுன்னு டைட்டில் கார்டு வருது..

நான் அவரை என் லேத் பட்டறைக்கு கூட்டிட்டு போறேன்.. அங்க இருந்து கிட்டே அவரு தங்கச்சிங்க காதலிச்ச ஆட்களை தேடுறாரு அப்ப தான் அந்த அதிர்ச்சியான ஒரு சேதி தெரியுது.. ஏர்போர்ட்டுல எல்லாத்தையும் கடத்துனதே அந்த காதலர்கள் தான்னு.. அர்னால்டு திகைச்சுப் போயி நிக்க இங்க போடுறோம் இடைவேளை..

அப்புறமா பார்த்தா அதுல ஒரு தங்கச்சியோட போட்டோவை மார்பிங் பண்ணி ஆபாச வெப்சைட்டில் பரப்பிய விஷயம் தெரிய ஒரு தங்கச்சி தூக்கு போட்டு செத்துடுறா.. உடனே.. வெகுண்டு வெடிகுண்டு அணுகுண்டா அர்னால்டு அண்ணன் அந்த காதலனை பழி தீர்க்க சபதம் எடுக்குறாரு.. அப்ப தான் இன்னொரு அதிர்ச்சியும் தெரிய வருது.! அது என்னங்க பேரரசு..?

தங்கச்சிங்க ரெண்டு பேரையும் காதலிச்சவன் ஒரே ஆள்ன்னு..! அந்த ரெண்டு ஐடியும் ஃபேக் ஐடின்னும் தெரியுது.. விசாரிச்சா அவன் ஒரு பெரிய கும்பலுக்கே தலைவன்னும் அவன் பேரு ஏழரை ஏழுமலைன்னும் சங்கு சண்முகம், பீர் பாண்டி, மாணிக்சந்த் மாணிக்கம் அப்படின்னு பல தளபதிகள் அவனுக்கு அவங்க எல்லாம் எங்க இருக்காங்கன்னு பார்த்தா தமிழ்நாட்டுல இருந்து தப்பிச்சு போயி அதே அமெரிக்கா கலிபோர்னியாவுல..

அண்ணன் திரும்ப அமெரிக்கா கிளம்பராரு.. கலிபோர்னியாவுல அப்படியே ஒரு முனிஸ்வரர் கோயில் செட்டு போட்டு கிளைமேக்ஸ் பைட்டு.. அண்ணன் கமாண்டோவுல வெடிகுண்டு துப்பாக்கி எல்லாம் லோடு பண்ணுவாறே அதை தூக்கி சாப்புடுறா மாதிரி இதுல சந்தனம் குங்குமம் விபூதி எல்லாம் எடுத்து முஞ்சியில கைல கால்ல அப்பிகிட்டு வாயில ஒரு சூலாயுதத்தையும் கவ்வுறாரு.. அப்படியே போய் துவம்சம் பண்றாரு கூடவே நானும்..

கடைசியா டிவிட்டர் ஃபேஸ்புக் தீமை பத்தி அண்ணன் நாலு வரி பேச.. உதவிக்கு வந்த நான் 40 பக்கம் பேசறேன் தாங்க முடியாத வில்லனுங்க எல்லாம் அவங்களே வாலண்டியரா சூலாயுதத்தை எடுத்து வயித்துல சொருகிகிட்டு செத்து போயிடுறானுங்க.. அண்ணன் அப்படியே என் கையை பிடிச்சு லட்சுமி மேனன் கையோட சேர்த்து வைக்க.. படம் முடியுது..!

எப்படிண்ணே இருக்கு கதை..? எல்லாம் சரி படத்துக்கு என்ன பேரு..? அட அதை சொல்லலை பாருங்க... பேரரசு & அர்னால்டு இணைந்து மிரட்டும் "கலிபோர்னியா" நல்லா இருக்காண்ணே.. புரடியூசர் மயங்கி விழுகிறார்.

போராளியின் டைரி...

#முகனூல்_போராளிகளின்_நவம்பர்_2015_டைரிக்குறிப்பு

வேதாளம் டீசர்ல ஆரம்பிச்சது நவம்பர் மாசம்... அது ஏய் படத்துக் கதை... தூங்காவனம் ப்ரெஞ்ச் படத்துக் கதைன்னு உள்ளூர் சினிமால இருந்து ஒலக சினிமா வரைக்கும் கரைச்சிக் கழுவி வுட்டு வெளாண்டோம்.

அப்புறம் வூட்ல சுட்ட பீடை புடிச்ச சீடை, வரட்டி மாதிரி அதிரசம், முறுக்கு, ஜாங்கிரி, டோங்கிரி எல்லா பலகார போட்டோவும் போட்டு ஆப்பி தீவாளி சொல்லிகிட்டோம்... ஒரு சிலரு அவங்க தேனடைங்க கிட்ட தேன் வழுக்க வழுக்க  (அதாங்க சொட்ட சொட்ட) உள்ளாற இருக்க டப்பாவுல பட்சணம் சுட்டோம். (கடலை தான்)

இடையில லாலு நிதீஷ் சபாசு.. மோடி அமித்ஷா பூட்டகேசுன்னு வெடி போட்டோம்.. அவர் அத்வானியையே ஓரங்கட்டுனவரு நம்மள ஓரங்கட்றது என்ன பெரிசா..! வழக்கம் போல வெளிநாடு கிளம்பி போயி டிபன் காபி சாப்பிட்ட போட்டோ போட அதையும் கலாய்ச்சோம். தீபாவளி முடிஞ்சது

அப்புறம் தான் உலக லெவலுக்கு மாறுனோம்.. அல்லாரும் மூஞ்சியில பிரான்ஸ் கொடிய குத்திகிட்டு பொங்கி வழிஞ்சோம்... சில பேரு பிரான்ஸ் புலனாய்வுத் துறைக்கெல்லாம் ஸ்கெட்ச் போட்டு தந்து புளகாங்கிதமா இல்ல புளங்காகிதமா ஏதோ ஒண்ணை அடஞ்சோம்.

பிரான்சுக்கு தான் பொங்கலா.? இந்த கடலூர் தாமிரபரணிக்கு எல்லாம் 2இட்லி அட அட்லீஸ்ட் கொஞ்சம் பழைய சோறாவது போட்டிங்களான்னு கேட்டதும் சுரீர்ன்னு கோவம் வந்து ஜீன்ஸை சுருட்டிகிட்டு சண்டையை ஆரம்பிச்ச நேரம்...

அப்டியே இடி வெட்டி மின்னல் இடிச்சு "சோ"ன்னு மழை கொட்டுச்சு.. சரி நவம்பர் மாச மழை தானேன்னு நெனைச்சா.. அது சோ"வைத் தாண்டி நாகேஷ், சந்திரபாபு, தங்கவேலு, குலதெய்வம் ராஜகோபால், காகா ராதா கிருஷ்ணன், காளிN.ரத்தினம், NSK ன்னு விடாம பெஞ்சுகிட்டே போச்சு.

ஒருமணிநேரம் மழை பெஞ்சாலே ரோடெல்லாம் மினி ஸ்கர்ட் ஃபுல் ஸ்கர்ட்டா தெரிய மழைத்தண்ணி ஓடும்.... இதுல 4 நாள் விடாம பெஞ்சா.. ஊரே தண்ணியில மிதக்க.. FBயில் புறப்பட்டுச்சி நம்ம பதிவு கப்பல்கள்.

இதுல கலாய்க்கிறேன்னு "ஓலா போட்"ன்னு அவனை சீண்டி ஐடியா குடுக்க அவன் நெஜமாவே சைக்கிள் கேப்புல டைட்டானிக் ஓட்டி சம்பாரிச்சுட்டான். அம்மா, ஆடு, இலை, கலைஞர், கட்டுமரம் கோபாலபுரம் வரை பதிவுகளில் மழையை வச்சி படகு விட்டு வாயை வச்சி வடை சுட்டு மகிழ்ந்தோம்..

விட்ட மழை ரெண்டு நாளில் மறுபடி வருமுன்னு ரமணன் சொல்ல ரமணன் வருணன் பதிவு மழையை விட அதிகமா கொட்ட.. குழந்தைகளுக்கு ரமணன் ரமண மகரிஷியை விட தெய்வமாக தெரிய மீண்டும் சென்னை மிதக்க.. 

ஏரியெல்லாம் வீடுன்னு சர்வேயரா சர்வே எடுத்து சர் சர்ருன்னு ஸ்டேட்டஸ் போட பாதிக்கப்பட்ட சென்னை மக்களை விட நாம இங்க அதிகமாபுலம்ப.. அதை தாங்கிக் கொள்ளாத நம்ம தோழர்கள் கொதிச்சுட்டாங்க.

அதென்ன சென்னை.! தமிழ்நாட்டுல மத்த ஊரெல்லாம் என்ன பாவமுன்னு ஒரு அவலக்குரல் கேட்டதும் ஆனந்தவிகடனைக் கண்ட அம்மா போல பதறி அட நாமளும் தென் மாவட்டம் தானேன்னு சப்போர்ட் பண்ணப் போனா..

இந்த அமீர்கான் பய நாட்டுல சகிப்புத் தன்மை லிப்ட்டுல ஏறி இறங்கி கிட்டே இருக்கு நான் புள்ளக் குட்டியோட நாட்டை விட்டே போறேன்னு மொத்த ஃபேஸ்புக்கையும் திசை திருப்பி விட்டுருக்கான் ரேஸ்க்க்கல்ஸ்.. 

போடா போடா இந்தியா பக்கமே வரதடா ஓடிடிடான்னு அவனை கண்டபடி திட்டிட்டு வந்துட்டோம்.. இதை நீங்க ஏன் சகிச்சுகக் கூடாதுன்னு கேக்குறிங்களா.. அட போங்க பாஸ் அப்புறம் எப்படி போராளியாவுறது

உஸ்ஸ்ஸ்ஸ்... அபா... உஸ்ஸ்ஸ்ஸ் அபபா.. எத்தனை..மூச்சு வாங்குது.. ந்தா இப்படி கொஞ்சம் உக்காந்துக்குறோம் ஒரு ஜோடா தர்றியளா.. இன்னும் டிசம்பர்ல எப்படியெல்லாம் இங்க உளைக்க வேண்டியது இருக்குமோ..?  நெட் ரீ சார்ஜ் போட்டு வந்து வச்சுக்குவோம்.. வர்ட்டா...

ஓவிய உதவி : Thanks to Santhosh Narayanan

பூகா கிரகம்..

#பூகா_கிரகம்

மஞ்சள் நிற இரவு... வானம் வெண்மையாக இருந்தது.. சிவப்பு ஊதா பச்சை ஆகிய மூன்று நிறத்தில் அறுகோண வடிவ நிலாக்கள் மூன்று ஜொலித்து கொண்டிருந்தன.

விடியலில் வயலட் நிற சூரியன் வடக்கில் உதிக்க இன்னும் 3 வருடங்களே இருந்தது. 60 நாட்கள் ஒரு வினாடியாய் கழிந்து கொண்டிருந்தன.....

தரையெங்கும் நீல நிற மண் குவிந்திருந்தது அதிலே கலன்கள் அமர்ந்த சுவடுகளைத் தவிர வேறேதும் இல்லை கிரகத்தின் அனைத்து மனிதர்களும் கால்களால்  சுவாசித்து கொண்டிருந்தனர்.

இடுப்புக்கு கீழே அவர்களது நுரையீரல் விம்மிக் கொண்டிருந்தது.. உயிர் வாழத் தேவையான நைட்ரஜன் அந்த வெளியில் குறைந்து இருந்தது..

அவர்களின் அக்குளுக்குள் இருந்த மூளை அடுத்த கட்டத்தை பற்றி சிந்தித்து கொண்டிருந்தது. முதுகில் இருந்த 8 கண்களும் விழித்து கொண்டே இருந்தது...

அவர்கள் அனைவருக்கும் தெரியும் அவர்களது பூகா கிரகம் அழியப் போகிறது என்று வேற்று கிரக வாசிகளின் தாக்குதல் தொடங்கப்போகிறது என்று...

அவர்கள் கிரக தெய்வம் பூகாரூன் 3 நூற்றாண்டுகளுக்கு முன் சொன்னது நினைவுக்கு வந்தது... இதோ விண்கலங்கள் வந்திறங்கும் பேரிரைச்சல் செங்குத்தான ராக்கெட் போன்ற ஒரு கலன்..

இது பூமி என்ற கிரகத்தில் உபயோகிப்பதல்லவா அந்த மக்கள் சாவின் விளிம்பில் நின்று யோசித்து கொண்டிருந்த போது பூமியில் இருந்து வந்த கலத்தின் வாசல் திறந்தது... 

பூகா கிரக மக்கள் தங்கள் வாழ்வின் கடைசி வினாடியை தங்களது இதயத்தால் பிடித்த படி பார்த்து கொண்டிருந்தனர் பூமியின் கலத்திலிருந்து இறங்கிய உருவத்தை பார்த்ததும் அவர்கள் அனைவரும்.....

அக்குளில் இருந்த மூளை வெடித்து சிதறி இறந்தே போனார்கள்... பூமியின் கலத்திலிருந்து இறங்கி கொண்டிருந்தார்....

.

.

.

.

.

.

.

.

.

மோடி..!!!!!!

 ஹி...ஹி...ஹி ....ஹி ...

அவன்..சிவன்..

அ(சி)வன்..

அவனை அடிக்கடி எங்கள் பகுதியில் பார்க்கலாம்.. சாம்பல் நிறத்தில் உலகிலுள்ள அத்தனை கறைகளும் படிந்த கால்சட்டை அதற்கு அரைஞாண் கயிறு பெல்ட்..நிறம் என்னவென்று கூற முடியாத கிழிந்த சட்டை எண்ணைக் காணாத முள்ளம்பன்றித் தலை தாடைக்கு கீழ் மட்டும் முள் புதராய் தாடி என்னால் கணிக்க முடிந்த அவன் வயது ஏறத்தாழ என் வயதே இருக்கும்.. எப்போதும் சிரித்த முகம் மணிரத்னம் விரும்பும் பல் வரிசை!

ஆம்.. அவ்வளவு கருப்பு.. எதிரில் உள்ள உணவகத்திலும் டீக்கடையிலும் செல்லப் பிள்ளையவன்.. ஒரு கிளாஸ் தேனீரோ 4 இட்லியோ அவனுக்கு எளிதில் கைவரப் பெற்றது.. யாரிடமும் காசு கேட்க மாட்டான்.. கொடுத்தாலும் வாங்க மாட்டான்... கீழே சிதறி இருக்கும் சிகரெட் துண்டுகளைப் பொறுக்கி எடுத்து அதில் ஒன்றை பற்றவைத்து நுரையீரல் நிரப்பிக் கொள்வான்.. ஏகாந்தமாய் அவன் அதை குடிப்பதே பார்க்க அலாதியாக இருக்கும்.

மனநிலை பிறழ்ந்தவன் என்பார்.. நான் அவனை சித்தன் என்பேன்.. இன்று காலையில் தெப்பலாக நனைந்து வெறும் கால் சட்டை மட்டும் அணிந்து நடந்து வந்து கொண்டு இருந்தான் கையில் ஈரமான கருப்பு டிசர்ட்.. அதை தலையில் போர்த்தியிருந்தான்.. கை கால்கள் நீரில் உறி வெளிறியிருந்தது.. உடல் வெட வெடவென நடுங்கிக் கொண்டிருக்க அவன் முகத்தில் அதே மாறா டிரேட்மார்க் சிரிப்பு.. வந்தவன் டீக்கடைக்குள் நுழைந்தான்.

குத்துகாலிட்டு தரையில் அமர்ந்தான்.. வழக்கம் போல ஒரு பேப்பர் கப்பில் டீ வந்தது.. முதன் முறையாக என்னிடம் இரு விரல்களை அவன் உதடுகளின் மேல் வைத்து எடுத்து சைகையில் சிகரெட் வேண்டுமெனக்கேட்டான். குளிர் தாங்க முடியவில்லை எனப் புரிந்தது... வாங்கித் தந்தேன்.. ஒரே மூச்சில் சூடான டீயை சரேலென கவிழ்த்துக் குடித்துவிட்டு வாயோரம் ஒட்டியிருந்த தேநீர்த்துளிகளை கூட துடைக்காமல்.. சிகரெட்டைப் பற்றவைத்தான்.

இன்னும் அவன் உடல் நடுங்கிக் கொண்டு இருந்தது.. எதிரே தான் என்வீடு.. நேராக வீடு வந்து குளிர் தாங்கும் ஒரு டீ சர்ட் தேடினேன்.. Tommy பிராண்ட் சிவப்பு முழுக்கை டீசர்ட் குவாலிட்டியானது.. வெளிநாட்டில் வாங்கியது எடுத்துக் கொண்டு சென்றேன்.. அதற்குள் அந்த சிகரெட்டை முடித்திருந்தான். பனியனை நீட்டினேன்.

சட்டென வாங்கி அணிந்து கொண்டான் அவனது கறுப்பு டீசர்ட்டை பந்து போல சுருட்டிக்கொண்டான்..எழுந்தான்... விடுவிடுவென நடந்தான் நேராக குப்பைத் தொட்டிக்கு போனான்.. விருட் என நான் தந்த பனியனை அவிழ்த்துக் குப்பைத் தொட்டிக்குள் எறிந்தான்.. அவன் கறுப்பு பனியனை தலையில் போர்த்திக்கொண்டு அதே டிரேட் மார்க் புன்னகையுடன் நடந்தான். அவன்போக்கு நமக்கு புரியாது ஏனெனில்...

#சித்தன்போக்கு_சிவன்போக்கு_அல்லவா 

மழைப் பாக்கள்...

#மழைப்_பாக்கள்

பேய்மழைக் காற்றுடன் சோவெனப் பெய்ய

நாய்நரி எல்லாம் பதுங்கிய தெருவில்

காய்கறி வாங்கிட வழியெதும் இன்றி

பாய்தனிலமர்ந்து பதிவுகள் இட்டேன்.

தெருவிலே ஓடிடும் தேங்கிய நீராம்

உருவிலே அதுவோர் சிறிய ஆறாம்

கருவிலிருக்கும் சுருண்ட சிசுபோல்

மருகினார் மக்களி வ்வூரில்.

இடியது முழங்கும் சத்தத்தில் நடுங்கி

தடியதால் தாக்குண்ட அரவமாய் நசுங்கி

விடியலில் கதிரவன் காட்சிக்கு ஏங்கி

கொடியது இந்த அடைமழை நன்னாள்.

காரிருள் சூழ் மழை அவனியில் பெய்ய 

ஊரினுள் சாலையில் ஏரியும் தேங்க

தேரதுபோல் மெல்ல வாகனம் ஊர

நாறுது வாழ்விங்கு மாநகர்தனிலே.

சீர்மிகு சென்னையில் மேவிய சாலைகள்

நீர்மிகு நதியாய் ஓடிடும் வேளைகள்

நேர்மிகு மனிதர்கள் இம்மழைக் காலையில்

பார்புகு(ந்து) போதையில் பணிந்தன ரன்றோ.

மும்மாரி பெய்த மாதங்கள் இல்லை

அம்மாரி ஒருநாளில் பெய்வதே தொல்லை

எம்மாரி பெய்தாலும் மக்களின் வாழ்க்கை

அதுமாறிப் போகா என்பதே இயற்கை.

வங்கக்கடல் சீற்றம் கண்டேன் இப்புயலில்

அங்கம் நடுங்கியது அப்பெரும் மழையில்

தங்கம் போல் விடுமுறை நாளது ஒன்று

சிங்கம் போல் சோம்பலில் கழிந்த தின்று.

புயல் அடிக்கும் இந்நாளில் நானும்

கயல் சமைத்து உண்கிறேன் வாரும்

முயல் அதுபோல் விரைந்தோடி

பயலிவன் கவிக்குப் பரிசு பல கோடி.

முன்னைப் பிறவியில் செய்திட்ட நற்பயன்

என்னை அழைத்திங்கு குடிபுக வைத்தது

சென்னை நகர்தனில் அமைந்திட்ட வாழ்வினை 

மொண்ணை யென்றாக்குதே பெய்கிற தொடர் மழை.

புள்ளின் வாய்மொழி கீழ்திசைக் கேட்க

வள்ளென ஞமலியின் போர்க்குரல் முழங்க

கள்ளென போதையாய் வந்ததோர் சேதி

நில் இன்று பணியில்லை விடுமுறை என்றால்.

#சென்னையைப் பத்தி என்னவோ ஒருப் பா.

1. 

சிற்றாறு சுழித் தோடுமந்த சிந்தாதிரியில்

காட்டாற்று வெள்ளமது பாய்கின்ற சைதை

அருவிகளைக் காண அசோக நகராம்

கேணிகள் பல காண் கே.கே.நகராம்

சுனைகள் குளங்கள் ஏரிகள் குட்டைகள்

மூழ்கியே போனது சென்னையின் பேட்டைகள்

நிலவிலே காணும் முழுவட்டக் குழிகள்

நிஜத்திலே பார்க்கலாம் சாலைகள் மீதே 

சிலநாள் மழைக்கே சிங்காரச் சென்னை

Sink ஆகிவிட்டதே அதுதான் உண்மை.

2. 

ஊறிய நெகிழிகள் ஊரெங்கும் மிதக்க

நிலத்தடிக் கழிவுகள் ஊர்வலம் நடத்த

வைகுந்த கைலாய லோகங்கள் அடைந்திட

சாக்கடை மூடிகள் அடைப்பது இல்லை 

சாலையில் தேங்கிய மழைநீர் அலைகள்

கழிவுநீர் கலந்து புரியுது கொலைகள்

பசுக்களை வளர்த்து வாழ்ந்த நற்றமிழர் 

கொசுக்களை வளர்த்து வீழ்ந்தன ரிங்கு

தலைநகர் இதுவென பெருமிதம் கொள்ள

எதுவொன்றுமில்லை என்னத்தைச் சொல்ல.

பட்டப்பெயர்கள்..

#முகநூலில்_சில_பட்டப்பெயர்கள்

காலை/மாலை/இரவு வணக்கப் பதிவர் = கும்பிடு குருசாமி.

ஃபேக் ஐடிக்கள் = அவ்வை சண்முகி.

சமூக அக்கறை / சிந்தனையாளர் = அந்நியன்.

இன்பாக்ஸ் கடலை பார்ட்டி = ரெமோ.

ஆல்பர்ப்பஸ் அங்கிள்ஸ் = அம்பி.

ஆண்களிடம் வழியும் ஆண்கள் = இவன் வேற மாதிரி.

திருமணமான பெண்களிடம் வழிபவர் = கலாபக் காதலன்.

எப்போதும் பெண்கள் பதிவில் இருப்பவர் = மன்மதன்.

காப்பி & பேஸ்ட் பதிவர்கள் = சுட்ட பழம்.ப்

செல்ஃபி / போட்டோ பதிவர்கள் = பி.சி.ஶ்ரீராம்.

வீடியோ பதிபவர்கள் = ஆபரேட்டர்.

ஷார்ட்டான பதிவுகள் போடுபவர் = வள்ளுவர்.

நீளப் பதிவுகள் போடுபவர் = கம்பர்.

வெறும் லைக் மட்டுமே போடுபவர் = மிக்சர்.

கமெண்ட்டில் அதிரடி காட்டுபவர் = கமாண்டோ.

கவிதைகள் எழுதுபவர் = பக்கெட் (வாளி).

எல்லாரையும் டேக் செய்பவர் = டைலர்.

புரியாத பதிவுகள் போடுபவர் = கமல்.

பழைய பதிவுகளை தோண்டி எடுப்பவர் = கொத்தனார்.

எல்லாரும் படித்த ஓல்டு செய்தியை புதிதாக பதிவிடுபவர் = சுடு பழைய சோறு.

அறிவு ஜீவியாக எழுதுபவர் = ஞானப்பழம்.

யூ ட்யூப் கூகுள் ஆதாரத்துடன் பதிபவர்கள் = லிங்க் கேஸ்வரன்கள்.

இனி நீங்க சொல்லுங்க...

கனவுச் செய்திகள்...

#வெளிவராத_நாளிதழ்_செய்திகள்

+தமிழகத்தில் கனமழையால் பாதிப்பு எங்கும் இல்லை அரசு எடுத்த முன்னெச்செரிக்கை நடவடிக்கைக்கு மக்கள் பாராட்டு...

+மழையால் சாலைகளில் நீர் தேங்காது நிலத்தடிக்கு நீர் திருப்பிவிடும் திட்டம் மூலம் 50 டி.எம்.சி நீர் சேமிப்பு.

+தமிழகம் எங்கும் கன மழையால் கொஞ்சம் கூடசாலைகள் சேதமாகவில்லை நெடுஞ்சாலைத் துறையினருக்கு பாராட்டு குவிகிறது.

+புறநகர் பகுதிகளில் நீர் புகாமல் நீர் நிலை ஆதாரங்களை தூர் வாரியதால் அந் நீர் சேகரிப்பு திட்டம் வெற்றியடைந்துள்ளது..

+பாதாள சாக்கடைகள் ஒழுங்கு படுத்தப்பட்டதால் மழையில் எங்கும் அது நிரம்பி வழியவே இல்லை அனைத்து மாநகராட்சி நகராட்சி நிர்வாகங்கள் சாதனை.

+அடுத்த 5 ஆண்டுகளுக்கு உடையாத ஏரிக்கரைகளை பலப்படுத்திய பொதுப் பணித்துறையினர் தேசிய விருது பெறுகிறார்கள்.

+தமிழகத்தில் அணைகள் ஏரிகள் நிரம்பின.. பாசனத்திற்கு தண்ணீர் திறந்து விடப்படுகிறது.. வெள்ள அபாய எச்சரிக்கை முறைப்படி அறிவிக்கப்பட்டு உயிர்சேதம் பொருட்சேதம் தடுக்கப்பட்டது.

+எவ்வளவு மழை வந்தாலும் இனி கடலூர் தாங்கும்.. கடலூர் கலெக்டர் பெருமிதம்.

+அடுத்த 10 ஆண்டுகளுக்கு தேவையான தண்ணீர் தேவை இருப்பில் உள்ளது குடிநீர் வாரியம் அறிவிப்பு.

+மழையால் எங்கும் நிற்காமல் பழுதின்றி ஓடியும் ஒரு சொட்டு தண்ணீர் கூட உட்புறம் வராத அளவிற்கு நல்ல வசதியுடன் அரசுபேருந்துகள் இயங்கியன மக்கள் நெகிழ்ச்சி.

+சாலைகளில் நீர் தேங்கியதை பார்த்து 25 வருடங்கள் ஆயிற்று 85 வயது மூதாட்டி ருசிகர பேட்டி.

+மத்திய அரசின் வெள்ள நிவாரண நிதி வாங்காத மாநிலம் என்னும் பெருமையை தொடர்ந்து 10 வது ஆண்டாக தக்க வைக்கிறது தமிழகம்.

+தமிழகத்தில் உள்ள அனைத்து நதிகளும் இணைக்கப்பட்ட பணிகள் முடிவுறும் தருவாயில் உள்ளது.. தைப் பொங்கலன்று திறந்து வைக்கிறார் முதல்வர்.

+கன மழை வந்தால் எப்படி அதை எதிர்கொள்வது.. அதை தமிழகத்தில் கற்றுக் கொள்ளுங்கள் ஐ.நா.சபை அறிவிப்பு.

+நீர் மேலாண்மை பற்றி கற்றுக் கொள்ள தமிழகம் வருகிறார்கள் அமெரிக்க பல்கலைக் கழக மாணவர்கள்.

+தமிழகம் முழுவதும் 7894 புதிய நீர் நிலைகள் ஏற்படுத்தப்பட்டது.. பழைய நீர் நிலைகள் 8956 கண்டுபிடிக்கப்பட்டு தூர் வாரப்பட்டன.

+ஒரே நாளில் 300 செ.மீ மழை பெய்தாலும் பாதிப்பின்றி தாங்கும் உலகின் ஒரே இடம் தமிழ்நாடு தான்.. சர்வதேச பேரிடர் மேலாண்மை அமைப்பின் தலைவர் நற்சான்றிதழ்.

+எங்களுக்கு தண்ணீர் தாருங்கள் ஆந்திரா, தெலுங்கானா,கேரளா அரசுகள் தமிழகத்திடம் கெஞ்சல்.

+காவிரி நீர் இனித் தேவைப்படாது... நீங்களே வைத்துக் கொள்ளுங்கள் கர்நாடக அரசிடம் தமிழகம் திட்டவட்ட அறிவிப்பு.

+இவ்வாண்டும் தேசிய அளவில் வேளாண்மையில் முதலிடம் பிடித்தது தமிழகம்.