2🚗 🏝 க்யூபா கடல் எல்லைப்பயணம் 🏝 🚘 2

இலங்கையிலிருந்து அகதிகள் கள்ளத் தோணி வழியாக இராமேஸ்வரம் வருவது போல க்யூபாவில் இருந்து கீ வெஸ்ட்டுக்கு வரும் அகதிகள் அதிகமாம்.. ஆனால் இதில் ஒரு சுவாரஸ்யமான விஷயம் நீங்கள் வரும் கப்பலில் இருந்து இறங்கி உங்கள் கால் அமெரிக்க மண்ணை மிதித்து விட்டால் போதும் தண்ணீருக்குள் நீந்திக் கொண்டிருக்க கூடாது அட்லீஸ்ட் இடுப்பளவு நீரிலாவது நின்று கால் பதித்திட வேண்டும்.. அப்படிச்செய்தால்.?

உங்கள் பாதம் மண்ணை மிதித்துவிட்டால் இனி நீங்கள் அமெரிக்க பிரஜை.. க்யூபா குடிமகன் அல்ல இந்த சட்டம் கென்னடி ஜனாதிபதியாக இருந்த போது போட்ட சட்டமாம்.. இப்போது போட்டியிடப் போகிற டிரம்ப்  நான் ஆட்சிக்கு வந்தால் இதை நீக்குவேன் என அறிக்கை விடுத்து இருக்கிறார்.. அரசியல் போகட்டும்.. பேருக்கு இவர்களை கைது செய்து சிறையில் அடைத்துவிட்டு சிட்டிசன் ஷிப் கார்டு ரெடி ஆனதும் இவர்களுக்கு விடுதலை.

அவ்வளவு தான் க்யூபர்களுக்கு அமெரிக்காவில் வேலை கிடைப்பது எளிது.. உணவகங்களில் அல்லது கடின உடல் உழைப்பு தேவைப்படும் இடங்களில் க்யூபர்களை இன்றும் காணலாம். இந்தச் சலுகை க்யூபர்களுக்கு மட்டுமே வேறு யாருக்கும் இந்த சலுகை இல்லை என்கிறது அமெரிக்க சாசன விளம்பரம். இதில் மனைவி பிள்ளைகளோடு வந்து கணவன் தரையில் கீழிறங்கி மனைவி பிள்ளைகள் கப்பலோடு திருப்பி அனுப்பப்பட்டது...

மனைவி பிள்ளைகள் இறங்கி கணவன் திரும்பிப் போனது.. வயதான பெற்றோர்களை இழந்தது.. இப்படி பல சோகக் கதைகள் அங்குண்டு. க்யூபா கதைகளை விட க்யூபா பானம் எங்களை கிறுகிறுக்க விட சோற்று மூட்டையை அவிழ்த்தோம்.. தமிழ்நாட்டு கொங்கு ஸ்டைலில் சமைக்கப் பட்டிருந்த சமையல் மீன் குழம்பு, சிக்கன் குழம்பு, கோலா உருண்டை, ரசம் சப்பாத்தி வெஜ் & எக் ரோல் என ரகளையான சாப்பாடு.. கட்டு கட்டினோம்.

இங்கும் பீச் காற்று தாலாட்ட 30 நிமிட உறக்கம்.. தூங்கி எழுந்தவுடன் முகம் கழுவி ஃப்ரெஷ் ஆனோம்.. ஆளுக்கு ஒரு பெரிய க்ளாசில் மிண்ட் லைம் ஜூசை கொண்டுவந்த கூல் பாக்சில் இருந்து எடுத்துக் கொடுக்க அந்த வெயிலுக்கு அது ஜில்லோ ஜில்லாக இருந்தது.. மீண்டும் பயணம் ஊருக்குள் சென்றோம்.. க்யூபா 90 மைல் எனக்காட்டும் ஒரு ஸ்தூபி வித விதமான சிலைகள் என ஊர் வித்யாசமாக இருந்தது.. மக்களிடம்

அமெரிக்க ஸ்பானிஷ் இரு கலாச்சாரமும் கலந்திருந்தது.. அவர்களது கட்டிடங்கள், உடைகள், ஊரின் அமைப்பு, அங்குள்ள சிலைகள் இவற்றில் இந்த கலவை கலாச்சாரத்தை காண முடிந்தது.. சின்ன ஊர் தான் வேறு சுற்றிப்பார்க்க முக்கிய இடங்கள் ஏதுமில்லை.. அல்லது எங்களுக்கு நேரமில்லை.. 4 மணிநேரம் பிரயாணித்து வந்து கடற்கரையில் உணவருந்த தானா இதற்கு நீங்கள் இருக்கும் ஃப்ளோரிடாவிலேயே மியாமி இருக்கிறதே 

என கேட்பவர்களுக்கு இந்த பயணம் ஒரு திரில்.. ஃபிடல் காஸ்ட்ரோ, சேகுவாரா போன்ற உலகப் போராளிகள் வாழ்ந்த பூமியை சூரியவம்சம் சரத் ராதிகா போல முக்காடு போட்டுக் கொண்டு போகாமல் அக்கரையில் இருந்து பார்த்து ரசிக்கவே இந்தப் பயணம்..எங்கள் கால்கள் க்யூபாவில் படாவிட்டாலும் எங்கள் கால்களை நனைத்த அட்லாண்டிக் அலைகள் அவற்றை அக்கரையில் கொண்டு சேர்க்குமே என்று தான் வந்தோம்.

கன்னியாகுமரியின் சூரிய உதயம் அஸ்தமனம் போல இங்கும் சூரிய உதயம் அஸ்தமனம் உலகப்புகழ் பெற்றது என்றார்கள்.. ஆனால் இங்கு நிமிடம் வினாடி முதல் துல்லியமாக சொல்கிறார்கள் அன்றைய அஸ்தமனம்  6:45:31 எனச் சொன்னார்கள் மணி 6:10 போகும் வழியெங்கும் கடல் தான் என்பதால் பயணத்தை ஆரம்பிப்போம்.. அடுத்த ஊரில் பார்க்கலாம் என்றார் சின்னப்பன்.. அங்கிருந்து தூரே தெரிந்த க்யூபாவிடம் கையசைத்து..

கிளம்பினோம்... சொன்னது போல 30 வது நிமிடம் சாலையின் ஒரு ஓரத்தில் வண்டியை நிறுத்தினார் சின்னப்பன்.. அமெரிக்கர்கள் இட்ட கட்டளைக்கு அடி பணிவது போல மிகச் சரியாக 6:45 க்கு தன் ஆரஞ்சு உடலுடன் கடலுக்கு மேலே தெரிந்த சூரியனார் மிகச்சரியாக 31 வது வினாடி நீரின் மேற்பரப்பை முத்தமிட்டு வேகமாக மூழ்கிப் போனார்.. சூரியன் வேண்டுமானால் மறையலாம் இந்த கீவெஸ்ட் நினைவுகள் என்றும் மறையா.

நிறைந்தது.