#லிமரிக்
செய்கூலி சேதாரம் ஏதும் இங்கில்லை
சென்னையில் இதுவே குறைவென்ற சொல்லை
பொய்யில்லை என்று
புறப்பட்டோம் இன்று
மெய்யை அறிந்தோம் இது விளம்பரத் தொல்லை.
பில்லா என்றொரு தாதா
பிறக்கையில் அவன் சாதா
நல்லா வளர்ந்து
நாலும் தெரிந்து
குல்லா போடுகிறான் தோதா.
காவியத்தில் வடித்ததொரு காதல்
கனிந்திடுமது தேவையொரு மோதல்
ஓவியம் போல் வரை
ஒன்றாகவே கரை
பாவியென்று பேர் வந்தால் சாதல்.
நெய்யூற்றி ரசஞ்சாதம் சாப்பிட்டு பாரு
நெசமாவே சொல்லிடுவே அது மிக ஜோரு
பொய் ஏதும் இல்லை
போட்டாச்சு இலை
மெய்யாக ருசித்திட்டு உண்மையைக் கூறு.
புடலங்காய் பாசிப் பருப்போடு கூட்டு
புழுங்கலரிசி சோறோடு கலந்து வெட்டு
கடல பருப்பு சேர்த்தா
கனிவோடு என் ஆத்தா
குடல பசி பிடிச்சா வாங்கிடுவேன் கேட்டு.
போலியாக பெண்ணின் படம் வைத்து
புகுந்து காட்டிடுவார் முகநூலில் சித்து
ஜாலியான சாட்டு
ஜொள்ளருக்கு வேட்டு
காலியாகும் ஸ்கிரீன்ஷாட்டில் உன் கெத்து.
இவன் மவுனத்தில் சிரிக்க வைத்தவன்
இப்புவியினரை எல்லாம் மகிழ்வித்தவன்
அவன் செய்யும் சேட்டை
அங்கதத்தின் கோட்டை
எவனும் இணையில்லை இவனே நிலைத்தவன்.
#சாப்ளினுக்கு
அவிய்ங்க எல்லாம் அப்படித்தான் மதுரகாரய்ங்க
அன்பு வச்சா உசுரை குடுக்கும் பாசகாரய்ங்க
இவிய்ங்களால தொல்ல
இனி எப்பவுமே இல்ல
எவிய்ங்களாவது மோதிப்பாத்தா அருவா பேசுங்க.
இருபது தேதிக்குள் தீர்ந்திடுது சம்பளம்
இல்லாமை வீட்டிற்குள் விரிக்கிறது கம்பளம்
தருவது யார் கடன்
தயங்கி கேட்டவுடன்
கருமிளகு ரசஞ்சோறோடு தினசரியும் அப்பளம்.
தன்னிகரில்லா தமிழ் மொழியாம்
திசைகள் எட்டும் அதன் வழியாம்
கன்னித் தமிழ் நன்று
கருகிப் போனதின்று
பன்னி லாங்வேஜென சொல்வதே சரியாம்.
அமிதாப்பை கண்டு சிவாஜி என்றார்
அதிர்ச்சியில் அனைவரும் சிலையாக நின்றார்
நமிதாவுக்கு தனுஷ் சர்ட்டு
நன்கு ஆகுமா செட்டு?
நிமிர்ந்த கலைஞனின் புகழை விளம்பரத்தில் கொன்றார்.
குப்பத்தொட்டி குடிசை சுண்டக்கஞ்சி டீக்கடை
குப்பமுன்னா முக்கியமா ஓடணும் சாக்கடை
இப்ப நீயும் தெரிஞ்சிக்கோ
இது மாறாது புரிஞ்சிக்கோ
கப்படிச்சா ஒதுங்கிடுவோம் அங்கிருக்க பூக்கடை.
சேட்ஜி சொல்றான் அச்சா
சேகருன்னு ஒரு பச்சா
வட்டிக்கு வாங்கி
வாழ்ந்தான் ஏங்கி
சட்டுனு அவர் பெண்ணை காதலிச்சு ஆனான் ரிச்சா.
தோள்கள் தினவெடுத்து போரிட்டான் வீரன்
தோல்விகள் காணாத சூராதி சூரன்
நாள்கள் கடந்து போனது
நம் வீரனுக்கு மணம் ஆனது - மனைவியை
கோள்கள் போல சுற்றுகிறான் தீரன்.
ஏண்டா செஞ்சே இப்படி
எதுக்கு சொன்ன அப்படி
போண்டா தின்னு
போதாது ஒண்ணு
காண்டா இருந்தா எப்படி.
பாண்டியனும் சோழனும் போல் போட்டார்கள் சண்டை
பளிச்சுன்னு தெரியுது மறைக்காத கொண்டை
தாண்டினார்கள் எல்லை
தந்தார்கள் தொல்லை
ஆண்ட்ராய்டு காலத்திலும் பிடிக்கிறார்கள் சிண்டை.
கவுத்தி வச்ச பஞ்சாரத்தில் கோழி இருக்குது
கவருமெண்டு ஆளைப்போல தூங்கிக் கிடக்குது
நவுத்திடாம பாத்துக்கோ
நல்லா நீயும் கேட்டுக்கோ
பவுர்ணமி வந்தா பலி போட வேண்டியிருக்குது.
சீலா, வாளை, வஞ்சிரம் என்பார்
சிரத்தையாய் முள் நீக்கித் தின்பார்
நாலா அதனை வெட்டி
நல்ல மசாலா சேர்த்துருட்டி
கோலா செய்தபின் பிடிக்குமா சாம்பார்.
எட்டிக்காய் போல கசப்பு
எப்ப விடியுமோ என் பொழப்பு
வட்டிக்கு வாங்கி
வாடுறேன் வதங்கி -பனிக்
கட்டியாய் கரையிது கையிருப்பு.
பிறந்தது மன்மதத் தமிழ் ஆண்டு
பிரச்சனைகள் வரக்கூடாதென வேண்டு
சிறந்தது ஆசை
செழிக்கட்டும் பூசை
மறந்திடாது இந்நிலை தாண்டு.
வாலி என்னுமொரு வாலிப கவிஞன்
வார்த்தைகளில் விளையாடும் கலைஞன்
தாலி கட்டினான் எழுத்துக்கு
தங்கப்பதக்கம் வந்தது கழுத்துக்கு
காலியாகா குறும்பில் என்றுமவன் இளைஞன்.
பத்தாம் வகுப்பு பாட திட்டத்தில் இல்லை
படிப்பவனுக்கு ஆசிரியையால் தொல்லை
முத்தான முத்தங்கள் இட்டு
முந்தானைக்குள் முடிந்து கட்டு
பத்திரமாய் பறந்திட்டார் ஊரின் எல்லை.
பள்ளிக்கூடம் பக்கத்துல பிட்டுப்பட போஸ்டரு
பசங்களுக்கும் புரிஞ்சுடுச்சு பலான மேட்டரு
எள்ளி நகைக்குறாங்க
எசகுபிசகா கதைக்குறாங்க
துள்ளி ஓடுகிறார் கட்டடித்து தியேட்டரு.
சென்னை சூப்பர் கிங்ஸ் பாரு
சொல்லி அடிப்பாங்க அது ஜோரு
என்னைப்போல் ரசிகர் பல நூறு
எழுந்தாடி விசில் போடக் கூறு
வின்னர் இவருக்கு இணை யாரு.
காவிரி தென்பெண்ணை பாலாறு
காய்ந்து கிடப்பது தான் கோளாறு
பூவிரித்து ஓடியது அன்று
பொலிவின்றி வாடியது இன்று
பாவிகளானது உழவரைத் தவிர வேறாரு.
பாவென்று எழுதியிருக்கிறேன் பல அடாசு
பாழ் என்று தூக்கியதை கடாசு
மாவென்றால் தோசை
மா புலவனாக ஆசை
தூவென்று துப்பாது இருக்கவே இந்நகாசு.
எழுத்து சிறந்தால் தமிழிலது இயல்
ஏற்றம் தந்து போற்றிடும் செயல்
கழுத்துக்கு மாலை வரும்
காவியமென பேரைத் தரும்
பழுதான களையில்லா இலக்கிய வயல்.
அகரமுதல குறளினைப் பேருந்தில் எழுதி
அழகாக ஆக்கினான் ஓவியன் வழுதி
தகரத்து ஓலையது
தமிழின் மாலையது
நகரத்தில் வெகுநாள் நிலைக்காது படிந்திடும் புழுதி.
செம்மரக் கொள்ளையென்று கொன்றிட்டார் பலரை
செத்தவர் திருடரென்று பூசுகிறார் புதுக் கலரை
அம்மரம் வெட்டியது போலே
அப்பாவிகள் உடல் மண்மேலே
கும்பலில் மறைத்திட்டார் அம்முதலாளிகள் சிலரை.
நாட்டு மக்கள் அனைவருக்கும் போட இல்லை சட்டை
நல்லதொரு திட்டமில்லை நெற்றியிலே பட்டை
காட்டுவார் ரூபாய் நோட்டு
கவர்ந்து வாங்குவார் பல ஓட்டு - வென்றபின்
மாட்டு மந்தை மக்களுக்கு சுழற்றுவார் சாட்டை.
மோர் குடித்தான் தமிழன் அன்று
முழு வெங்காயம் அதனுடன் தின்று
யார் வந்து மாற்றினார்
யந்திரம் போல் ஆக்கினார்
பீர் குடிக்கிறான் தமிழன் இன்று.
சுரிதார் என்பது பெண்கள் உடை
சூரர் ஆண்களும் அதையணிய ஏது தடை
புரியார் இதை வெறுப்பார்
புரிந்தவர் ஜிப்பா என்றழைப்பார்
சரிதான் என்போர் விரைவர் துணிக் கடை.
நென்ச்சா மன்சுக்குள்ள மெர்சலாவுது
நெஞ்சுல இர்க்க மாஞ்சாசோறு கொறச்சலாவுது
பன்ச்சா ஒரு மொத்து
பல்லு மேல குத்து
மன்சனுங்க சண்டபோட்டா டென்சனாவுது.
குறிஞ்சி நகர் என கண்மாய்க்கு பேரிட்டார்
குடிநீருக்கு அங்கே போர் இட்டார்
உறிஞ்சிட்டார் அதில் நீரை
உருவாக்கிட்டார் ஓர் ஊரை
அறியாது வாங்கியவர் மழைக்காலத்தில் நாறிட்டார்.
ராமன் ஒருவில் ஒருஇல் என வாழ்ந்தான்
ராவணன் அவனிடம் மோதி வீழ்ந்தான்
காமன் தந்த போதை
கவர்ந்தானந்த சீதை
வாமன் முன் திருப்பலி போல் தாழ்ந்தான்.
எத்தனை கோடி இன்பம் இறைவா
எவருக்கு நீ தருவாய் அதைக் குறைவா
அத்தனை நலமும்
ஆயுள் பலமும்
இத்தனையும் தந்தால் மனதாகும் நிறைவா.
வெண்பா குறும்பா எண்சீர் விருத்தப்பா
வெகுநேரம் யோசித்தேதும் வரவில்லையப்பா
நண்பா சொல்லப்பா
நானெழுதும் தமிழ்ப்பா
மண்பானை நீரைப்போல் இனிக்கும் தித்திப்பா.
அமெரிக்க தேசத்தில் கிடைக்குமா வேலை
அலைகின்றார் இங்குள்ள தூதகரச் சாலை
அமெரிக்காவின் பச்சை அட்டை
அதுவே பலரின் கனவுக் கோட்டை
லிமெரிக் இதை எழுதினார் விசாக்யூ நகரா வேளை.
கமர்கட் மாங்கா தேன் மிட்டாய்
கல்கோணா விற்கும் சிறு கொட்டாய்
அமர்ந்து விற்பாள் பாட்டி
அதை தின்று அடித்த லூட்டி
நமக்கு இனிய நினைவென்று எழுதிடுவோம் பாட்டாய்.
வெண் பொங்கல் உளுந்தவடை சட்னி
வெங்காய சாம்பாருடன் வெட்டு நீ
கண் மயக்கும் தூக்கம்
கட்டில் இல்லாது தூக்கும்
மண்வாசனை படம் போய் தூங்கினேன் மேட்னி.
வேகம் மிக செலுத்திடுவார் வண்டி
வேதனை தான் ஓடிவரும் அண்டி
நாகம் போல் தீண்டும்
நரகத்தை வேண்டும்
சோகத்தில் தள்ளிடும் குழி தோண்டி.
கலைஞர்
கவிஞர்
வலைஞர்
வயதில்
இளைஞர்.
மீசை முறுக்கி ஆண்மை காட்டினான்
மேனி அதிலே வீணையை மீட்டினான்
ஆசை அடங்காது என்று
ஆண் அவன் சொன்னதின்று
இசைந்தவளை கைவிட்டதும் மாட்டினான்.
லட்சுமி இங்கு வந்தாச்சு
லட்சரூபா கிடைச்சாச்சு
லட்சியம் அதுதான்
லஜ்ஜையும் இதுதான்
சட்டென கனவு கலைந்தாச்சு.
வழக்கமாக நடக்கின்ற செயலாகும் இது
வாரந்தோறும் செய்திகளில் இடம் பிடிக்கும் அது
பழக்கமாகிப் போச்சு
பார் முழுக்கப் பேச்சு
கழன்று விழும் மீனம்பாக்க கூரைக்கு நிகர் எது.
ஜெயகாந்தன் கல்கி சுஜாதா எழுத்து
ஜல்லியடிக்குறான் கொஞ்சம் படித்து
ஜெயமோகனை ஆஹா என்றான்
ஜம்பம் தான் சாரு என நின்றான்
விஜயா ஒயின்ஷாப்பில் பகன்றான் இக்கருத்து.
களிப்போடு ஸ்காட்ச்சில் ஐஸ் கட்டி
கலக்கி குடிச்சான் நம்மாளு குட்டி
இளிப்போடு கேட்டான் முந்திரி
இரண்டெரெண்டு தந்தா சுந்தரி - பின்பு
நெளிப்போடு நடந்து போனா வெட்டி.
இசைஞானி பாடல்களில் நிறைய வரும் ஆத்தா
இளையராஜாவே போற்றிய கவி எங்கள் மேத்தா
வசை பாடத்தெரியாதவர்
வாய்ப்பந்தல் அறியாதவர்
திசை எட்டுமிவர் புதுக்கவிதை வீசிடுமே காத்தா.
தர்பூசு இளநி வெள்ளரி மோரு
தவிச்ச வாய்க்கு அது ரொம்ப ஜோரு
ஓர்பீசு ரூபா பத்து
ஒண்ணு சாப்பிட்டானே முத்து
சுர்ருன்னு இப்படி வெயிலடிச்சா இது பத்தாது சாரு.
கண்ணன் என்றதுமே களிப்பாகும் பக்தர் மனம்
கசிந்துருகி அவன் பேரைச் சொல்வார் அனுதினம்
அண்ணன் அவன் பலராமன்
ஆயர்கோபிகைக்கு இவன் காமன்
வண்ணனின் குழல் கேட்டு பூப்பூக்கும் நந்தவனம்.
ராஜாவின் இசையிங்கு பலருக்குத் தாலாட்டு
ராகத்து தேவனவன் ரசித்துச் சீராட்டு
ரோஜாவில் முள்ளுண்டு
ராஜகீதத்தில் கள்ளுண்டு
தாஜா செய்யவில்லை இது மெய்யான பாராட்டு.
செல்ஃபி எடுப்பது வைரலாக ஆச்சு
செகண்டுக்கு ஒரு ஸ்டில்லு எடுத்து போட்டாச்சு
குல்ஃபி வண்டி சத்தம் போல
கும்மியடிக்குது முகநூல் வால்ல
மெல்ல இதனால ப்ரைவஸியே போச்சு.
ஆம்லேட் ஆஃப்பாயில் புரோட்டா நன்று
ஆளவந்தார் கடையில் அதெல்லாம் தின்று
ஹாம்லெட்டின் பாட்டு
ஹாலிவுட் படம் காட்டு
ரூம்மேட்டின் பீட்டரால் கடன் தந்தார் இன்று.
சச்சினவன் மட்டையடி வீரன்
சாதனைகள் பலபுரிந்த சூரன்
கொச்சினில் விக்கெட்டு அஞ்சு
கொய்து எடுத்தான் ரிவெஞ்சு
நச்சென்ற பவுலிங்கிலும் அவன் தீரன்.
ஏர்டெல் ஐடியா வோடாபோன் நெட்வொர்க்கு
எதுதான் பெஸ்ட்டுன்னு கேட்டான் நம்ம ஜக்கு
ஏர்செல் கடையில இத கேட்டா
எவன் தான் சொல்வான் ரைட்டா
யார் செல்லும் 2ஜின்னா செய்யாது குட்வொர்க்கு.
காற்று வாங்க கடற்கரையில் கூட்டமேதும் இல்ல
கடும் வெயிலு சூடு கிளப்பி புழுக்கமான தொல்ல
மாற்றுக்கு இருக்குது ஏசி
மக்களுக்கு தருவாங்களா ஓசி
நேற்று அது கிடைச்சிருச்சி துணிக்கடைக்கு உள்ள.
வள்ளுவர் இளங்கோ கம்பன் என்று
வாய் கிழியக் கிழிய சொல்வார் இன்று
தள்ளுவர் தமிழ் மொழியை
தாங்குவர் ஆங்கில வழியை
உள்ளத்துள்ளே ஒன்று வெளிவேடம் மிக நன்று.
ஐநாக்ஸில் ஆங்கிலப்படம் பார்க்கப் போனோம்
ஐஸ்க்ரீம் கையேந்தி உள்ளே ஐக்கிய மானோம்
ஸ்நாக்ஸ் தின்று பார்த்த படம்
ஸ்நேக் கடித்தது போல் சங்கடம்
கைநாட்டு சிலர் அருகில் நொந்து நூடூல்ஸ் ஆனோம்.
கரைபுரண்டு நீரோட அழகர் இறங்கினாரு வைகை
கடல் போல மக்கள் வந்து தொழுதாங்க இருகை
தரையே தெரியா ஆறு அன்று
தண்ணீரே வருவதில்லை இன்று
அரையாய் தேய்ந்து அது ஆனது சிறு பொய்கை.
எத்தை தின்றால் பித்தம் தெளியும்
என்றே கேட்டால் யாருக்கு தெரியும்
அத்தை மகளின் காதல்
அப்பாவுடன் குடும்ப மோதல்
சொத்தைக் கொடுத்தால் இணையும்.
ஈமு எம்.எல்.எம் ரைஸ் புல்லிங் என்றார்
ஈமொய்க்கும் பண்டம்போல் மக்களெல்லாம் சென்றார்
தாமு எனும் தம்பி
தந்தார் பணம் நம்பி
காமுகன் கைசிக்கியவள் போல் கதறியழுது நின்றார்.
புதுக் கணக்கு பூஜையெல்லாம் போட்டு
பசும் மஞ்சள் வைத்து அக்கவுண்ட்டு நோட்டு
எதுவானாலும் நல்லா
ஏற்றம் தரணும் ஃபுல்லா
அது போல வேண்டுறேன் நடக்குமா டவுட்டு.
தலை வாழையிலைப் போட்டு சோறு
தயிரோடு வடை பாயாசம் பழச்சாறு
அலை மோதுது பந்தி
ஆரவாரித்தது என் தொந்தி
சிலையாட்டம் நிக்குறேன் பீடா கிடைக்குமா கூறு.
குவாரியில் கிரானைட்டு எடுத்தாரு பாண்டி
குவிச்சாரு பளிங்குக் கல்லை பாங்காய் தோண்டி
சவாரிக்கு நாலு பென்சு
ஸ்காட்சோட கையில கிங்சு
டவாலியோடு ஐஏஎஸ் வந்ததும் ஆனாரு ஆண்டி.
சுத்தம் மிகத் தேவையென்றார் மோடி
சுற்றுப்பயணத்தில் நிதி திரட்ட ஓடி
பித்தம் தெளியும் என்றார் அங்கே
வெளிநாட்டுக் கறுப்புப்பணம் எங்கே - என்றதும்
சத்தமின்றி நின்றார் வாய் மூடி.
ஒபாமா வந்து இறங்கினாரு டில்லி
ஓவராக மீடியா அவரு பேரை சொல்லி
சபாநாயகரா ஆரவார கும்மி
மத்தவங்க ஆனாங்க டம்மி
ஒபாமா முன்னாடி வேற யாரு கில்லி.
உமாசங்கர் கனவுல தான் வந்துட்டாரு இயேசு
உள்ளபடி அதுக்கு அவர் கேக்கலையே காசு
உமா செத்தவனை எழுப்புவேன்னு சொன்னார்
ஊரில் இயேசுவே திகைச்சி போயி நின்னார்
ஆமா இப்ப இணையத்திலே நல்ல டைம்பாசு.
முறுக்கு எலந்தவடை மாங்கா திங்க காசு
முடிஞ்சா வாங்கிடலாம் தட்டைக்குச்சி ஐசு
அருமை மகராசிஅம்மா
அசரமா பணம் தருவா சும்மா
இதைப்போல இப்ப இல்ல காத்தடைச்ச லேசு.
கஜா வந்து பேட்டையில உட்டான் பாரு டகுலு
காதுல கேட்டதுமே அல்லாரும் அட்ச்சாங்க பிகிலு
கஜாவோட தங்காச்சி பட்டு
கலரான சேட்டுக்கடை லட்டு
மஜா செய்ய எவன் வந்தாலும் எகிறிடுண்டா செவுலு.
குறும்பா எழுதத்தான் கூட்டினாங்க குரூப்பு
குவியுற கவிதையெல்லாம் லிமெரிக்கின் டூப்பு
வெறும்பா என்று அது ஆச்சு
வெட்டியா எழுதினாலும் போச்சு
கரும்பா இனிக்காட்டி வைப்பாங்க ஆப்பு.
லிமெரிக் எழுதி பழக்கமில்லை என் கைக்கு
லபக்குன்னு முகநூலில் எழுதிட்டா குவியுதே லைக்கு
தமிழை கொட்டுறனா புரியலை
தளை தட்டுமான்னும் தெரியலை
சைக்கிள் தான் பழகுறேன் எனக்கெதுக்கு பைக்கு.
உலக்கோப்பை ஆட்டத்துல ஜெயிச்சாங்கய்யா ஆஸி
உள்ளூருல வீரனுங்க எதிர்த்து ஆடுன நியூசி
பல அணிகள் நியூசியால ஆனாங்க பிளாக்கு
பைனலிலே டாராக கிழிச்சாரு கிளார்க்கு
கலங்காம ஆடினாக்கா நமக்கெந்த டீமும் தூசி.
எந்திரத்தில் உருவான செல்லக் குட்டி ஜீனோ
எழுதுவது அவரென்றால் எளிதாகும் நானோ
அந்திரத்தில் அவர் சாட்டிலைட்டு
அசராம எழுதினார் பல சப்ஜெக்ட்டு
மந்திரர் அவர் கற்பனைக்கு எல்லையந்த வானோ.!
ஞாயிறு காலையிலே ஆறுமணிக்கு முழிப்பு
ஞாபகமா கடைக்கு போயி கறி வாங்கும் பொழப்பு
வாயிறுக்க முடியலை
வாழைப்பூவும் பிடிக்கலை
காயிருக்கும் கடைக்கு தான் என்னால இழப்பு.
No comments:
Post a Comment