வ.போ. வடை போச்சே.

பாட்டி வடை சுட்ட கதையை நம் தமிழ் சினிமா இயக்குநர்கள் இயக்கியிருந்தால் ஒரு ஜாலி கற்பனை...

முதலில் இயக்குநர் ஷங்கர்...

பல கோடி ரூபாய் செலவில் அமைக்கப்பட்ட பிரம்மாண்டமான கண்ணாடி மாளிகை செட்டின் முன் ஒரு நவீன ஹெலிகாப்டர் வந்து இறங்குகிறது..! வடைசட்டி, மாவு, எண்ணை சகிதம் அதிலிருந்து தன் சிறிய ரோபாட் உதவியுடன் இறங்கும் பாட்டி நவீன சோலார் இண்டெக்ஷன் ஸ்டவ்வை பற்ற வைக்க அந்த உதவி ரோபோ வடை மாவு பிசைந்து தருகிறது. பாட்டியும் வடை சுடுகிறாள்.!

பாட்டி வடைகளை போட்டோ எடுத்து ஆன்லைனில் அப்லோடு செய்ய கிரெடிட் கார்டுகள் மூலம் வடைகள் பரபரப்பாக விற்க ஆரம்பிக்கிறது. ஆர்டர்களை ரிசீவ் செய்யும் ரோபோ தன் மெமரியில் சேவ் செய்து டெலிவரி ரோபோக்களுக்கு சொல்ல டெலிவரி ஆகிறது.! இந்த காட்சி முழுவதும் பின்னணியில் கொலம்பஸ் கொலம்பஸ் சுட்டாச்சு வடா..கொண்டாட நீயும் அதை இங்கே கொண்டாடா..என்ற பாடலுடன்!

பாடல் முடிவில் யூயூயூயூயூயூயூவ்வ்வ்வ்வ் என பின்னணிக்குரல் ஒலிக்க 360 டிகிரி மாட் ரிக்ஸ் ஷாட்டில் 64 கேமிராக்களால் ஒரு காகம் பறந்து வந்து அந்த கண்ணாடி மாளிகைக்கு எதிரில் உள்ள மரத்தில் அமர்கிறது. அது அமர்ந்த அடுத்த நொடி உதவி ரோபோவின் சென்சாரில் அலாரம் அடிக்கிறது.. மேடம் பீ கேர்ஃபுல், மேடம் பீ கேர்ஃபுல் என்னும் சிந்தைசர் வாய்ஸ் ஒலிக்க துவங்க பாட்டி உஷாராகிறாள்.!

தன்னிடம் உள்ள சேஃப்டி ரிமொட்டை அழுத்த வடை வைத்திருக்கும் தட்டை சுற்றி ஒரு லேசர் வளையம் சூழ்கிறது.! அந்த வளையத்துக்குள் எது நுழைந்தாலும் பஸ்பமாகிவிடும். உடனே பாட்டி கட்டைவிரல் தூக்கிக்காட்ட ரோபோவும் விரல் உயர்த்துகிறது.. நடந்ததை எல்லாம் அந்த காகம் மெல்ல தன் கண்களில் உள்ள காமிராவில் படம் பிடிக்கிறது..! ஆம் அது ஒரு ரோபோ காகம்.!

எல்லாவற்றையும் படம் பிடித்த காகம் மீண்டும் 360 டிகிரி மாட் ரிக்ஸ் ஷாட்டில் கிளம்பி போகிறது.! மீண்டும் யூயூயூயூயூவ்வ்வ் மியூசிக். பறந்து சென்ற காகம் காகங்களின் உலகிற்குள் நுழைகிறது (இதுவும் பிரம்மாண்டமான பல கோடி செட்) ஃபுல் பிளாக் கலரான அவ்வுலகில் காகத்தின் தலைவன் அமர்ந்திருக்க மற்ற பெண் காகங்கள் ஆடிப்பாடிக்கொண்டிருந்தன. (பாடல்:காதல் காகம் வருகிறதே ரெமோ)

பாடல் முடிந்ததும்.. காகத்தின் தலைவனிடம் ஒற்றன் ரோபோ காகம் எடுத்த படங்களை தன் டேப்லட்டில் காட்ட தலைவன் காகம் டன் என்கிறது. அடுத்து தலைவன் காகம் ஒரு போர்டு மீட்டிங் ஸ்டைலில் பிற ரோபோ காகங்களை அழைத்து அந்த வீடியோவை காட்ட ஆன்ட்டி லேசர் மாஸ்க் அணிந்து அவை எல்லாம் புறப்படுகின்றன.. மீண்டும் 360 டிகிரி மாட்ரிக்ஸ் ஷாட்டில்.!

பறந்து வந்த காகங்கள் தங்கள் பாட்டியின் மாளிகைக்கு வந்து லேசர் வளையத்தை தகர்த்து வடையை தூக்கிக் கொள்ள முயல பாட்டியின் ரோபோ தன் டெலிவரி ரோபாக்கள் படையுடன் அதை எதிர்க்க.. பீட்டர் ஹெய்ன் அமைத்த மயிர் கூச்செரியும் சண்டைக்காட்சி 10 நிமிடங்கள் நடக்கிறது.! முடிவில் காகங்கள் ஜெயித்து ஆளுக்கொரு வடையோடு அங்கிருந்து வெற்றியுடன் கிளம்புகின்றன.!

மயங்கி கிடந்த பாட்டி விழித்த போது வடை திருடு போனது தெரிந்து கதறி அழுது போலீசில் புகார் செய்ய சிபிஐ ஆபிசர் பிரகாஷ் நரி எண்ட்ரி ஆகிறது.! பாட்டிக்கு வடை கிடைக்குமா சிபிஐ நரியின் திட்டம் என்ன காகத்தின் உலகில் நரி நுழையும் கிராபிக்ஸ், ஹெலிகாப்டர் சேஸ், ரோபோ நரிகளின் அட்டாக், இவற்றோடு காகத்தின் மகளான எமி காக்சனுடன் டூயட் அனைத்தும் வெண்திரையில் காண்க.!

ஆஸ்காகார் பிலிம்ஸ் பெருமையுடன் வழங்கும் ஷங்கரின் வ.போ. (வடை போச்செ)

விரைவில்