ஸ்பானிஷ் லீகில் இந்தியா..

#ஐரோப்பிய_லீக்

தேவ் சென்னை சர்வதேச விமான நிலையத்தின் வி.வி.ஐ.பி லவுஞ்சில் நுழைந்தான்.. தேவின் முகம் கண்டதும் லேசான சலசலப்பும் அவரவர் செய்து கொண்டிருந்த வேலைகளும் தடைபட்டன.. மூளையின் நியூரான்கள் அட இது தேவ் தான் என அனைவருக்கும் சொல்லியது.. எல்லாரது முகங்களிலும் வியப்பும் ஆவலும் கலந்து கிடந்தன.. அவர்கள் இதழ்களில் புன்னகைகள் விரிந்தன சிலர் பரபரப்பாக எழுந்து நின்றார்கள்.

இளம்பெண்கள் ஹேய்..நம்ம தேவ் யா என அடிக் குரலில் கூச்சலிட்டார்கள். உலகம் முழுவதும் பிரபலமான இந்திய விளையாட்டு வீரன் தேவ். தமிழ்நாட்டை சேர்ந்தவன்.. முழுப்பெயர் தேவேந்திரன் பொன்னுசாமி.. ரசிகர்களுக்கு சுருக்கமாக தேவ்.. இந்திய அணியின் ஓபனர்.. இந்தியாவின் மிகப் பிரபலமானவர்கள் பட்டியலில் சச்சின் டெண்டுல்கரை அவனக்கு பின் தள்ளியவன்.. உலகில் அதிகம் சம்பாதிக்கிற விளையாட்டு வீரன் தேவ்.

லவுஞ்சில் பெரிய பெரிய வி.வி.ஐ.பி.கள் எழுந்து கை குலுக்கினார்கள்.. பெண்கள் அவனை கண்களால் விழுங்கியபடி ஆட்டோகிராஃப் கேட்டார்கள்

சிலர் செல்ஃபி எடுக்கும் போது வேண்டுமென்றே ஒட்டி உரசி நின்றார்கள். புன்னகைத்த முகத்துடன் தேவ் அவர்களுடன் ஒத்துழைத்தான்.. தூரத்தில் ஒரு சோபாவில் இருந்து ஒரு கை உயர்ந்ததைப் பார்த்தான்.. அது சம்யுக்த குமார் அல்லவா.. பரபரப்பாக எல்லாம் முடித்துவிட்டு அவரிடம் சென்றான்.

வெல்கம் தேவ்.. எப்படி இருக்கிங்க என்றார் உடைந்த தமிழில் சம்யுக்த்.. சம்யுக்த் பெங்களுரைச் சேர்ந்த தொழிலதிபர்.. 5 ஆண்டுக்கு முன் தேவ் தலைமையில் பெங்களூர் அணியை இந்தியன் லீக்கில் வாங்கி வைத்திருந்தவர்.. தற்போது தொழில் நஷ்டமடைந்து வெளிநாட்டில் வசிக்கிறார். நலம் சார் நீங்க..? ம்ம் இருக்கேன் இந்தியாவுக்குள்ள வந்தே 3 வருஷம் ஆச்சு இப்ப கூட ஹாங்காங்கில் இருந்து டிரான்சிட் தான் என்றார்.

அவரது குரலில் வேதனை இருந்தது.. இட்ஸ் ஓகே சார் மீண்டும் நீங்க எழுந்து வருவிங்க என்றான் தேவ்.. ஓகே மை பாய் எங்க ஸ்பானிஷ் லீக் தானே என்றார் மெல்ல கண்சிமிட்டியபடி.. சம்யுக்த் கண்சிமிட்டினார் என்றால் இயல்பாகி விட்டார் என அர்த்தம்.. தேவுக்கு நிம்மதி பிறந்தது. ஆமா சார் இது சீசன் 4 விளையாட்டா 2017 ஆம் ஆண்டு ஆரம்பிச்சது இப்ப 2020 வரைக்கும் நீளுது..கால்பந்து பார்க்க கூட இப்ப ஆளில்லை என்றான்.

யெஸ் தேவ் இந்தியா உள்ளிட்ட சில நாடுகளில் மட்டும் விளையாடிய இந்த விளையாட்டை இப்ப ஐரோப்பாவிலும் ஆரம்பிச்சிட்டாங்க அர்ஜெண்டினா பிரேஸில் டீம் கூட வந்துருச்சே.. நீ தானே இன்னிக்கி உலகிலேயே டாப் சம்பளக்காரன்.. ஆமா ஸார் என்றான் சற்று நெளிந்த படி.. தேவ் நீ தானே இப்பவும் ஓபனர்.. யெஸ் ஸார்...ஆமா அந்த ஸ்டேஜை மட்டும் விட்டுக் கொடுத்துடாதே நீமட்டும் தான் இருக்கே டீமில் மத்தவங்க எங்கே என்றார்.

மத்தவங்க நேற்றே போயிட்டாங்க சார் நான் இந்தோனிஷியா லீக்கை முடிச்சிட்டு போறேன்.. இன்னிக்கு அவங்களோட ஜாயின் பண்ணிக்குவேன்.. ஓ இந்தோனிஷியா வரை இந்த விளையாட்டு போயிடுச்சா.. வொண்டர்புல் ஓகே மை பாய் என் பிளைட்டுக்கு அனவுன்ஸ் வந்துடுச்சு.. ஜெர்மனி வந்தா வீட்டுக்கு வா என்றவர் எழுந்து மெல்ல அவனை அணைத்து விடை பெற்றார். அவர் கிளம்பியதும் சரேலென மீண்டும் ரசிகர்கள் பட்டாளம் சூழ்ந்தது..

இந்த ரகளை எல்லாம் முடிந்து விமானம் ஏறி தனது பிஸினஸ் கிளாஸ் ஸ்லீப்பர் சீட்டில் செட்டிலாகி பிளாக் காபியும் சாண்ட்விச்சும் எடுத்துக் கொண்டான்.. ஏர் ஹோஸ்டஸ்கள் தவழ்ந்து தவழ்ந்து உபசரித்தார்கள்.. அவர்களும் செல்ஃபி எடுத்துக் கொள்ள மெல்லிய இரவு விளக்கை ஆன் செய்து இருக்கையில் படுக்க அவனுக்கு போர்வையை நன்கு போர்த்தி விட்ட ஏர்ஹோஸ்டஸ் மெல்ல அவன் கையில் முத்தமிட்டு விலகினாள்.

தேவுக்கு ஆச்சரியம் சச்சினை தெரியாது என்று சொன்ன ரஷ்ய டென்னிஸ் 

வீராங்கனை இன்று தேவ் யார் எனத் தெரியாது சொல்லுவாளா இவனுடன் டேட்டிங் அல்லவா கேட்பாள்.. தேவுக்கு ஏற்கனவே  4 ஆஃபர்கள் இருக்கு

இந்த விளையாட்டு தான் அவனை இந்தளவிற்கு ஆக்கியுள்ளது இன்று உலகையே ஆட்டிப் படைக்கிறது.. எண்ணியபடியே நன்கு உறங்கினான். மறு நாள் ஸ்பானிஷ் லீக் நடக்கும் மாட்ரிட் நகரை அடைந்தான்.

அணியினர் இருக்கு ஓட்டலுக்கு போய் பயிற்சியாளருடன் ஆலோசித்தான் நாளை மறு நாள் லீக் துவங்குகிறது அதற்கான வியூகங்கள் வகுக்கப்பட்டன மைதானத்தில் கடும் பயிற்சி எடுத்தார்கள்.. வீரர்களின் அணிவரிசையை மாற்றலாம் என்றார் உடற்பயிற்சியாளர்.. சமீபகாலமாக ஜுனியர் தேவ் என அழைக்கப்படும் சம்பத் சந்திரசேகரை ஓபனராக அனுப்பலாம் என்றார்.. ஒரு நிமிடம் கண்மூடினான் தேவ்.. "உன் இடத்தை விட்டுக் கொடுக்காதே" 

என்றார் விழிகளுக்குள் சம்யுக்தகுமார்.. தலையை உதறி சட்டென்று சொன்னான் இல்ல அதுக்கு இன்னும் காலம் வரலை.. அனைவரும் அறை திரும்ப அடுத்த நாள் உலகமே கொண்டாடும் அந்த ஸ்பானிஷ் லீக் துவங்கியது.. அந்நாட்டு அதிபர் வண்ணமயமாக நடந்த துவக்க விழாவை நிறைவு செய்ய  காலரி எங்கும் ரசிகர்கள் அவர்கள் நாட்டுக் கொடியுடன் வண்ண வண்ணமாக அமர்ந்திருந்தார்கள்.உலகின் மிகப் பெரிய டிவி சானல் 

நேரடியாக இதை ஒளிபரப்பியது பிரபல வீரர்கள் வர்ணனையாளர்களாக அமர்ந்திருக்க அழகிய சியர்ஸ் கேர்ள்கள் ஆட பியரும் கோக்கும் பெப்சியும் பொங்கி ஓட தடதடக்கும் டிரம்ஸ் டிரம்பட்டுகள் ஒலிக்க ரசிகர்கள் ஆட அந்த இடம் பெரும் ஆரவாரத்துடன் இருந்தது.. பயிற்சியாளர் ரெடியா தேவ் என்றார் கட்டை விரல் உயர்த்தி தேவும் பதிலுக்கு உயர்த்தினான்..லீக் துவங்கியது மைதானத்தில் நடுவர்கள் முதலில் இறங்கினார்கள்.

அவர்கள் இடத்துக்கு சென்று நடுவர்கள் நின்றதும்..தேவ் எழுந்தான் உடலை முறுக்கி வார்ம் அப் செய்து கொண்டான்.. மைதானத்தின் ஜெயண்ட் ஸ்கிரீனில் கவுண்டவுன் தொடங்கியது இங்கிலாந்து வீரர் ஒருவர் டென் என ஆரம்பிக்க திரையில் ஒன் சொன்னது தேவ் கவுண்ட்டவுன் முடிந்ததும் அந்தக் கதவு திறக்க திறந்தவுடன் புயலென பாய்ந்தது காளை ஒன்று.. உலகின் அனைத்து அணிகளின் ஓபனர்களும் காளையை நோக்கி ஓட இந்தியாவின் ஓபனிங் மாடுபிடி வீரனான தேவும் களத்தில் பாய்ந்தான்.