ஹலோ அமெரிக்கா - 4

#அமெரிக்க_வாழ்_தமிழர்கள்

பார்ட் - 4

அமெரிக்காவில் பட்டப்படிப்பு வரை கல்வி இலவசம். அதுவும் வீடு இருக்கும் இடத்திற்கு அருகிலேயே ஸ்கூல் இருக்கும்.. வேறு பகுதியில் போய் சேர்க்க முடியாது.. உதாரணமாக மேற்கு மாம்பலத்தில் வசிப்பவர் அண்ணாநகரில் உள்ள பள்ளியில் சேர முடியாது..  பள்ளிப் பேருந்து, நோட்டுப் புத்தகங்கள் எல்லாமே இலவசம்.. தேர்வுகள், பாடங்கள், சீருடை, ரேங்க் கார்டுகள் என எதுவுமே இல்லை. அரசு பள்ளிகளில் தான் பெரும்பாலானோர் படிக்கின்றனர்.

தனியாரில் படிக்கத் தான் கட்டணம்.. இருப்பினும் அரசுப்பள்ளிகள் தான் பலரது சாய்ஸ். இங்கும் நம் தமிழர்களை பாராட்ட வேண்டிய ஒரு விஷயம்.. தனியாக இலவசமாக தமிழ்ப்பள்ளிகள் நடத்துகிறார்கள்.. பலர் என்.ஜி.ஓக்களாக இருந்து தமிழ்ப் பாடம் சொல்லித்தருகிறார்கள். இதற்காக ஒரு தொகையை சொந்தமாக செலவழித்தும் புரவலர்களிடம் நிதி திரட்டியும் தமிழ் வளர்க்கிறார்கள்.. பல தமிழ்ச் சங்கங்களும் இதற்கு பேருதவி செய்கின்றன. இதில் ஃபெட்னா எனப்படும் வட அமெரிக்க தமிழ்ச்சங்கத்தின் பணிகள் அளப்பரியது.. பாராட்டத்தக்கது.

அமெரிக்கப் பள்ளியில் கற்றுக் கொண்டு நுனிநாக்கில் அமெரிக்க  அசெண்ட் ஆங்கிலம் மட்டுமே பேசும்படி தமிழ்க் குழந்தைகளை விட்டு விடாமல் தமிழ் மொழியை அவர்களுக்கு நன்கு பயிற்றுவித்து தமிழை அழியாது பாதுகாக்கிறார்கள். அவர்கள் அனைவரையும் பாதங்கள் தொட்டு வணங்கலாம். எல்லா வீடுகளிலும் நாங்கள் நுழைந்ததும் அங்குள்ள பிள்ளைகள் இருகரம் கூப்பி வணக்கம் எனச் சொன்னது நெகிழ வைத்தது.

பொதுவாக பாடங்கள் ப்ளே ஸ்கூல் போலத்தான் சொல்லித்தரப்படுகின்றது விளையாட்டு ரொம்ப முக்கியம். பிள்ளைகளுக்கு ரேங்க் இல்லை ஆனால் க்ரேடு உண்டு ஒரு குழந்தை என்ன ஆகவேண்டும் என்பதை அவர்கள் போக்கிலேயே விட்டு விடுகிறார்கள்.. பள்ளி இறுதியில் 54 சப்ஜெக்டுகளில் படிக்க வேண்டுமாம்.. அதில் நாம் எடுக்கும் க்ரேடுக்கு ஏற்றபடி நம் விருப்பப் பாடத்தை நாமே தேர்ந்தெடுத்து மேற்படிப்பு படிக்கலாம்.

ஃப்ர்ஸ்ட் க்ரூப் செகண்ட் க்ரூப் குழப்பங்கள் இல்லை. எக்ஸ்டிரா கரிகுலர் ஆக்டிவிட்டிகளுக்கு தனியிடம் தருகிறார்கள்.. பள்ளியில் பேண்ட் குழுவில் சேரலாம் ஸ்கவுட் இருக்கிறது.. முக்கியமாக பள்ளியில் ஏதாவது ஒரு விளையாட்டு அணியில் பிள்ளைகள் இருக்க வேண்டுமாம்.. அது மட்டுமின்றி அங்கு பிள்ளைகளுக்கு LKGயில் முதல் பால பாடமே மஞ்சள், சிவப்பு, பச்சை டிராபிக் லைட்டுகள் தான் இவற்றை மதிக்க சொல்லித் தருகிறார்கள்.

அதற்கடுத்த பாடம் 911க்கு போன் செய்வது அதென்ன 911?அமெரிக்காவின் அவசர உதவி எண்.. அங்கு பிள்ளைகளை அடிக்கக்கூடாது துன்புறுத்தக் கூடாது.. ஏன் சத்தமாக அதட்டக் கூடாது.. அப்படி செய்வதை பக்கத்து வீட்டில் ஒருவர் பார்த்தால் உடனே 911க்கு போன் செய்து விடுவார்.. நீங்கள் விசாரிக்கப்பட்டு குற்றம் இருந்தால் தண்டிக்கப்படுவீர்கள். அங்குள்ள பிள்ளைகளே 911க்கு போன் செய்யவா அப்பா என செல்லமாக மிரட்டுவார்களாம்.

பிள்ளைகளும் நன்கு படிக்கிறார்கள் நடனம் கராத்தே என தனித்தனி திறமைகளை வளர்த்துக் கொள்கிறார்கள். நான் பார்க்க நிறைய பிள்ளைகள் கூடைப்பந்து ஆர்வலர்களாக இருந்தனர். இன்னும் 10வருடங்களில் ஆதவன்,ஆதித்யா, தமிழ்வாணன், அமுதன் போன்ற தமிழ்பெயர்களை ஸ்போர்ட்ஸ் சானலில் அமெரிக்க NBA தொடரில் பார்க்க நேரிட்டால் அது ஆச்சரியம் இல்லை.. அவ்வளவு நேர்த்தியாக பிள்ளைகள் ஆடுகிறார்கள். நிற்க..

அமெரிக்க வீடுகள் பற்றி அடுத்த பதிவில்...

வரும்....