ஹலோ அமெரிக்கா - 5

#அமெரிக்க_வாழ்_தமிழர்கள்

பார்ட் - 5

அமெரிக்காவில் வீடுகள்.. பெரும்பாலும் நம் ஆட்களை அங்கேயே கட்டிப் போடுவது இந்த சொந்த வீடுகள் தான்.. இங்கு வீடு வாங்கிவிட்டால்  அந்த ஈ.எம்.ஐக்காவே வாழ்ந்து கடினமாக  உழைத்து அதை அடைத்து முடியும் போது இதை விட்டுட்டு எப்படி போக என அவர்கள் வாழ்க்கை அங்கேயே பிடித்து வைக்கப்படுகிறது. அமெரிக்காவில் இடம் வாங்குவது பெரிய விஷயமே இல்லை ஒரு ஏக்கர் இடமே 30 இலட்சத்துக்கு கிடைக்கிறது.

நிலம் விலை உயரும் என்பது போல கான்செப்டுகள் ஒரு சில இடத்தில் தான் மற்றபடி 30 இலட்சரூபாய் இடத்தை 10 வருடம் கழித்தும் அதே விலைக்குதான் விற்கமுடியும். சரி இடம் வாங்கியாச்சு வீடு கட்டுவது.. அமெரிக்காவில் வீடு கட்டுவதற்கு பதில் ஐந்து பெண்டாட்டிகளை கட்டி விடலாம். சுண்டைக்காய் கால் பணம் சுமை கூலி முக்கால் பணம்ன்னு ஒரு பழமொழி கேள்விப் பட்டு இருப்பிங்க அது இதுக்கு சரியாகப் பொருந்தும்.

30 இலட்சரூபாய்க்கு இடம்.. 1 கோடி ரூபாய்க்கு கட்டுமானப் பொருட்கள் சரி அவ்ளோ தானேன்னு கேட்டா கட்டுமான கூலி இருக்கே அது 1.5 கோடி ரூபாய்.. அதாவது 1 கோடி ரூபாய்க்கு ஒன்றரை கோடி ரூபாய் கூலி. இது பட்ஜெட்டுக்கு ஏற்றபடி மாறுபடும்.. வீடுகள் பெரும்பாலும் மரத்தில் தான் கட்டப்படுகின்றன 3 அல்லது 4 மாதத்தில் வீடு கட்டப்படுகிறது. வேறிடத்தில் வீட்டை செய்து கொண்டு வந்து பொருத்தும் சிஸ்டமும் இருக்கிறது.

அமெரிக்காவின் சில பகுதிகளில் டொர்னாடோ எனும் சுழல் காற்று அபாயம் உண்டு மணிக்கு 70 மைல் வேகத்தில் சுழல் காற்று சர்வசாதாரணமாக அடிக்கும்.. தொப்பியை கழட்டுவது போல கூரைகளை அடித்து போய்விடும் அந்த ஊர்களில் மட்டும் மரவீடுகளின் அண்டர்கிரவுண்ட் காங்க்ரீட் சுவர்களால் எழுப்பப்பட்டிருக்கும். குளிர் தாங்க வேண்டும் பெய்கின்ற பனிப் பொழிவைத் தாங்கவேண்டும் சரி பனியில் நனைந்தால் மரம் ஊறிவிடாதா? நியாயமான கேள்வி ஆனால் இங்கிருக்கும் மரங்கள் அப்படிப்பட்டதல்ல.

கெமிக்கல் கோட் கொடுத்து பனி, வெயில், பூச்சிகள் அரிக்காத சேஃப்டி ஃப்ரூப் மரங்கள். 25 வருடங்கள் வரை தாங்கும் உறுதியுடன் தயாரித்த மரங்கள் அவை.. ஒவ்வொரு வீட்டிலும் கீழே நான்கு பக்கமும் காங்கீரிட் சுவர் உள்ள அண்டர் கிரவுண்ட் கட்டப்பட்டு அதன் மேலே மரத்தில் வீடு எழுப்பப்படுகிறது. அதாவது சுழல் காற்று வந்தால் பாதுகாப்பாக குடும்பம் பதுங்கிக் கொள்ள அந்த அறை. அதன் பிறகு தரையிலும் மரங்கள் அதன் மீது மெத்தென்ற விரிப்பு போடப்படுகிறது.. அது சப்தம் வராதும் காக்கிறது.

அமெரிக்க வீட்டு அமைப்பு பற்றி அடுத்த பதிவில்.. 

வரும்...