ஹலோ அமெரிக்கா - 8

#அமெரிக்கவாழ்க்கையும்_தமிழர்களும்

பார்ட் - 8

அமெரிக்காவில் நம்ம ஊரு போல.. நந்தனம் சிக்னல் தாண்டி சைதாபேட்டை பிரிட்ஜ் வழியா ராஜ்பவன் வந்து அப்படியே ரைட்டுல திரும்பி வேளச்சேரி மெயின் ரோட்டை பிடிச்சு இப்படியெல்லாம் வழி சொல்ல முடியாது. அங்கு எப்படி தெரியுமா.? சுரேஷ் எங்க இருக்கிங்க.? ஏர்போர்ட்டுல இருந்து கிளம்பிட்டிங்களா.. ஓ.கே நைன்ட்டி போர்ல வந்துட்டே இருங்க.. அதுல இருந்து எக்ஸிட் 9 எடுத்து எய்ட்டி டூக்கு மாறுங்க அதுல வரும் போது எக்ஸிட் டென் ஏ டென் பி விட்டுட்டு டென் சியில் எக்ஸிட் எடுங்க ரைட்ல கேஸ்ஸ்டேஷன் பக்கத்துல வாங்க அங்க வால்க்ரீன்ஸ் கிட்ட நிக்குறேன்.

அங்கு சாலைகளுக்கு எல்லாம் எண்கள் அதே போல எக்ஸிட்டுகளில் சரியாக வெளியேற வேண்டும்.. ஒரு எக்ஸிட் விட்டாலும் சர்க்கஸ் கூண்டுக்குள் சுற்றும் சாகச வீரனைப் போல சுற்றிக் கொண்டே இருப்பீர்கள். சாலை விதிகளில் அவ்வளவு துல்லியம்.. ஒரு தவறு செய்தாலும் போச்சு..அமெரிக்கர்கள் பயப்படும் ஒரு சொல் டிக்கெட்..! போலீசாரால் கொடுக்கப்படும் இந்த டிக்கெட்டை மூன்று முறை பெற்றுவிட்டால் போச்சு.

லைசென்ஸ் பறிமுதல் சிறிது காலம் வண்டி ஓட்டத்தடை மீண்டும் புதிதாக விண்ணப்பித்து லைசென்ஸ் பெற்று மறுபடியும் முதல் புரோட்டாவில் இருந்து வரணும்..ஆகவே எச்சரிக்கையாக இருக்கிறார்கள். ஸ்டாப் போர்டு என்னும் ஒரு போர்டு இருக்கிறது ரெசிடன்சியல் ஏரியாவில் 100 அடிக்கு ஒன்று என்னும் வீதம் அந்த பலகை இருக்கும் சிவப்பு பின்னணியில் வெள்ளை எழுத்துகள் உள்ள போர்டு இதன் அருகே வந்து சில நொடிகள் வண்டியை நிறுத்திவிட்டு பிறகு மெல்ல மெல்ல நகர வேண்டும்  பகலில் மட்டுமல்ல..

இரவு 12 மணிக்கு சாலையில் யாரும் இல்லாதபோதும் அதை கடை பிடிக்கிறார்கள்.. அவ்வளவு துல்லியம் நீங்கள் அதிவேகமாக ஓட்டினாலும் விரட்டி வந்து டிக்கெட் தந்துவிடுவார்கள்..கிரிக்கெட்டில் விக்கெட் விழாதது எவ்வளவு முக்கியமோ அதே அளவு இங்கு டிக்கெட் விழாதது மிக முக்கியம். இங்கு எல்லா கார்களுக்கும் நம்பர் ப்ளேட்டில் ஒரு ஸ்டிக்கர் ஒட்டியிருப்பர். அதை ஸ்கேன் செய்தால் உங்கள் ஜாதகம் அப்படியே வந்துவிடும்.

 

சாலையில் ஒரு விபத்து என்றால் சைடில் உள்ள எமெர்ஜென்சி ரோட்டில் ஆம்புலன்ஸ் போலீஸ் வரும் அந்த நேரத்தில் அந்த ரோட்டை அடைத்து விடாமல் எல்லாரும் வரிசையாக நிற்கிறார்கள் அந்த ஒழுங்கு நம் ஊரில் எல்லாம் சாத்தியமே இல்லை.. ஆம்புலன்ஸ் ஹெலிகாப்டரும் இருப்பதால் துரித கதியில் முதலுதவியும் கிடைக்கிறது போக்குவரத்தும் சில நிமிடங்களில் சீர்படுத்தப்படுகிறது.. இது போன்ற தாமதங்களை அலுவலகங்கள் மறு கேள்வி கேட்காது ஏற்றுக் கொள்வதால் யாருக்கும் அவசரம் இல்லை.. ரிலாக்சாக இருக்கிறார்கள்.

மேலும் காரில் எலக்ட்ரானிக் சிப்புகள் பொருத்தப்பட்டு இருக்கும்.. அது நீங்கள் வண்டி ஓட்டும் முறையை பதிவு செய்து கொண்டே இருக்கும் குறிப்பிட்ட வேகத்திற்கு மேல் சென்று ஓட்டி விபத்தாகி விட்டால் தவறு எதுவென்று துல்லியமாக காட்டிக் கொடுத்துவிடும்.. தவறு நம் மீது என்றால் இன்சூரன்ஸ் கிடைக்காது. அமெரிக்காவில் இன்சூரன்ஸ் மிக மிக முக்கியம்.

அதுபற்றி அடுத்த பதிவில்...

வரும்...