#அமெரிக்க_வாழ்_தமிழர்கள்
பார்ட் - 7
பீரோ உயரத்தில் டபுள் டோர் ரெஃப்ரிஜிரேட்டர் மைக்ரோவேவ் ஓவன் இது இரண்டும் இல்லாத ஒரு அமெரிக்கத் தமிழரின் வீட்டைக் காட்டினால் அவர்களுக்கு ஒரு ரோல்ஸ்ராய்ஸ் கார் பரிசு தருகிறேன் என தாராளமாக அறிவிக்கலாம். பரிசு யாருக்கும் போகாது.. மெகா சைஸ் டிவி ஹோம் தியேட்டர்... சிட் அவுட்டில் க்ரில் சிக்கன் அடுப்பு, பியானோ, பில்லியர்ட்ஸ் & டேபிள் டென்னிஸ் இதெல்லாம் பெரும்பாலான வீடுகளில் நாங்கள் பார்த்தவை.
சகல வசதிகளுடன் அழகான மாடுலர் கிச்சன்.. வீட்டில் மல்டிபர்ப்பஸ் சீலிங் ஃபேன்.. இது இரண்டு விதமாகவும் சுற்றும் அதாவது நம்ம ஊர் போல சுற்றி காற்றை வீசும் எதிர்புறமாக சுற்றி காற்றை உறிஞ்சும்.. அதேபோல கேஸில் எரியும் கணகண அடுப்பு.. முக்கியமாக வீட்டு சீதோஷ்ண நிலையை குளிரவோ வெப்பமூட்டவோ செய்யும் சாதனம் இவெயெல்லாம் உண்டு. அமெரிக்கர்களுக்கு தின வாழ்வில் மிக மிக முக்கியமானது எது தெரியுமா.?
வானிலை அறிக்கைதான்.! ஆமாம் தினமும் சாட்டிலைட்டுகள் கண்காணித்து துல்லியமாக கூறும் வானிலை அறிக்கைக்கு ஏற்றபடி தான் ஆடைகள் அணிகிறார்கள்.. வீட்டு சீதோஷணத்தை கட்டுப்படுத்துகிறார்கள், தங்கள் போக்குவரத்தை தீர்மானிக்கிறார்கள். நம்ம ஊர் போல மழை பெய்தாலும் பெய்யலாம் போன்ற வழ வழ விளக்கெண்ணெய் வெண்டைக்காய் அறிவிப்பு அங்கு ஆகாது.. ஒரு சிலரையாவது சாலையில் குடையுடன் பார்த்துவிட்டால்..நிச்சயம் மழை பெய்யும் என அறிந்து கொள்ளலாம். மழையும் பெய்யெனப் பெய்கிறது.
வானிலை அறிவிப்புக்கு ஏற்ப வாழும் வகையில் அவர்களது வாழ்க்கை பழகி விட்டிருக்கிறது.. அதே போல வெளியே அலுவலகம் செல்ல காரில் ஏறியதும் இக்னீஷியனை ஆன் செய்கிறார்களோ இல்லையோ அதற்கு முன் ஜி.பி.எஸ். கருவியை ஆன் செய்து விடுகிறார்கள்.. அது துல்லியமாக வழி காட்டுகிறது.. தினமும் போகும் அதே பாதை தானே இதுக்கு எதுக்கு ஜி.பி.எஸ்.? உங்கள் கேள்வி நியாயம் தான் ஆனால் அமெரிக்க சாலைப் போக்குவரத்து கொஞ்சம் கடுமையானது சிக்கலானது ஆனால் கட்டுக்கோப்பானது.
அது பற்றி தெரிந்து கொள்ளலாம் அடுத்த பதிவில்...
வரும்...
No comments:
Post a Comment