வின்சியஸ் கிரகம் கடும் நிதி நெருக்கடியில் இருந்தது அவர்களின் வருமானம் மிக மிகக் குறைந்து இருந்தது அவர்கள் நாணயமான வீலாடர் கிரகத்தின் பணக்கார நாடான வீஎஸ்ஸானோ மதிப்பில் மிக மிகக் குறைந்தது.. பங்குச்சந்தைகள் வீழ்ந்தன. நிதி அமைச்சகம் கூடியது.
என்ன செய்யலாம் என்றபோது கிரகத்தின் இலவசங்களை நிறுத்தலாம் என்றார் நிதி மந்திரி வினாகி. அது நல்ல யோசனையாகப் பட்டது அனைவருக்கும்.. முதலில் இலவசமாக கொடுக்கப்பட்டு அதனால் சுமை அதிகமாகும் செலவினம் எதுவென்று ஆராய்ந்து பார்த்தார்கள்.
வின்சியசில் கல்வியும் மருத்துவமும் இலவசம்..! இதை நிறுத்தினாலே அடுத்த 5000 ஆண்டுகளுக்கு பிரச்சனை இல்லை என்றார் வினாகி..! சரி இதை பணம் கொழிக்கும் துறையாக மாற்றுவது எப்படி என அவர்கள் கிரகத்து வலைத்தளமான வீகுளில் பரபரப்பாகத் தேடினார்கள்.
விடை.. பூமியில் இந்தியாவென வந்தது உடனடியாக இந்தியாவைத் தொடர்பு கொண்டார்கள் சாட்டிலைட் வீடியோ கான்பரன்சில் உரையாட முடிவு செய்தார்கள்.. இறுதியில் தமிழ்நாட்டைச் சேர்ந்த கல்வித் தந்தை கண்ணனும் மக்கள்மருத்துவர் மகாதேவனும் தேர்ந்தெடுக்கப் பட்டார்கள்.
முதலில் கல்வி.. கண்ணன் திரையில் தோன்றினார்..வின்சியஸ் கல்வி முறை பற்றிக் கூறுங்கள் என்றார்.. இங்கு கல்வி இலவசம் என்றார் வினாகி.. முட்டாள்களே முதல் கோணல் முற்றிலும் கோணல் கல்வியை இலவசமாகத் தருவதே முட்டாள்தனம்.. அதற்கு கட்டணம் வசூலியுங்கள் என்றார்.
கல்விக்கு கட்டணமா..! அது எப்படி? என்றார் வினாகி உங்கள் ஆரம்பக்கல்விப் படிப்பென்ன.? கண்ணன்.. இங்கு வில்.கே.ஜி மற்றும் வில்யூ.கே.ஜி இதுதான்.. அதற்கு என்ன கட்டணம்..? இங்கு மேல்படிப்புக் கல்வியே இலவசம் குழந்தைகள் படிப்புக்கு கூடவா கட்டணம் என்றார் வினாகி.
மூடர்களே.! பணம் கொட்டும் கல்வியை இப்படியா வீணடிப்பது.! உங்கள் ரூபாயின் பேரென்ன என்றார் கண்ணன். வீலாடர் என்றார் வினாகி.. அதன் மதிப்பு இந்திய ரூபாயில்.? உங்கள் 100 ரூபாய் எங்கள் கிரகத்தில் 10 ரூபாய் என்றார் வினாகி.. ஆஹா எவ்வளவு நல்ல விஷயம் இது..!
உடனடியாக உங்கள் வில்.கே.ஜிக்கு அட்மிஷன் 25 ஆயிரம் வீலாடர்களும் வில்யூ.கே.ஜிக்கு 50 ஆயிரம் வீலாடர்களும் கட்டணம் வையுங்கள் என்றார் கண்ணன். வில்.கே.ஜிக்கு 25 ஆயிரமா.! வியந்தார் வினாகி. ஆம் அது மட்டுமல்ல உங்கள் குழந்தைகள் எப்படி பள்ளி வருகிறார்கள்.? என்றார்.
அரசின் பறக்கும் தட்டுகள் அவர்களைப் போய் வீட்டிலிருந்து அழைத்து வந்து பள்ளியில் இறக்கிவிடும் மீண்டும் மாலை வீடு போய் சேர்க்கும் என்றார் அதற்கு கட்டணம் எவ்வளவு என்றார் கண்ணன்.. இதற்கு எதற்கு கட்டணம்? வினாகி வினவ.. யோவ் லூசு இதையுமா இலவசமாகத் தருவது.?
உங்கள் பறக்கும் தட்டில் எவ்வளவு பேர் அமரலாம்? எனக்கேட்டார் கண்ணன் அதில் 50 பேர் அமரலாம் பிள்ளைகளின் நலன் கருதி நாங்கள் 26 பேருக்கு மேல் ஏற்றமாட்டோம் என்றார் வினாகி. அடத்தூ.. யோவ் நீங்கள் அதில் 100பேரை ஏற்றுங்கள் அவர்களிடம் மாத தட்டுபீஸ் வாங்குங்கள்.
என்ன நூறுபேரா பிள்ளைகளுக்கு அசவுகரியமாக இருக்குமே என்றார் வினாகி. அப்போ நீங்க சவுரியமா இருக்கமாட்டிங்க பரால்லையா என்றார் நாய்சேகர் பாணியில்.. இல்லையில்லை நீங்கள் ஆலோசனை தாருங்கள் என்றார் பதட்டத்துடன் வினாகி. நான் சொல்றதை கேளுங்க..
பிள்ளைகள் படிக்க ஃபீசு,புக் ஃபீசு,பஸ் ஃபீசு, ஸ்நாக்ஸ் ஃபீசு, வாட்டர்ஃபிசு, யூனிஃபார்ம் பீசு,லஞ்ச்ஃபீசு, ட்யூஷன்ஃபீசு, ரிவிஷன்ஃபீசு, டூர்ஃபீசு, டெஸ்ட்ஃபீசு,லேப்ஃபீசு, இப்படி ஃபீசுகளை வாங்கிக் குவியுங்கள் என்றார் கண்ணன். இது அநியாயம் மக்கள் ஃபீசாகிவிடுவார்களே என்றார் பினாகி.
அப்ப சரி.. நீங்க ஃபீசா போயி நிதி நெருக்கடியில் தள்ளாடுங்க என்றார் கண்ணன்.கொஞ்சம் யோசித்த பினாகி சார் நீங்க சொல்றதுதான் சரி இதில் பாவம் புண்ணியம் பார்க்கக் கூடாது இனி வின்சியசில் பென்சிலுக்கு கூட ஃபீஸ் உண்டு ஓகேவா எனச்சொல்ல.. சூப்பருய்யா..
பென்சில் ஃபீசா.. இந்த டீலிங் நல்லா இருக்கே.! உடனடியா இங்கேயும் அமுல் படுத்திடுறேன் சரி எதுவானாலும் கூப்பிடுங்க திரையில் மறைந்தார் கண்ணன். அடுத்து மக்கள் மருத்துவர் மகாதேவன் தோன்ற பிரச்சனையை சொன்னார்கள். அவர் எல்லாம் கேட்டுவிட்டு ஒன்று கேட்டார்.
ஓ இந்த பிரச்சனையா!பதில் சொல்றேன் அதுக்கு முன்னாடி என் கன்சல்டிங் ஃபீஸ் எவ்வளவுன்னு நான் தெரிஞ்சுக்கலாமா?என்றார். வின்சியஸ் கிரக வாசிகளுக்கு எல்லாம் புரிந்தது நன்றி டாக்டர் எங்களுக்கு இனி உங்கள் ஆலோசனை தேவைப்படாது நன்றி வணக்கம் என கட் செய்தார் வினோகி.
No comments:
Post a Comment