#லோவா_கிரகம்
லோவா கிரகத்தில் எங்கு பார்த்தாலும் பிளானட் சூப்பர் ஸ்டார் லானீஷ் நடித்த "லோவாலி" திரைப்படத்தின் டிஜிட்டல் போஸ்டர்களும் தோரணங்களும் வானில் லேசர் ஒளியில் பிரம்மாண்டமான லானீஷின் கட் அவுட் பிம்பமும் ஜொலித்தன. டிவி ரேடியோக்களிலும் அதே பேச்சு.
எங்கள் தங்கத்தலைவன் பிளானட் சூப்பர் ஸ்டார் லானீஷ் நடித்த காவியத்தை காண வந்த கண்களுக்கு நன்றி.. உடல் கிரகத்துக்கு உயிர் லானீஷீற்கு அண்ணனின் போர்ப்படைத் தளபதிகள் லானீஷ்" டோல்வா, லானீஷ்" பகீரா, லோவாலி கப்ரீ, லோவாலி ஜெனோ, லானீஷ் லாவா...
இது போன்ற வாசகங்கள் தாங்கிய விர்ச்சுவல் டிஜிட்டல் பேனர்கள் அலங்கரிக்கப்பட்டு இருந்தன.. அங்குள்ள லோஜா டிவியில் லோவாலி பட சிறப்பு பேட்டிகள் ஒளிபரப்பாகிக் கொண்டிருந்தன.. அந்த கிரகத்து சமூக வலைத்தளமான லீவிட்டரில் பெரும் ஹேஷ் டாக் புரட்சி ஆரம்பமானது.
பிளானட் தல லானீஷ் ரசிகர்களும் சக நடிகனான பிளானட் தளபதி லீவாஜ் ரசிகர்களும் ஒருவரை ஒருவர் கலாய்த்துக் கொண்டிருக்க மீம்ஸ்கள் தூள் பறந்தன ஹேஷ் டாகுகள் வைரல் ஹிட்டடித்தன. இந்த சினிமா கலாச்சாரம் அக்கிரகத்தில் சமீபத்தில் தோன்றியது தான் இதற்கு முன் அப்படி இல்லை.
வானில் திடீரென தோன்றியது அந்த விண்கப்பல் அந்த கிரகத்து மன்னரின் ராஜகுருவான லாகேண்டாரின் பிரத்யேக கப்பல் அது கடந்த சில ஆண்டுகளாக அண்டை கிரகங்கள் பலவற்றிற்கு ஓடி ஓ(மோ)டி சுற்றுப் பயணம் போய்விட்டு 4 ஆண்டுகளுக்கு பின்பு இப்போது தான் திரும்புகிறார்.
மெல்ல தன் கப்பலின் ஜன்னல் வழியாக இந்த விளம்பரங்களை எல்லாம் பார்த்துக் கொண்டே மன்னரின் மாளிகை வந்தடைந்தார்... ஹோ..ஹோ... வாருங்கள் லாகேண்டரே லோவாலி ரிலீஸ் அன்றே வந்துவிட்டீரா என கூவிக்கொண்டு வந்தான் மன்னன் லீகாண்டன்.
முட்டாளே கோபத்தில் கத்தினார் லாகேண்டர்.. நடு நடுங்கிப் போனான் துர்வாசரை விட பல மடங்கு கோபக்காரர் லாகேண்டர் என்றால் மனிதர்களுக்குப் புரியும்.. என்ன கூத்து நடக்கிறது என்ன இதெல்லாம் கோமாளிக்கூட்டம் இது கிரகமா இல்லை சீரழிந்த சாக்கடையா..!
சினிமாவை பற்றி அவருக்கு விளக்கிக்கூறினான் லீகாண்டன்.. எத்தனை ஆண்டுகளாக இது இங்கு நடக்கிறது என்றார் கோபம் குறையாத குரலில்.. அது நீங்கள் சென்ற அடுத்தாண்டு முதலே என கழுத்தை சொறிந்தான் லீகாண்டன். கருமம் கருமம் நீங்களெல்லாம் பத்தறிவு இருந்துமா இப்படி.?
சரி இந்தக் கண்றாவி கலாச்சாரத்தை இங்கு கொண்டு வந்தது யார்.? என்றார்... என் மகன் லுதானும் தங்கள் மகன் லைகானும் தான். அவர்களை வேறு கிரகத்துக்கு பட்டம் படிக்க அனுப்பினோம் அல்லவா அங்கிருந்து அதைக் கற்றுக் கொண்டுவந்து அதை இங்கு புகுத்திவிட்டார்கள் என்றார்.
முட்டாள்கள்.. ஆமாம் அவர்கள் எந்த கிரகத்தில் இருந்து இதைக் கற்றுக் கொண்டார்கள்.? பூமி என்றான் லீகாண்டன்.."எனக்கு இந்த கிரகமே பிடிக்கவில்லை"எனப் பல்லைக் கடித்த லாகேண்டர் திடீரென கண்கள் மின்ன யார் இந்த அழகி என்றார் லோவாலி பட போஸ்டரைக் காட்டி
இவளா இவள் தான் தற்போது நம் கிரகத்து ஆண்களின் கனவுக்கன்னி லோவீன்தாரா... இன்று கூட முதல் காட்சிக்கு தியேட்டருக்கு வருகிறாள் என்றான் லீகாண்டன். சட்டெனக் கூவினார் லாகேண்டர் முட்டாள்... இதை ஏன் முன்பே சொல்லவில்லை சீக்கிரம் தியேட்டருக்குக் கிளம்பு என்றார்.
இப்போது அவருக்கு "கிரகம்" பிடித்தது.!
No comments:
Post a Comment